ខេត្តបាត់ដំបង៖ កសិករដែលមានគោចិញ្ចឹមច្រើនកំពុងរីកសួតប្រម៉ាត់ ដោយសារតែបច្ចុប្បន្ន សត្វគោមានទីផ្សារល្អ ខណៈឈ្មួញនានាបានសំរុកដើររកទិញស្ទើរគ្រប់ទិសទី រហូតមានឈ្មួញខ្លះដើរសួររកទិញគោដល់កន្លែងឃ្វាលតែម្ដង។ នេះបើតាមការការអះអាងរបស់ម្ចាស់គោ ដែលបានបញ្ជាក់ប្រាប់កោះសន្តិភាព កាលពីសប្ដាហ៍មុន។ កសិករឈ្មោះធួន…
ខេត្តបាត់ដំបង៖ កសិករដែលមានគោចិញ្ចឹមច្រើនកំពុងរីកសួតប្រម៉ាត់ ដោយសារតែបច្ចុប្បន្ន សត្វគោមានទីផ្សារល្អ ខណៈឈ្មួញនានាបានសំរុកដើររកទិញស្ទើរគ្រប់ទិសទី រហូតមានឈ្មួញខ្លះដើរសួររកទិញគោដល់កន្លែងឃ្វាលតែម្ដង។ នេះបើតាមការការអះអាងរបស់ម្ចាស់គោ ដែលបានបញ្ជាក់ប្រាប់កោះសន្តិភាព កាលពីសប្ដាហ៍មុន។
កសិករឈ្មោះធួន ធៀប រស់នៅភូមិតាង៉ែន ឃុំតាគ្រាម ស្រុកបាណន់ បានថ្លែងប្រាប់កោះសន្តិភាពថា បច្ចុប្បន្នសត្វគោ មានទីផ្សារល្អជាងពេលណាៗទាំងអស់ បើមានអ្នកចិញ្ចឹមគោច្រើន ពិតជាត្រូវប៉ាន់ហើយ។ គាត់និយាយទៀតថា ឈ្មួញដើររកទិញគោខ្វាត់ខ្វែងសម្បើមណាស់ ហើយឈ្មួញខ្លះដើរសួររកទិញគោដល់កន្លែងឃ្វាល មិនថានៅក្នុងព្រៃ ឬ នៅតាមវាល ដែលមានសំបូរហ្វូងគោច្រើននោះទេ។ ប៉ុន្តែតំលៃមើលជាក់ស្ដែង តាមប្រភេទគោធាត់ឬស្គម តែមិនរើសល្អឬអាក្រក់ឡើយ។
ជួបជាមួយកោះសន្តិភាព ពេលគាត់កំពុងដេញគោទាំងហ្វូងយកទៅឃ្វាលនៅក្នុងអាងកំពីងពួយ (តំបន់ទេសចរណ៍) បុរសវ័យ៦៥ឆ្នាំរូបនេះបានបញ្ជាក់យ៉ាងដូច្នេះថា « ប៉ុន្មានថ្ងៃមុននេះ ខ្ញុំបានលក់គោអស់ប៉ុន្មានក្បាលដែរ ក្នុងតំលៃខ្ពស់គួរសម ដែលខ្ញុំមិនធ្លាប់លក់បានតំលៃខ្ពស់អីចឹងទេឆ្នាំមុនៗ»។ ជាមួយនឹងកាយវិការផង លោក ធួន ធៀប បានប្រាប់ថា «រាល់ថ្ងៃឈ្មួញមកសួររកទិញគោខ្ញុំ ញឹកញ៉ាប់ដែរ គឺតាមសួរដល់កន្លែងខ្ញុំឃ្វាលតែម្ដង តែគោខ្ញុំនៅតួចៗពេក ព្រោះអាធំៗលក់អស់ហើយ»។
គេប្រទះឃើញហ្វូងគោរាប់រយក្បាល ដែលត្រូវអ្នកភូមិដេញយកទៅឃ្វាលនៅវាលស្មៅដ៏ធំល្វឹងល្វើយ នៅប៉ែកខាងត្បូង នៃតំបន់ទេសចរណ៏«អាងកំពីងពួយ» ដែលស្ថិតនៅក្នុងឃុំតាគ្រាម ស្រុកបាណន់។ អ្នកកង្វាលគោទាំងនោះ បានប្រាប់ថា «ហ្វូងគោរាប់រយក្បាលពាសពេញវាលស្មៅទាំងនោះ គឺមានម្ចាស់ផ្សេងៗគ្នា នៅភូមិ ឃុំ ផ្សេងៗគ្នា តែបានដេញយកមកឃ្វាលនៅទីនេះជុំគ្នា ព្រោះទីនេះសំបូរស្មៅ ហើយមិនប៉ះពាល់ផលដំណាំគេ»។ ពួកគេនិយាយថា ស្ទើររាល់ថ្ងៃ ឈ្មួញតែងជិះម៉ូតូខ្វាត់ខ្វែង ស្វែងសួររកទិញគោដល់កន្លែងឃ្វាល។ មិនថាគោប្រភេទណា តូចឬធំ ធាត់ឬស្គម នោះទេ ឲ្យតែម្ចាស់ថាលក់គឺឈ្មួញតថ្លៃទិញយកភ្លាមៗតែម្ដង។
ឈ្មួញទិញគោម្នាក់ បានប្រាប់កោះសន្តិភាពតាមទូរស័ព្ទថា សព្វថ្ងៃនេះសត្វគោពិតជាមានទីផ្សារល្អមែន។ គាត់និយាយថា ម្ចាស់គោមិនចាំស្វែងរកអ្នកទិញ ឬ អំពាវនាវយូរថ្ងៃទេ គឺនៅកន្លែងណាក៏មានអ្នកចាំទិញដែរ ឲ្យតែម្ចាស់ថា លក់គឺឈ្មួញទៅដល់ភ្លាមៗតែម្ដង។ ឈ្មួញគោរូបនេះ បានបញ្ជាក់ថា គោដែលត្រូវទិញមាន២ប្រភេទ គឺ គោសម្រាប់កាប់សាច់លក់ និង គោសម្រាប់នាំចេញទៅវៀតណាម។ គោដែលទិញកាប់សាច់លក់ គឺគោធាត់មានសាច់ច្រើន រីឯគោសម្រាប់នាំចេញគឺគោចម្រុះ។
អ្នកទិញគោបានពន្យល់ថា «ចំពោះគោដែលទិញសម្រាប់នាំចេញ បើគោនោះស្គម គឺយើងមើលថែបំប៉នវាឲ្យមានសាច់ល្អបន្តិចសិន ទើបលក់ចេញបានថ្លៃ។ ប៉ុន្តែបើគោនោះទិញមកមានសាច់ល្អ មិនចាំបាច់ថែបំប៉នទេ គឺ រៀបចំដឹកទៅកាន់វៀតណាមតែម្ដង»។ គាត់បានបញ្ជាក់បន្ថែមថា សព្វថ្ងៃនេះ ប្រជាកសិករដែលមានដីធំទូលាយល្អ គឺពួកគេកំពុងសំរុកទិញគោយកទៅចិញ្ចឹមសម្បើមណាស់ស្ទើរគ្រប់ទីកន្លែង។ ព្រោះមានទីផ្សារល្អ ទាំងគោនាំចេញ ទាំងគោសម្រាប់កាប់សាច់លក់។
ប៉ុន្តែយ៉ាងនេះក្ដី បើតាមអ្នកចិញ្ចឹមគោខ្លះបាននិយាយថា ពិតមែនតែតំលៃគោបច្ចុប្បន្នហាក់មានសន្ទុះខ្លាំង តែអ្នកចិញ្ចឹមគោមួយចំនួនក៏កំពុងប្រឈមនឹងទីតាំងចិញ្ចឹមខ្លះៗដែរ។ លោក ប៊ុនរិទ្ធ អ្នកចិញ្ចឹមគោម្នាក់ បាននិយាយថា សព្វថ្ងៃនេះ អ្នកមានគោច្រើនត្រូវប្រឈមនឹងទីតាំងចិញ្ចឹម។ ប៉ុន្តែបើគេមានដីចំការ ឬ ដីវាលធំៗមិនអីទេ តែសម្រាប់អ្នកចិញ្ចឹមគោច្រើន ហើយមានដីតូចៗអាចជួបការលំបាក។
គាត់បានលើកឡើងថា អ្នកចិញ្ចឹមគោត្រូវមានទីតាំងធំទូលាយ មានដីសម្រាប់ដាំស្មៅឲ្យគោស៊ី និង មានប្រព័ន្ធទឹកសម្រាប់ប្រើប្រាសផងដែរ បើមិនដូច្នេះទេអ្នកចិញ្ចឹមគោច្រើនអាចនឹងជួបការលំបាកខ្លាំងណាស់។ ព្រោះបើប្រលេងឲ្យស៊ីតាមវាលផ្ដេសផ្ដាស់វាអាចប៉ះពាល់ផលដំណាំគេ។ នេះជាបញ្ហាដែលអ្នកចិញ្ចឹមគោច្រើនត្រូវប្រឈម ព្រោះសព្វថ្ងៃនេះដីចង្អៀតខ្លាំងណាស់។ ដូច្នេះមានតែចញ្ចឹមលើដីខ្លួនឯងទេទើបល្អ៕
ចែករំលែកព័តមាននេះ