អត្រាក្នុងការក្លាយជាបុគ្គលដែលជោគជ័យ ឬអ្នកមានទ្រព្យសម្បត្តិស្តុកស្តម្ភពឹងផ្អែកលើកត្តាជាច្រើន ហើយក្នុងនោះរួមមានការជ្រើសរើសអាជីពផងដែរ ។ ទោះជាអ្នកអាចផ្លាស់ប្តូរអាជីពបានគ្រប់ពេលពិតមែនក្តី ការជ្រើសរើសអាជីពដែលត្រឹមត្រូវ និងស័ក្តិសមនឹងអ្នកបានឆាប់នឹងអនុញ្ញាតឲ្យអ្នកមានឱកាសជោគជ័យកាន់តែខ្ពស់ដែរ ។ ខាងក្រោម គឺជាជំហានមួយចំនួនដែលអ្នកត្រូវដើរមុនពេលធ្វើការសម្រេចចិត្តដ៏សំខាន់នេះ ៖
១. វាយតម្លៃលើខ្លួនឯង
បុគ្គលម្នាក់ៗមានគោលដៅ ទេពកោសល្យ ចំណង់ចំណូលចិត្ត និងគោលការណ៍ក្នុងជីវិតខុសៗគ្នា ។ មានន័យថា មានអាជីពមួយចំនួនស័ក្តិសមនឹងបុគ្គលមួយចំនួន និងមិនស័ក្តិសមសម្រាប់បុគ្គលមួយចំនួនទៀតដែរ ។ ការវាយតម្លៃដើម្បៅដឹងពីអ្វីដែលកអ្នកពូកែធ្វើ ឬចូលចិត្តធ្វើអាចអនុញ្ញាតឲ្យអ្នករកបានអាជីពដែលអ្នកស្រលាញ់ និងផ្តល់ឱកាសឲ្យអ្នកជោគជ័យខ្ពស់ ។
២. សិក្សាពីការងារ ឬមុខងារដែលអ្នកចាប់អារម្មណ៍
បន្ទាប់ពីយល់ដឹងបន្ថែមពីខ្លួនឯងហើយ អ្នកប្រហែលជាបានដឹងពីការងារដែលអ្នកអាចធ្វើ ឬចាប់អារម្មណ៍ចង់ធ្វើហើយ ។ ជាក់ស្តែង អ្នកអាចនឹងមានជម្រើសច្រើនដូច្នេះអ្នកអាចកត់វាទុកមុននឹងធ្វើការសិក្សាស្រាវជ្រាវលើការងារមួយបន្ថែម ។ អ្វីដែលអ្នកគួរដឹងពីការស្រាវជ្រាវរួមមានលក្ខខណ្ឌ តួនាទីការងារ ទស្សនៈវិស័យនៃការងារនោះ ប្រាក់ចំណូល និងឱកាសឡើងតំណែងជាដើម ។
អ្នកអាចរកព័ត៌មានទាំងនេះលើអ៊ីនធើណែត ឬសាកសួរមនុស្សដែលអ្នកស្គាល់ដែលកំពុងធ្វើការផ្នែកនេះឬស្គាល់មនុស្សដែលធ្វើការផ្នែកនេះជាដើម ។ នៅពេលដែលអ្នកបានដឹងបន្ថែមពីការងារនីមួយៗហើយ អ្នកអាចចាប់ផ្តើមបង្រួមជម្រើសរបស់អ្នកមកឲ្យបានតិចជាងមុនមកស្មើ ១ ទៅ ២ ជម្រើសជាការស្រេច ។
៣. កំណត់គោលដៅ និងផែនការ
គ្រាន់តែដឹងពីអាជីពដែលអ្នកចាប់អារម្មណ៍មិនទាន់គ្រាប់គ្រាន់ទេ ។ ប្រសិនបើអ្នកចង់ជោគជ័យក្នុងអាជីពរបស់អ្នកពិតប្រាកដនោះ អ្នកត្រូវតែមានគោលដៅរយៈពេលខ្លី និងវែងច្បាស់លាស់ ។ គោលដៅរយៈពេលខ្លីរបស់អ្នកជាគោលដៅដែលអ្នកអាចសម្រេចក្នុងកំឡុងពេលពី ១ ទៅ ៣ ឆ្នាំ ខណៈដែលគោលដៅរយៈពេលវែងគឺរវាង ៣ ទៅ ៥ ឆ្នាំ ។
បន្ទាប់ពីនោះហើយ អ្នកត្រូវរៀបចំផែនការក្នុងការងាររបស់អ្នកដើម្បីជួយឲ្យអ្នកសម្រេចគោលដៅទាំងនោះ ។ ឧទាហរណ៍ដូចជាអ្នកត្រូវបន្តការសិក្សា ឬចូលរួមការហ្វឹកហាត់សម្រាប់ជំនាញណាមួយជាដើម ៕
ចែករំលែកព័តមាននេះ