រាជធានីភ្នំពេញ ៖ កម្មករ កម្មាការីនីប្រមាណ៥០នាក់ ក្នុងចំណោមកម្មករទាំងអស់ប្រមាណ២៧០នាក់របស់រោងចក្រកាត់ដេរ សឺពីយ៉ា (ខេមបូឌា) ហ្គាមិនខូអិល ធីឌី បានធ្វើកូដកម្មដោយលើកគ្នាដង្ហែជាក្បួនទៅកាន់ក្រសួងការងារ…
រាជធានីភ្នំពេញ ៖ កម្មករ កម្មាការីនីប្រមាណ៥០នាក់ ក្នុងចំណោមកម្មករទាំងអស់ប្រមាណ២៧០នាក់របស់រោងចក្រកាត់ដេរ សឺពីយ៉ា (ខេមបូឌា) ហ្គាមិនខូអិល ធីឌី បានធ្វើកូដកម្មដោយលើកគ្នាដង្ហែជាក្បួនទៅកាន់ក្រសួងការងារ និងបណ្តុះបណ្តាលវិជ្ជាជីវៈ ដើម្បីទាមទារ អោយថៅកែបើកប្រាក់ខែអោយគ្រប់ចំនួន និងទាមទារប្រាក់ចំណាច់ឆ្នាំ ។
ការធ្វើបាតុកម្មនេះ បានផ្ទុះឡើងកាលពីព្រឹក ថ្ងៃទី១២ ខែសីហា ឆ្នាំ២០២០ ដោយកម្មករ កម្មាការីនីបានជួបប្រមូលគ្នានៅមុខទីតាំងរោងចក្រ ដែលស្ថិតនៅភូមិចាក់ជ្រូក សង្កាត់ សំរោងក្រោម ខណ្ឌពោធិសែនជ័យ រួចដង្ហែជាក្បួនទៅកាន់ក្រសួងការងាររហូតមកដល់មុខ អាកាសយានដ្ឋាន អន្តរជាតិភ្នំពេញ ត្រូវបានសាលាខណ្ឌពោធិ៍សែនជ័យ ជួលរថយន្ត២គ្រឿង ដឹកមកដល់ក្រសួងការងារ និងបណ្តុះបណ្តាលវិជ្ជាជីវៈ នៅវេលាម៉ោងប្រមាណ១០និង៤០នាទីព្រឹក ។
តាមកម្មករបានអោយដឹងថា ការតវ៉ាទាមទារអោយថៅកែរោងចក្របើកប្រាក់ខែអោយគ្រប់ចំនួន និងប្រាក់បំណាច់ឆ្នាំ ។ ជាទូទៅរោងចក្រនេះ បានបើកប្រាក់ខែនៅថ្ងៃទី១១ ដើមខែ ។ នៅថ្ងៃទី១១ ខែសីហា ឆ្នាំ២០២០នេះ រោងចក្របានបើកប្រាក់ខែអោយកម្មករ កម្មាការីនី តែ៥០ភាគរយ ដោយ៥០ភាគរយទៀតសន្យាថា បើកនៅថ្ងៃទី២៥ ខែសីហា ដោយយកលេសថា អត់លុយ ។
កម្មករអោយដឹងទៀតថា ដោយសារតែធ្វើការមួយខែបើកប្រាក់តែកន្លះខែ ហើយប្រាក់នោះចាយមិនគ្រប់កម្មករមិនព្រមទាមទារប្រាក់ខែអោយគ្រប់ចំនួន តែថៅកែមិនព្រមថែមទាំងបោះសំដីថា អោយទៅប្តឹងណាក៏ប្តឹងទៅ រួមនឹងកន្លងមកថៅកែចេះតែពន្យាពេល មិនបានបើកប្រាក់ ចំណាច់ឆ្នាំ៥ភាគរយទៀតហើយចេះតែរំសាយកម្មករជាបន្តបន្ទាប់ ទើបកម្មករទាំងអស់ក៏បានលើកគ្នាមកកាន់ក្រសួងការងារអោយជួយដោះស្រាយតែម្តង ។
តាមព័ត៌មានអោយដឹងទៀតថា នៅក្នុងការដង្ហែជាក្បួនដោយថ្មើរជើងមកដល់មុខ អាកាសដ្ឋានអន្តរជាតិភ្នំពេញផ្នែកខាងកើត ត្រូវបានកម្លាំងគណៈបញ្ជាការឯកភាពខណ្ឌពោធិ៍សែនជ័យ សួរនាំមួយសន្ទុះធំក៏បានជួយរថយន្តចំនួន២គ្រឿងដឹកកម្មករ កម្មាការីនីទៅកាន់ក្រសួងការងារ ត្រូវបានមន្ត្រីក្រសួងចេញមកណែនាំអោយកម្មករ កម្មាការីនី ត្រឡប់ទៅរោងចក្រវិញរងចាំតំណាងក្រសួង និងអាជ្ញាធរជួយដោះស្រាយជាមួយថៅកែរោងចក្រនៅវេលារសៀលនេះ ៕
ចែករំលែកព័តមាននេះ