ហាណូយ ៖ ក្រសួងសុខាភិបាលវៀតណាមបានរាយការណ៍អំពីការឆ្លងមេរោគកូវីដ-១៩ ថ្មីចំនួន៦ករណីទៀត និងមានអ្នកស្លាប់២នាក់បន្ថែម នៅថ្ងៃទី១០ សីហានេះ ដែលធ្វើឲ្យចំនួនសរុបនៅក្នុងប្រទេសកើនដល់ ៨៤៧ករណី និងមានអ្នកស្លាប់ ១៣នាក់ ។
ភាគច្រើននៃករណីឆ្លងថ្មី រួមទាំងក្មេងប្រុសអាយុ៨ឆ្នាំផង ត្រូវបានផ្សារភ្ជាប់ទៅនឹងទីក្រុងដាណាង ស្ថិតនៅភាគកណ្តាលប្រទេស ដែលការផ្ទុះឡើងរលកថ្មី បានចាប់ផ្តើមកាលពីថ្ងៃទី ២៥ ខែកក្កដា ។
ក្រសួងសុខាភិបាលវៀតណាម អោយដឹងថា មនុស្សជាង ១៨២.០០០នាក់ កំពុងដាក់ឲ្យនៅដាច់ដោយឡែកពីគ្នា ក្នុងប្រទេស រួមមាន ៥,១៣៩នាក់ នៅមន្ទីរពេទ្យ និង ២៨.៤០៨នាក់នៅមជ្ឈមណ្ឌលចត្តាឡីស័ក នៅសល់ប៉ុន្មានគឺនៅផ្ទះ ។
កាលពីថ្ងៃសុក្រ លោកនាយករដ្ឋមន្ត្រី បានព្រមានថា ហានិភ័យនៃការឆ្លងរីករាលដាលជំងឺកូវីដ-១៩ នៅក្នុងប្រទេសវៀតណាម គឺនៅ“ខ្ពស់”នៅឡើយ ។
លោកបានមានប្រសាសន៍ថា “ហានិភ័យ នៃការចម្លងក្នុងសហគមន៍ គឺខ្ពស់ណាស់ ដែលទាមទារឲ្យមានការប្តេជ្ញាចិត្ត សាមគ្គីភាព និងទំនួលខុសត្រូវបន្ថែមទៀត ទាំងអស់គ្នាត្រូវមានវិធានការរឹងមាំជាងនេះទៀត ក្នុងរយៈពេល២សប្តាហ៍ខាងមុខនេះ” ៕
ចែករំលែកព័តមាននេះ