រាជធានីភ្នំពេញ ៖ ក្រសួងសុខាភិបាលបានបញ្ជាក់ នៅថ្ងៃទី១១ សីហា ឆ្នាំ២០២០នេះថា ពិតជាមានករណីលាប់ជំងឺកូវីដ១៩ម្នាក់នៅក្នុងខេត្តត្បូងឃ្មុំពិតមែន ហើយអ្នកប៉ះពាល់ដោយផ្ទាល់និងប្រយោលជាមួយបុរសលាប់ឡើងវិញនេះ មានចំនួនជាង៤០នាក់ ត្រូវបាននាំយកទៅធ្វើចត្តាឡីស័ក្ត ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឱ្យ
ដឹងថា «វាពិតជាមានករណីលាប់នេះពិតមែន ដោយឡែកការលាប់នេះមិនមែនមានតែប្រទេសកម្ពុជានោះទេ ប្រទេសជាច្រើនក៏បានមានករណីនេះដែរ ។
សូមជម្រាបជូនផងដែរថា កន្លងមក ក្រសួងបានចេញសេចក្តីរាយការណ៍ម្តងហើយពីករណីលាប់នេះ ប៉ុន្តែមានបងប្អូនសារព័ត៌មានខ្លះគាត់យកទៅបូកថែម ដូចនេះវាធ្វើឱ្យតួរលេខកើតឡើង ដូចនេះខាងក្រសួងមិនបានចេញសេចក្តីប្រកាស និងក្រសួង បានធ្វើតែករណីវិជ្ជមាន អវិជ្ជមាន និងករណីជាសះស្បើយប៉ុណ្ណោះ»។
លោកស្រីបន្ថែមថា បើងាកទៅមើលខាងពិភពលោកវិញ ក្នុងករណីលាប់នេះ ក៏គេមិនបានរៀបរាប់សេចក្តីរាយការណ៍នោះដែរ គឺគេនិយាយតែអំពីករណីថ្មី (ឈឺថ្មី) ករណីជាសះស្បើយ និងករណីស្លាប់ ។ លោកស្រី ឱ វណ្ណឌីន បានបន្តថា «គេមិនរាប់ករណីលាប់នេះ ដោយសារគេចៀសវាងការភាន់ច្រឡំនេះឯង ដែលវាអាចធ្វើឱ្យមានការច្របូកច្របល់ ទៅលើបញ្ហាតួលេខនៃចំនួន អ្នកដែលរកឃើញថ្មីពិតប្រាកដ និងចំនួនដែលព្យាបាល ។ ដូចនេះ ខ្ញុំសូមជំរាបជូនថា ហេតុអ្វីបានជាក្រសួងមិនបានជូនព័ត៌មាន
នេះ»។
លោកស្រីបន្ថែមថា លោកស្រីធ្លាប់បានពន្យល់ហើយថា អ្នកដែលគាត់លាប់នេះ បន្ទាប់បានធ្វើតេស្ត២ដង ក្រោយការព្យាបាលជាសះស្បើយ ដូចនេះគេចាត់ថា គាត់បានជាសះស្បើយ និងអនុញ្ញាតឱ្យគាត់ត្រឡប់ទៅផ្ទះវិញ។ ប៉ុន្តែកាលដែលអនុញ្ញាតឱ្យត្រឡប់ទៅនេះ ក៏យើងមិនអនុញ្ញាតឱ្យគាត់ដើរហើរ ទៅណាផ្តេសផ្តាស់ដែរ មានន័យថា ក្រុមគ្រូពេទ្យមានការណែនាំដល់ពួកគាត់ឱ្យបន្តដាក់ខ្លួនឯង ឱ្យនៅដាច់ដោយឡែកពីគេ១៤ ថ្ងៃបន្ថែមទៀត ៕
ចែករំលែកព័តមាននេះ