រាជធានីភ្នំពេញ ៖ បើមិនមានការប្រែប្រួលទេ នៅព្រឹកថ្ងៃទី១៣ សីហា នេះ គឺត្រូវស្ត្រីសង្ស័យត្រូវនាំមកសួរម្តងទៀត ខណៈស្ថិតនៅដំណាក់កាលស្ថាប័យអយ្យការបើកការស៊ើបសួរ ប៉ុន្តែម្សិលមិញដោយពេលវេលាផុតម៉ោងរដ្ឋបាល ក៏ត្រូវបានផ្ញើទៅសមត្ថកិច្ចវិញ ។
សូមរំលឹកថា ស្ត្រីម្នាក់ដែលគេស្គាល់ថា ជាថៅកែហាងលក់បាយយីហោ«មាតុភូមិ»បានត្រូវកម្លាំងសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃ ចាប់ឃាត់ខ្លួន
បញ្ជូនទៅសាលាដំបូងរាជធានីភ្នំពេញ កាលពីរសៀលថ្ងៃទី១២ សីហា ឆ្នាំ២០២០ ពាក់ព័ន្ធពីបទប្រើប្រាសលិខិតសាធារណៈក្លែង និងបទ.សមគំនិតក្នុងអំពើក្លែងមេដៃ ដើម្បីលួចលក់អចលនទ្រព្យ(ផ្ទះ) អ្នកដទៃ ។
ស្ត្រីនេះឈ្មោះ មាស ផាន្នីដា អាយុ៤៨ឆ្នាំ ជាថៅកែហាងលក់បាយយីហោ«មាតុភូមិ« មានអាសយដ្ឋានផ្ទះលេខ៥៥ ផ្លូវលេខ៧៥ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។ ទាក់ទិន និងការឃាត់ខ្លួនថៅហាងរូបនោះ ត្រូវបានសមត្ថកិច្ចបង្ហើបឲ្យដឹងថា គឺធ្វើឡើងតាមពាក្យបណ្តឹងរបស់ឈ្មោះ កែ ប៊ិនសូរស្មី និងអនុវត្តតាមដីកាបញ្ជាឲ្យចូលខ្លួនពីស្ថាប័នព្រះរាជអយ្យការអមសាលាដំបូងរាជធានីភ្នំពេញ ។
អង្គហេតុក្នុងសំណុំរឿងនេះ បានត្រូវគេដឹងថា កាលពីថ្ងៃទី២១ ខែមិនា ឆ្នាំ២០០៦ ឈ្មោះ ប៊ិន ហេងប៉ូល ជាឳពុករបស់ឈ្មោះ កែ ប៊ិនសូរស្មី បានធ្វើលិខិតផ្ទេកម្មសិទ្ធផ្ទះលេខ ២២អឺ១ ផ្លូវលេខ ១១៨ ក្រុម៤៣ សង្កាត់ផ្សារកណ្ដាល ខណ្ឌដូនពេញ ពីឈ្មោះ ប៊ិន ហេងប៉ូល ឲ្យទៅឈ្មោះ កែ ប៊ិនសូរស្មី ដោយមានលិខិតទទួល ស្គាល់លេខ ១១០០៦ ល ប ចុះហត្ថលេខាដោយលោក គង់ រិទ្ធ ចៅសង្កាត់ផ្សារកណ្ដាល១ ផងដែរ ។
ចំណែកឈ្មោះ មាស ផាន្នីដា គ្រាន់តែជាអ្នកមើលថែទាំ ឈ្មោះ ប៊ិន ហេងប៉ូល តែប៉ុណ្ណោះទេ រហូតដល់ថ្ងៃទី១៤ ខែមិនា ឆ្នាំ២០១៨ ឈ្មោះ ប៊ិន ហេងប៉ូល បានទទួលមរណៈភាពទៅ ។
ក្រោយមក ទើបឈ្មោះ កែ ប៊ិនសូរស្មី ដឹងថា ឈ្មោះ មាស ផាន្នីដា បានយកផ្ទះលេខ ២២អឺ១ ផ្លូវលេខ១១៨ ក្រុម៤៣ សង្កាត់ផ្សារកណ្ដាល១ ខណ្ឌដូនពេញ នោះ លក់ឲ្យទៅឈ្មោះ អ៊ុក ធីតា ដោយបានក្លែងបន្លំស្នាមមេដៃឈ្មោះ កែ ប៊ិនសូរស្មី រួចហើយផ្ទះដដែលនេះ បានប្រគល់សិទ្ធឲ្យឈ្មោះ មាស ផាន្នីដា (ថៅកែហាងលក់បាយមាតុភូមិ)គ្រប់គ្រងបន្ត ។ ដោយពិនិត្យឃើញថា មាន ករណីក្លែងបន្លំស្នាមមេដៃបែបនេះទើបឈ្មោះ ប៊ិន សូរស្មី ដែលជាម្ចាស់ផ្ទះពិតប្រាកដ បានសម្រេចដាក់ពាក្យប្ដឹងទៅសមត្តកិច្ចឲ្យជួយចាត់ការរឿងនេះ ។
ពាក់ព័ន្ធការចោទប្រកាន់នេះ ស្ត្រីឈ្មោះ មាស ផាន្នីដា បានឆ្លើយសារភាពថា ខ្លួនគាត់និងឈ្មោះ ប៊ិន ហេងប៉ូល គឺជាប្ដីប្រពន្ធនិងគ្នា ហើយក្រោយពីកូនៗរបស់ប៊ិន ហេងប៉ូល ទៅរៀននៅប្រទេសបារាំងអស់ទៅ គាត់បានមើល ថែទាំប្ដីរហូតមកដល់ឆ្នាំ២០១៨ ទើបគាត់ស្លាប់ ។
ចំពោះការលក់ផ្ទេរកម្មសិ ទផ្ទះគឺប្ដីរបស់គាត់ជាអ្នកឲ្យគាត់ផ្ដិតមេដៃជំនួសកូនដែលនៅប្រទេសបារាំងទាំងអស់ ។ តែទោះជាយ៉ាងណាក្តីសមត្តកិច្ចបានធ្វើកោសលវិច្ច័យ លើលិខិតស្នាមទិញលក់ផ្ទះខាងលើនោះ គឺពិតជាស្នាមមេដៃក្លែង ដូច្នោះហើយបានជា ត្រូវឃាត់ខ្លួនថៅកែហាងលក់បាយមាតុភូមិនោះ ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ