រាជធានីភ្នំពេញ ៖ កម្លាំងអគ្គនាយកដ្ឋានការពារអ្នកប្រើប្រាស់ កិច្ចការ ប្រកួតប្រជែង និងបង្ក្រាបការក្លែងបន្លំ បានចុះធ្វើការត្រួតពិនិត្យស្ថានីយប្រេងឥន្ធនៈមួយកន្លែង ដែលមានទីតាំងស្ថិតនៅតាមផ្លូវបេតុង ទៅកាន់សាលាសង្កាត់ស្នោរ ខាងលិចវត្តពោធិ៍វ័ន ក្នុងភូមិផ្លាំង សង្កាត់ស្នោរ ខណ្ឌកំបូល រាជធានីភ្នំពេញ កាលពីថ្ងៃទី១២ ខែសីហា ឆ្នាំ២០២០។ ប៉ុន្តែទោះជាបែបណាកម្លាំងខាងលើមិនបានធ្វើការឃាត់ខ្លួនម្ចាស់ស្ថានីយ៍ប្រេងមួយកន្លែងនេះឡើយ គឺគ្រាន់តែធ្វើការដកហូតយកទំនិញហួសកាលបរិច្ឆេទដែលម្ចាស់ដាក់លក់នៅក្នុងម៉ាតជាង១០០គីឡូក្រាមតែប៉ុណ្ណោះ។
ដោយនៅក្នុងប្រតិបត្តិការចុះពិនិត្យស្ថានីយប្រេងឥន្ធនៈខាងលើនោះ កម្លាំងបានរកឃើញថា ប្រេងសាំងនិងម៉ាស៊ូត ដែលដាក់លក់នៅក្នុងស្ថានីយប្រេងមួយនោះមានលាយសារធាតុទឹក ដែលនាំឲ្យប៉ះពាល់ដល់ម៉ាស៊ីនយានយន្តអ្នកប្រើប្រាស់ដូចជាម៉ូតូ រថយន្ត ម៉ូតូកង់បីជាដើម។
ក្រៅពីនេះកម្លាំងសមត្ថកិច្ចខាងលើបានរកឃើញទំនិញចម្រុះមួយចំនួនសរុបទម្ងន់១៦៦គីឡូក្រាម ដែលម្ចាស់ស្ថានីប្រេងមួយនេះដាក់លក់ក្នុងម៉ាតបានហួសកាលបរិច្ឆេទ(ហួសដឺឡេ)ទៀតផង ដែលប្រការនេះបានបង្កឲ្យមានការប៉ះពាល់ដល់សុខភាពអ្នកបរិភោគនិងប្រើប្រាស់ផងដែរ។
តាមប្រភពព័ត៌មានបានឲ្យដឹងថា តាមការពិនិត្យរបស់មន្ត្រីជំនាញប្រេងសាំងស៊ុបពែរ និងប្រេងម៉ាស៊ូតដែលលក់នៅស្ថានីយខាងលើមានលាយសារធាតុទឹកដោយសារការជ្រាបគម្របទុយោបូមប្រេងក្នុងពោងស្តុកប្រេងក្រោមដី ពេលនេះមន្ត្រីជំនាញឲ្យម្ចាស់ស្ថានីយប្រេងត្រូវធ្វើការជួសជុល និងកែសម្រួលឲ្យបានត្រឹមត្រូវឡើងវិញ ។
ពាក់ព័ន្ធនឹងករណីខាងលើនេះដែរ តាមប្រភពនានាបានសម្ដែងការងឿងឆ្ងល់ថា ប្រសិនបើមានការជ្រាបគម្របទុយោបូមប្រេងក្នុងពោងស្តុកប្រេងក្រោមដីមែននោះ អញ្ចឹងប្រេងដែលស្តុកនៅក្នុងស៊ីទែនក្រោមដីនោះប្រាកដជានឹងត្រូវជ្រាបចេញពីស៊ីទែនគ្មានសល់នោះឡើយ ។
តាមប្រភពដដែលបានបន្តថា ក្រោយពីបានពិនិត្យឃើញភាពមិនប្រក្រតីខាងលើ មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឲ្យម្ចាស់ស្ថានីយប្រេងផ្អាកការលក់សាំង និងម៉ាស៊ូត ដែលមានលាយទឹកជាបណ្តោះអាសន្ន ។ ដោយបានតម្រូវឲ្យម្ចាស់ស្ថានីយប្រេងឥន្ធនៈធ្វើការជួសជុល និងកែសម្រួលឲ្យបានត្រឹមត្រូវឡើងវិញ ។ មិនតែប៉ុណ្ណោះមន្ត្រីជំនាញបានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារដែលដាក់តាំងលក់នៅក្នុងម៉ាតផងដែរ ។
ក្នុងពេលចុះពិនិត្យស្ថានីយប្រេងឥន្ធនៈមួយកន្លែងខាងលើនោះដែរ មន្ត្រីជំនាញបានរកឃើញទំនិញដែលម្ចាស់ស្ថានីប្រេងឥន្ធនៈមួយនេះដាក់លក់នៅក្នុងម៉ាតហួសកាលបរិច្ឆេទដូចជាភេសជ្ជៈ មី នំ និង សាប៊ូដុសខ្លួនជាដើមសរុបចំនួន១៦៦គីឡូក្រាម និងត្រូវបានកម្លាំងដកហូតយកទៅកាន់អគ្គនាយកដ្ឋានដើម្បីអនុវត្តតាមនីតិវិធីច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ