ប្រទេសរុស្ស៊ី ៖ ប្រធានាធិបតីរុស្ស៊ី លោកវ្ល៉ាឌីមៀរពូទីន អះអាងកាលពីព្រឹកថ្ងៃទី១១សីហាថា រុស្ស៊ីបានផលិតបានមុនគេវ៉ាក់សាំងប្រឆាំងវីរុស COVID-19 ដែលដាក់ឈ្មោះថា SPOUTNIK V ដោយលោកថា វ៉ាក់សាំងនោះនឹងឆ្លងកាត់រាល់ការត្រួតពិនិត្យចាំបាច់នានា ហើយធ្វើការចុះបញ្ជីដាក់ឲ្យប្រើប្រាស់។
លោកពូទីន អះអាងពីប្រសិទ្ធភាពរបស់វ៉ាក់សាំងថា វាអាចផ្ដល់ភាពស៊ាំ ពោលគឺប្រព័ន្ធការពាររាងកាយបានដោយស្ថិតស្ថេរ។ លោករហូតដល់គូសបញ្ជាក់ថា សូម្បីតែកូនស្រីលោកម្នាក់ក៏បានចាក់វ៉ាក់សាំងឈ្មោះ SPOUTNIK V នោះដែលជាឈ្មោះរបស់ផ្កាយរណបសូវៀត ដំបូងគេបញ្ជូនទៅកាន់តារាវិថីដែរ។
ទោះបីយ៉ាងណាសម្រាប់ពេលនេះរុស្ស៊ី នៅមិនទាន់ចេញផ្សាយភស្ដុតាងណាមួយនៅឡើយខណៈដំណាក់កាលទី៣ នៃការសាកល្បងគ្លីនិក ជាដំណាក់កាលចុងក្រោយ ទើបចាប់ផ្ដើមពីថ្ងៃទី១២ ខែសីហា ទៅប៉ុណ្ណោះ។
អង្គការសុខភាពពិភពលោក WHO និងបណ្ដាអ្នកវិទ្យាសាស្ត្រអន្តរជាតិ បានអំពាវនាវឲ្យមានការប្រុងប្រយ័ត្ន។ តាម WHO ថា ដើម្បីឲ្យវ៉ាក់សាំងមួយអាចឲ្យជឿជាក់ ទាល់តែឆ្លងកាត់ឧទាហរណ៍ការវាយតម្លៃរបស់អង្គការពិភពលោកនោះ និងត្រូវឆ្លងកាត់ការសាកល្បង ឲ្យឃើញលទ្ធផលជាក់លាក់សិន។ ដូច្នេះដើម្បី WHO អនុម័ត វ៉ាក់សាំង SPOUTNIK V ត្រូវឆ្លងកាត់ដំណាក់កាល៣ នៃការវាយតម្លៃ ដែលសាកមើលសន្តិសុខនិងប្រសិទ្ធភាព ផលិតផលនោះជាមួយការសាកល្បងគ្លីនិកនានា។
ចាប់តាំងពីសប្ដាហ៍មុនមក WHO បានសម្ដែងការសង្ស័យរបស់ខ្លួន ចំពោះឥរិយាបថរបស់រុស្ស៊ីលើការដាក់ឲ្យប្រើវ៉ាក់សាំងនោះ។ រុស្ស៊ីថា វ៉ាក់សាំងមួយត្រៀមស្ទើររួចរាល់ហើយតែពុំបានរាយការណ៍ប្រាប់ឲ្យ WHO បានដឹង ពីបណ្ដាលទ្ធផលនៃការសិក្សារបស់ខ្លួនលើប្រសិទ្ធភាព នៃផលិតផលនោះ។ ម្យ៉ាងទៀតចាប់តាំងពីពេលនោះមក មន្ទីរពិសោធន៍ដែលទទួលបន្ទុកស្រាវជ្រាវ លើវ៉ាក់សាំងនោះក៏មិនបានចេញផ្សាយអ្វីឲ្យដឹងដែរ។
ដោយពុំមានបណ្ដាទិន្នន័យផ្លូវការ និងក្រោយពេលមិនដល់២ខែផងនៃការសាកល្បងគ្លីនិកលើមនុស្ស អ្នកវិទ្យាសាស្ត្រអង់គ្លេសច្រើនរូប បានសម្ដែងការបារម្ភចំពោះការអះអាងរបស់រុស្ស៊ី។ រួចនៅក្រុងប៊ែរឡាំង ក្រសួងសុខាភិបាលអាល្លឺម៉ង់ ក៏ថ្លែងនាយប់ថ្ងៃទី១១សីហាដែរ ពីការមិនទុកចិត្តចំពោះវ៉ាក់សាំងរុស្ស៊ីនោះ។
ទោះបីជាបណ្ដាអ្នកវិទ្យាសាស្ត្រអង់គ្លេស ឬអាល្លឺម៉ង់សម្ដែងការសង្ស័យ ចំពោះប្រសិទ្ធភាព និងសន្តិសុខរបស់វ៉ាក់សាំងរុស្ស៊ី ដែលប្រកាសដាក់ឲ្យប្រើក្ដី តែរុស្ស៊ីបានសម្តែងការអបអរសាទរ ចំពោះវ៉ាក់សាំងរបស់ខ្លួន ខណៈមន្ទីរពិសោធន៍ជាច្រើនលើពិភពលោក កំពុងតែធ្វើការសាកល្បងគ្លីនិក សម្រាប់វ៉ាក់សាំងរបស់ពួកគេ។ ក្រុមហ៊ុនផលិតវ៉ាក់សាំងទាំងនោះជាច្រើន ក្នុងនោះមាន MODERNA PLIZER និង ASTRAZENECA ជាដើមសង្ឃឹម បង្ហាញប្រសិទ្ធភាព និងសន្តិសុខនៃវ៉ាក់សាំង របស់ពួកគេនាដំណាច់ឆ្នាំនេះ។
គួររំលឹកថា ៖ លោកពូទីន ប្រកាសចុះបញ្ជីវ៉ាក់សាំងប្រឆាំងវីរុស COVID-19 ហើយ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ