រាជធានីភ្នំពេញ ៖ ប៉ុន្មានថ្ងៃចុងក្រោយនេះ លេចមុខតារាស្រីម្នាក់ដែលពុំសូវមានកេរ្តិ៍ឈ្មោះល្បីក្នុងវិស័យសិល្បៈ ឈ្មោះ អាណារ៉ូស ដែលកន្លងមកធ្លាប់ផ្អើលម្តងរួចមកហើយជុំវិញការថតបទចម្រៀងខារ៉ាអូខេឲ្យតួប្រុសឱបថើបស្តែងៗ ពេលនោះកំពុងក្លាយជាប្រធានបទថ្មីជុំវិញវីដេអូឃ្លីបខ្លីៗដែលនាងបានអួតអាងថា មានបងប្អូនសាច់ញាតិសុទ្ធតែអ្នកធំ និងអ្នកមាន ហើយអួតក្តែងៗថា បើអ្នកណាមិនស្គាល់រូបនាង គឺប្រៀបដូចជាមិនស្គាល់ «វិមានឯករាជ្យ» ឬក្រដាស់ប្រាក់ដុល្លារប្រភេទ «១០ ឬ ២០ ដុល្លារ» អីនោះ ធ្វើឲ្យមហាជនមួយចំនួនពេបជ្រាយជាងការសរសើររូបនាង ។
ប្រហែលជាកត់សម្គាល់ឃើញការរិះគន់ដូចទឹកបាក់ទំនប់ ជុំវិញការអួតក្អេងក្អាងរបស់នាង រ៉ូស (មិនថា មានសាច់ញាតិជាកំពូលអ្នកមាន ឬអត់ក៏មិនគួរអួតសម្ញែងនោះ) ស្រាប់តែពេលនេះប្រធានសមាគមន៍សិល្បៈអ្នកនាង ចនច័ន្ទ លក្ខិណា បានដាក់មួយឃ្លាទៅកាន់តារាស្រី ដែលតាំងខ្លួនជាអ្នកសិល្បៈល្បីថា « សម្តែងឲ្យដឹងថា សម្តែង វិលវ៉ល់ពេកហើយ» នេះបើយាងតាមការបង្ហោញរបស់អ្នកនាងតាមរយៈហ្វេសប៊ុក ។
មិនត្រឹមតែបោះពាក្យសំដីទាំងនោះទៅកាន់នាងអាណារ៉ូសនោះទេ ប៉ុន្តែអ្នកនាងចនច័ន្ទ លក្ខិណា ក៏បានបង្ហោះរូបភាពរបស់នាងរ៉ូស នៅក្នុងនោះផងដែរ នៅពេលដែលនាងរ៉ូស កំពុងតែច្រៀងនៅក្នុងការឡាយតាមរយៈបណ្តាញសង្គមហ្វេសប៊ុក កាលពីថ្ងៃទី១១ ខែសីហា ឆ្នាំ២០២០កន្លងទៅនេះ ។
គួរបញ្ជាក់ផងដែរថា នេះជាលើកទី១ហើយ ដែលសមាគមន៍សិល្បៈអ្នកនាងចនច័ន្ទ លក្ខិណា បញ្ចេញអារម្មណ៍ពិតខ្លាំងទៅកាន់តារាស្រីរូបនេះពីព្រោះកន្លងមកនេះកម្រឃើញអ្នកនាងបោះពាក្យសម្តីទៅកាន់អ្នកសិល្បៈដូចគ្នាណាស់ ៕
ចែករំលែកព័តមាននេះ