ខេត្តរតនគិរី ៖ ប្រជាពលរដ្ឋប្រមាណជាង៥០នាក់បានមកប្រមូលផ្តុំគ្នាមុខសាលាដំបូងខេត្តនាព្រឹកថ្ងៃទី២២ មីនា ដើម្បីចូលខ្លួនមកបំភ្លឺជួសមុខឱ្យប្រជាពលរដ្ឋចំនួន១០៨គ្រួសារ ដែលរស់នៅក្នុងភូមិប៉ាអរ ឃុំកិះចុង ស្រុកបកែវ លើករណីបណ្តឹងតវ៉ាទាមទារយុត្តិធម៌ដែលប្រជាពលរដ្ឋក្នុងភូមិផ្សេង គឺភូមិល្ហន់ ឃុំកិះចុង ស្រុកបកែវ បានយកដីសហគមន៍ភូមិរបស់ពួកគាត់ទៅលក់ឱ្យឈ្មោះលី គឹមឡេង រស់នៅក្រុងបានលុង កាលពីអំឡុងឆ្នាំ២០០៧។
តំណាងប្រជាពលរដ្ឋភូមិប៉ាអរម្នាក់ក្នុងចំណោមប្រជាពលរដ្ឋទាំង៥០នាក់នៅមុខសាលាដំបូងខេត្តរតនគិរីបានឱ្យដឹងនៅព្រឹកថ្ងៃទី២៣ មីនា ថា ពួកគាត់មានដីសហគមន៍ភូមិប៉ាអរចំនួន១៤២ហិកតា ហើយមានជនមួយក្តាប់តូចក្នុងភូមិរបស់ពួកគាត់បានលួចឃុបឃិតគ្នាជាមួយប្រជាពលរដ្ឋភូមិល្ហន់រួមទាំងមានហត្ថលេខាលោករចំឡាំ ជាមេឃុំកិះចុង បានលក់ដីនោះទៅឱ្យឈ្មោះលី គឹមឡេង តាំងពីឆ្នាំ២០០៧ ដោយពុំមានការដឹងឮពីប្រជាជនក្នុងសហគមន៍ប៉ាអរឡើយ ។ ប៉ុន្តែលុះក្រោយពីមានការឃុបឃិតផ្ទេរដីនោះទៅឱ្យឈ្មោះលី គឹមឡេង នោះរួចមក ស្រាប់តែមានសកម្មភាពដឹកជញ្ជូនគ្រឿងចក្រ និងកម្មកររួមទាំងកាំបិតពូថៅមកកាប់ឆ្ការនៅលើផ្ទៃដីរបស់ពួកគាត់ដែលមានដំណាំកសិកម្មជាច្រើន ដូចជាស្វាយចន្ទី សណ្តែក ពោត ដែលពួកគាត់ធ្លាប់បង្កបង្កើនផលតាំងពីក្រោយថ្ងៃរំដោះ៧មករា មកនោះ ទើបពួកគាត់មានការភ្ញាក់ផ្អើល ហើយក៏មានការរារាំងតវ៉ាហាមឃាត់មិនឱ្យមានការឈូសឆាយរហូតឈានដល់មានការដាក់ពាក្យបណ្តឹង ដល់សាលាដំបូងខេត្ត ។
តំណាងប្រជាពលរដ្ឋរូបនោះបានបន្តទៀតថា ពួកគាត់មិននឹកស្មានថា អស់លោកមេឃុំដែលពួកគាត់ខំបោះឆ្នោតឱ្យនោះបែរជាមានការឃុបឃិតលួចលក់ដីរបស់ពួកគាត់នោះទ ហើយថែមទាំងបានចោទប្រកាន់ពួកគាត់ថា បានទទួលប្រាក់ពីអ្នកទិញនោះទៀតផង ។ អ្នកតវ៉ាបាននិយាយថា ពួកគាត់រស់នៅក្នុងភូមិប៉ាអរពុំដែលបានទទួលប្រាក់នោះទេ គឺប្រជាពលរដ្ឋក្នុងភូមិល្ហន់ឯណោះទេជាអ្នកទទួលប្រាក់ពីអ្នកទិញហើយបែរជាមកយកដីនៅក្នុងសហគមន៍ភូមិរបស់គាត់ទៅវិញ ។ ចាប់តាំងពីពួកគាត់ដាក់ពាក្យបណ្តឹងនោះមក តុលាការឬអាជ្ញាធរពុំដែលមានដំណោះស្រាយណាមួយ ដើម្បីផ្តល់ភាពយុតិ្តធម៌ដល់ពួកគាត់ឡើយ ។ លុះមកដល់ថ្ងៃទី២២ មីនា បានត្រូវតុលាការកោះអញ្ជើញពួកគាត់មកបំភ្លឺ និងធ្វើការជំនុំជំរះដោយមានភាគីទាំងសងខាងចូលរួម ថែមទាំងបង្ខំឱ្យពួកគាត់ផ្តិតមេដៃទទួលស្គាល់យល់ព្រមថា ពួកគាត់ពិតជាបានលក់ដីនោះទៅឱ្យឈ្មោះលី គឹមឡេងនោះពិតប្រាកដមែនទៀតផង ។ ប៉ុន្តែពួកគាត់មិនបានផ្តិតមេដៃយល់ព្រមនោះទេ ហើយតុលាការបន្តធ្វើការដោះស្រាយនៅព្រឹកថ្ងៃទី២៣ មីនា ទៀត ។
ប្រភពមួយទៀតពីមន្ត្រីតុលាការបានឱ្យដឹងថា ដីចំនួន១៤២ហិកតាស្ថិតនៅភូមិប៉ាអរពិតមែន ប៉ុន្តែប្រជាពលរដ្ឋរស់នៅភូមិល្ហន់ជាអ្នកកាន់កាប់ ដោយសារមានការសុំ ឬខ្ចីមកបង្កបង្កើនផលតាំងពីយូរឆ្នាំមកហើយ ហើយម្ចាស់គេត្រូវការលក់បែរជាអ្នកភូមិប៉ាអរនេះមិនយល់ព្រម គឺតាមទម្លាប់សហគមន៍ភូមិជនជាតិ បើដីនៅភូមិណាមាន ម្ចាស់ត្រូវការលក់ទាល់តែមានការយល់ព្រមពីប្រជាពលរដ្ឋភូមិនោះទើបបាន ។ ហេតុដូច្នេះហើយ ទើបកើតមានទំនាស់បណ្តឹងតវ៉ាបែបនេះកើតឡើង ៕
ចែករំលែកព័តមាននេះ