ខេត្តបាត់ដំបង ៖ ក្រោយពីពិធីមង្គលការត្រូវបានបញ្ចប់ និងក្រោយពីសាច់ញាតិនិងភ្ញៀវកិត្តិយសជិតឆ្ងាយវិលត្រឡប់ទៅលំនៅឋាន រៀងៗខ្លួនរួចមក គេបានគិតឃើញគ្រប់ៗគ្នាថា គូស្វាមីភរិយាថ្មោងថ្មីដែលទើបរៀបការរួចនេះនឹងបាននែបនិត្យយ៉ាងសុខសាន្តក្នុងរាត្រីទឹកឃ្មុំ ដែលគូស្នេហ៍នេះបានអត់ធ្មត់ និងរង់ចាំយ៉ាងអន្ទះសា អស់រយៈពេល៣ឆ្នាំកន្លងមក។ ប៉ុន្តែផ្ទុយទៅវិញរាត្រីទឹកឃ្មុំបែរជាក្លាយទៅជារាត្រីសោកសៅនិងរន្ធត់ចិត្តក្រៃលែង ដោយសារតែនាងកូនក្រមុំបានធ្វើអត្តឃាត ដោយចង.កសម្លាប់ខ្លួន មុនពេលចូលបន្ទប់ផ្សំដំណេក ធ្វើឱ្យស្វាមីរបស់នាងយំសោកបោកខ្លួនដូចអកព្រាត់គូ ។
ការធ្វើអត្តឃាតរបស់នាង កូនក្រមុំ ដើម្បីគេចខ្លួនពីរាត្រីផ្សំដំណេក ពិតជាបានប្រហារចិត្តប្រុសដែលមានភក្តីភាពចំពោះនាងរហូតមកដែលក្នុងរយៈពេល៣ឆ្នាំកន្លងមក ពួកគេបានថែរក្សាចំណងស្នេហារហូតដល់ថ្ងៃចូលរោងការ។ រឿងរ៉ាវបង្កការប្រេះឆាដល់បេះដូងកូនកំលោះនេះ វាមិនខុសពីបទចម្រៀងលោកមាស ហុកសេង ដែលមានចំណងជើងថា«ស្គាល់តែក្លិនមិនបានខ្លួន»នោះឡើយ ។
លោកក្រឹង រ៉ាមី នាយនគរបាលប៉ុស្តិ៍ស្តីទីឃុំអូរដំបងទី១ បានប្រាប់កោះសន្តិភាពអំពីមូលហេតុគួរឱ្យភ្ញាក់ផ្អើលនេះថា បានកើតឡើងនៅក្រុមទី៦ ភូមិសំរោងកោង ឃុំអូរដំបង១ ស្រុកសង្កែ ហើយនាងបានចង.កសម្លាប់ខ្លួននៅវេលាម៉ោង៩និង៥នាទីយប់ថ្ងៃទី១០ មីនា គឺជារាត្រីដែលនាងនិងស្វាមីត្រូវផ្សំដំណេក ក្រោយពីបញ្ចប់ពិធីមង្គលការរបស់នាងក្នុងរយៈពេល២ថ្ងៃរួចមក ។ លោកមេប៉ុស្តិ៍ស្តីទីរូបនេះបានប្រាប់ទៀតថា កូនក្រមុំឈ្មោះរិទ្ធ សំណាង អាយុ២០ឆ្នាំ និងស្វាមីរបស់នាងដែលទើបរៀបការនេះឈ្មោះសុខ ជា អាយុ២៣ឆ្នាំ ។
ជុំវិញហេតុការណ៍ដ៏សោកសៅនេះ ម្តាយកូនក្រមុំអ្នកស្រីគឿន នី អាយុ៥៤ឆ្នាំ បានរៀបរាប់ប្រាប់សមត្ថកិច្ចថា គាត់បានរៀបចំពិធីមង្គលការឱ្យកូនប្រុស-ស្រីនេះនៅថ្ងៃទី៩ មីនា និងបង្ហើយនៅរសៀលថ្ងៃទី១០ មីនា ។ លុះនៅយប់ផ្សំដំណេក ស្រាប់តែកូនស្រីគាត់ធ្វើអត្តឃាតដោយគ្មានអ្នកណាដឹងពីមូលហេតុពិតប្រាកដឡើយ ។ អ្នកស្រីគឿន នី បានពោលទាំងបង្ហូរទឹកភ្នែកថា នៅក្នុងរាត្រីនោះខណៈដែលនាងកំពុងមើលទូរទស្សន៍ នាងពោលថា ឈឺពោះ ហើយបានប្រាប់ស្វាមីរបស់នាងថា ទៅរកបត់ជើងសិន។ លុះពេលនាងចុះពីផ្ទះទៅបាត់ប្រហែលកន្លះម៉ោងក្រោយមក មិនឃើញនាងត្រឡប់មកវិញ ទាំងប្តីរបស់នាងនិងរូបគាត់មានការសង្ស័យ ក៏នាំគ្នាឆ្លុះពិលតាមរកនាង ហើយស្រែកហៅក៏មិនឮឆ្លើយ។ លុះបញ្ចាំងពិលចុះឡើងស្រាប់តែឃើញនាងចង.កធ្លាក់ស្តោកនៅក្រោមដើមស្វាយក្បែរផ្ទះស្លាប់បាត់ទៅហើយក៏មានការភ្ញាក់ផ្អើលតែម្តង។ ក្នុងទិដ្ឋភាពដ៏គួរឱ្យខ្លោចផ្សានេះ គេឮសម្លេងស្រែកយំសោកគ្រប់ៗគ្នាពីក្រុមគ្រួសារ និងសាច់ញាតិ ពិសេសស្វាមីថ្មីថ្មោងរបស់នាងដែលយំបោកខ្លួនដូចអកស្តាយស្រណោះប្រពន្ធជាទីស្រឡាញ់ ដែលនាងបានលាចាកលោកក្នុងរាត្រីផ្សំដំណេកដោយគ្មានហេតុផលទាល់តែសោះ ។
លាយឡំនឹងទឹកភ្នែកជោកជាំមិនឈប់ឈរនាព្រឹកថ្ងៃទី១១ មីនា កូនកំលោះអភ័ព្វ សុខ ជា បាននិយាយពីដំណើររឿងខ្លះៗរវាងរូបគេនិងនាងសំណាងថា ខ្លួនគ្រាន់តែដឹងថា នាងមានសុខភាពមិនល្អ ចាប់តាំងពីមុនពេលចូលរោងការប៉ុន្មានថ្ងៃមកម៉្លេះ។ នៅយប់កើតហេតុខណៈពេលកំពុងមើលទូរទស្សន៍ជុំគ្នា នាងគ្រាន់តែប្រាប់ខ្លួនថា ឈឺពោះ ហើយសុំទៅបត់ជើងខាងក្រៅផ្ទះ ។ សុខ ជា បានរៀបរាប់ទៀតថា ខ្លួនគ្រាន់តែឮសូរសម្លេងប្រពន្ធកាប់ដីមួយចបប៉ុណ្ណោះ ហើយក៏ស្ងាត់ទៅ ។ ដោយមិនឃើញប្រពន្ធឡើងមកលើផ្ទះវិញ ខ្លួនសង្ស័យក៏ចុះទៅស្រែកហៅតែមិនឮនាងឆ្លើយទើបមានការភ្ញាក់ផ្អើល ហើយក៏នាំគ្នាបញ្ចាំងពិលដើររក ស្រាប់តែឃើញនាងចង.កស្លាប់ក្រោមដើមស្វាយទៅហើយ ។
សុខ ជា ជូតទឹកភ្នែក ហើយពោលថា រូបគេនិងនាងស្រឡាញ់គ្នាប្រហែល៣ឆ្នាំកន្លងមកហើយ ព្រមទាំងបានភ្ជាប់ពាក្យរយៈពេល១ឆ្នាំមកហើយដែរ ទើបឈានដល់ថ្ងៃចូលរោងការ។ លុះនៅយប់ផ្សំដំណេកស្រាប់តែនាងចង.កសម្លាប់ខ្លួនចោលរូបគេទៅវិញ ។ យុវជននេះបានបញ្ជាក់ថា រូបគេនិងនាងស្រឡាញ់គ្នាណាស់ មិនធ្លាប់ល្អក់កករម្តងណាទេ ។
ទាក់ទិននឹងសាវតាររបស់នាងរិទ្ធ សំណាង សាច់ញាតិនិងអ្នកភូមិស្ទើរគ្រប់គ្នាសុទ្ធតែពោលសរសើរថា នាងជាមនុស្សសុភាពរាបសា មិនចេះដើរលេងរហេតរហូត ហើយក៏គេមិនដែលឃើញនាងមានទំនាក់ទំនងស្នេហាជាមួយបុរសផ្សេងណាក្រៅពីយុវជនសុខ ជា នេះដែរ ។ ប៉ុន្តែម្តាយរបស់នាងអ្នកស្រីគឿន នី បានបញ្ជាក់ថា មុនពេលចូលរោងការមួយសប្តាហ៍គ្រូទាយបានទាយថា កូនស្រីគាត់មានគ្រោះ ហើយអ្នកស្រីបានឱ្យគ្រូស្រោចទឹកដើម្បីរំដោះគ្រោះនេះរួចរាល់ផងដែរ ។ អ្នកស្រីបានបញ្ជាក់បន្ថែមថា ក្រៅពីនេះកូនស្រីគាត់មានជំងឺគ្រុនពោះវៀន ហើយនៅពេលនាងកំពុងទទួលភ្ញៀវគាត់បានឱ្យគ្រូពេទ្យចាក់ថ្នាំ ព្រោះខ្លាចជំងឺនេះធ្វើទុក្ខ ។ ប៉ុន្តែអ្នកស្រីមិនបានដឹងរឿងលើសពីនេះដែលនាំឱ្យកូនស្រីធ្វើអត្តឃាតដូច្នេះទេ ។ សពរបស់នាងត្រូវបានសមត្ថកិច្ចពិនិត្យយ៉ាងយកចិត្តទុកដាក់បំផុត មុនពេលធ្វើកំណត់ហេតុប្រគល់ឱ្យក្រុមគ្រួសារយកធ្វើបុណ្យតាមប្រពៃណី ។ អ្វីដែលគេនឹកស្មានមិនដល់នោះគឺ ការសម្លាប់ខ្លួនដោយគ្មានមូលហេតុ ៕
ចែករំលែកព័តមាននេះ