រាជធានីភ្នំពេញ ៖ លោកនាយឧត្តមសេនីយ៍ នេត សាវឿន ត្រូវបានគណៈកម្មាធិការប្រតិបត្តិសម្រេចជ្រើសរើសធ្វើជាប្រធានសហព័ន្ធកីឡាបាល់ទះកម្ពុជាអាណត្តិថ្មីទី៤ ឆ្នាំ២០១១-២០១៥ ។ ការបោះឆ្នោតជ្រើសរើសគណៈកម្មាធិការប្រតិបត្តិសហព័ន្ធកីឡាបាល់ទះអាណត្តិថ្មី ដែលបានធ្វើឡើងកាលពីពេលថ្មីៗកន្លងមកនេះ ក្នុងចំណោមបេក្ខជនឈរឈ្មោះចំនួន១៧រូប មានតែ១៣រូបប៉ុណ្ណោះដែលត្រូវបានគណៈកម្មាធិការរៀបចំការបោះឆ្នោតសម្រេចជ្រើសរើសយកជាផ្លូវការសម្រាប់បម្រើការងារនៅក្នុងសហព័ន្ធអាណត្តិថ្មីជាបន្តទៀត ។
តាមរបាយការណ៍របស់គណៈកម្មាធិការរៀបចំការបោះឆ្នោតបានឱ្យដឹងថា បេក្ខជនទាំង១៧រូប ដែលបានឈរឈ្មោះរកសំឡេងគាំទ្រមាន ១-លោកបណ្ឌិតជា ចំរើន ២-លោកនាយឧត្តមសេនីយ៍ នេត សាវឿន ៣-លោកឡាក់ សំអាត ៤-លោកវេជ្ជបណ្ឌិត សំ សោភាន់ ៥-លោកឧត្តមសេនីយ៍ តែម ម៉ឺន ៦-លោកព្រុំ ប៊ុណ្ណយី ៧-លោកឧត្តមសេនីយ៍ វុធ ផល្លី ៨-លោកឧត្តមសេនីយ៍ យ៉េត រ៉ាហ្ស៉ាន់ ៩-លោកឧត្តមសេនីយ៍ ស ថេត ១០-លោកវេជ្ជបណ្ឌិត ឆឹង យ៉ៅយ៉េន ១១-លោកធៀប គឹមសាន ១២-លោកកៅ យ៉ាន់ ១៣-លោកសុខ សារុំ ១៤-លោកបឹង គឹមតោ ១៥-លោកម៉ាង វិបុល ១៦-លោកញ៉ែម ជិនឌី និង១៧-លោកអុំ វ៉ាន់នី។
ក្នុងចំណោមបេក្ខជនទាំង១៧រូបនេះ មានតែ៤រូបប៉ុណ្ណោះទទួលបានសំឡេងគាំទ្រតិចជាងគេ ដែលមានអ្នកចូលរួមបោះឆ្នោតចំនួន៤២នាក់ គឺលោកធៀម គឹមសាន បាន៩សំឡេង លោកសុខ សារុំ ទទួលបាន១០សំឡេង លោកព្រុំ ប៊ុណ្ណយី ទទួលបាន៥សំឡេង និងលោកអុំ វ៉ាន់នី ទទួលបាន៣សំឡេង ។ ក្នុងចំណោមសមាជិកទាំង១៣រូប ដែលបានក្លាយជាសមាជិកពេញសិទ្ធិ ទើបតែធ្វើការប្រជុំជាសម្ងាត់រកប្រធាន អនុប្រធាន អគ្គលេខាធិការ និងអគ្គហិរញ្ញិក ។ ក្រៅពីលោកនាយឧត្តមសេនីយ៍ នេត សាវឿន ជាប្រធាន នៅមានអនុប្រធាន៤រូបទៀត គឺលោកឡាក់ សំអាត លោកជា ចំរើន លោកឧត្តមសេនីយ៍ វុធ ផល្លី និងលោកវេជ្ជបណ្ឌិត សំ សោភាន់ ។ ដោយឡែក លោកឧត្តមសេនីយ៍ វុធ ផល្លី ក៏ត្រូវបានតែងតាំងជាអគ្គហិរញ្ញិកផងដែរ ៕
ចែករំលែកព័តមាននេះ