រាជធានីភ្នំពេញ ៖ ចាប់តាំងពីដើមឆ្នាំ ២០២០ មកទីផ្សារខុនដូរ ទាំងតម្លៃនិងសកម្មភាពទិញ-លក់ហាក់មានការថមថយបន្តិច ដោយសារតែកត្តាមួយចំនួនរួមទាំងបញ្ហាកូវីដ ១៩ ផងដែរ ។ ក៏ប៉ុន្តែនៅរយៈពេលចុងក្រោយនេះ ទីផ្សារខុនដូ ហាក់មានសញ្ញាវិជ្ជមានឡើងវិញបន្តិច ទាំងសកម្មភាពទិញ-លក់និងតម្លៃ ។
បើតាមលោកយ៉ង់ វិចិត្រ ប្រធានផ្នែកប្រតិបត្តិនៃក្រុមហ៊ុន Spring CJW Development អភិវឌ្ឍន៍ខុនដូ Axis បាននិយាយថា ចាប់តាំងពីឆ្នាំ ២០២០មកទីផ្សារខុនដូ នៅកម្ពុជាហាក់មានការថមថយចុះ ដោយសារតែអំឡុងពេលនោះ បណ្ដាប្រទេសជាច្រើនជួបប្រទះនឹងវិបត្តិជំងឺកូវីដ១៩ ហើយជនបរទេសដែលជាអ្នកវិនិយោគនិងបេសកកម្មការងារនានាក៏ត្រូវបានផ្អាក និងបន្ថយសកម្មភាព ហើយដោយសារតែទីផ្សារខុនដូ កន្លងមកគឺផ្ដោតលើជនបរទេស ដូច្នេះហើយនៅពេលជនបរទេសថយទីផ្សារក៏រាងថយបន្តិច ។
លោកបន្តថា សម្រាប់រយៈពេលថ្មីៗកន្លងទៅនេះ ទីផ្សារខុនដូក៏ហាក់មានកំណើនបន្តិចឡើងវិញ ហើយអ្នកដែលទិញខុនដូ នៅកម្ពុជានាពេលនេះក៏បានផ្លាស់ពីជនបរទេសភាគច្រើន មកជាជនជាតិខ្មែរ ឬហៅ Local Market កាន់តែច្រើនផងដែរ ។
លោកបានបន្តថា « កាលពីមុនអ្នកទិញខុនដូ នៅកម្ពុជាភាគច្រើនជាជនបរទេស តែរយៈពេលប៉ុន្មានឆ្នាំចុងក្រោយនេះ ជនជាតិខ្មែរទិញខុនដូមានកំណើនឡើង ជាពិសេសយុវវ័យសម័យថ្មី និងអ្នកដែលបញ្ចប់ការសិក្សានៅក្រៅប្រទេសទើបត្រលប់មកប្រទេសកម្ពុជាវិញ » ។
លោកបន្ថែមថា ដោយមើលពីនិន្នាការនៃការកើនឡើងវិញនៃទីផ្សារខុនដូនៅកម្ពុជា លោកសង្ឃឹមថានៅចុងឆ្នាំនេះ វិស័យខុនដូ នឹងទទួលបានកំណើនឡើងវិញ ទាំងសកម្មភាពការលក់និងតម្រូវការ ហើយក៏សង្ឃឹមថាវិនិយោគិនបរទេសនឹងត្រលប់មកកម្ពុជាដើម្បីស្វែងរកការវិនិយោគនៅកម្ពុជាក្នុងវិស័យខុនដូ ។
លោកស្រី អាន់ សុធីតា អគ្គនាយិកាក្រុមហ៊ុន CBRE ប្រចាំកម្ពុជាបានអោយដឹងថា គិតត្រឹមឆមាសទី១ឆ្នាំ ២០២០ នេះ កម្ពុជាមានខុនដូសរុបប្រមាណ២ម៉ឺនយូនីត ក្នុងនោះបានអភិវឌ្ឍន៍សាងសង់រួចរាល់ចំនួនជាង៦០គម្រោង និងកំពុងទទួលបានការគាំទ្រពីធនាគារ ក្នុងការផ្ដល់ឥណទានសម្រាប់វិនិយោគផងដែរ ។ ដោយឡែកសម្រាប់គម្រោងខុនដូ ដែលកំពុងសាងសង់ មិនសូវមានការគាំទ្រហិរញ្ញវត្ថុដើម្បីវិនិយោគពីសំណាក់ធនាគារឡើយ ។
លោកស្រីបានបន្តថា «វិនិយោគិនខ្លះបានយកលុយពីធនាគារ មកទិញខុនដូ រួចហើយក៏បានដាក់ជួលខុនដូនោះទៅជនបរទេស ឬវិនិយោគិនដទៃទៀត ដើម្បីបានប្រាក់ចំណេញមកវិញ ក៏ប៉ុន្តែនៅពេលមានការធ្លាក់ចុះចំនួនជនបរទេសនៅក្នុងប្រទេសកម្ពុជា ខាងធនាគារក៏គេមើលដែរ បើសិនជាគ្មានអ្នកជួលទេពួកគេពិបាកនឹងផ្ដល់ឥណទានទៅវិនិយោគិន ដើម្បីយកលុយទាំងនោះទៅវិនិយោគជាមួយនឹងខុនដូហ្នឹងណា» ។
លោកស្រីបន្តថា បច្ចុប្បន្ននេះចំនួនអ្នកទិញខុនដូ នៅកម្ពុជាជាជនបរទេសមានការថយចុះនិងជំនួសមកវិញដោយជនជាតិខ្មែរ និងទីផ្សារក្នុងស្រុក ដោយសារតែផ្នត់គំនិតរបស់ជនជាតិខ្មែរ ដែលចង់រស់នៅក្នុងខុនដូកាន់តែកើនឡើងពីមួយឆ្នាំទៅមួយឆ្នាំ ហើយវាក៏មិនចំឡែកដែរ ដែលអ្នករស់នៅក្នុងខុនដូគឺជាប្រជាជនក្នុងស្រុក ព្រោះថានៅបណ្ដាប្រទេសជាច្រើន ជាពិសេសប្រទេសជិតខាងកម្ពុជា មានបទពិសោធន៍រួចហើយ ដោយពីមុនអ្នករស់នៅក្នុងខុនដូជាជនបរទេសតែក្រោយមកក៏ជាជនជាតិខ្លួនវិញ ។
ជាការកត់សម្គាល់ ការវិនិយោគអគារខុនដូ នៅកម្ពុជានៅតែមានសកម្មភាពជាហូរហែទោះកម្ពុជានិងពិភពលោកជួបនឹងវិបត្តិកូវីដ១៩ ដោយក្នុងនោះ មានទាំងវិនិយោគិនក្នុងស្រុកនិងបរទេស ។ ការវិនិយោគទៅលើខុនដូ គឺផ្ដោតសំខាន់ទៅលើទីតាំង និងការរចនាខាងក្នុងខុនដូដែលគេហៅថា Facilities ៕
ចែករំលែកព័តមាននេះ