ខេត្តកំពង់ឆ្នាំង ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវកៀបជាប់ក្នុងរថយន្ត បណ្តាលឱ្យបាត់បង់ជីវិតភ្លាមៗ ខណៈពេលដែលបុរសរងគ្រោះបានបើករថយន្តបត់ឆ្លងផ្លូវបំរុងចូលផ្ទះ ក៏ជ្រុលចង្កូតទៅបុកនឹងរថយន្តធុនយីឌុបមួយគ្រឿងឈប់ស្ងៀមលើទ្រូងផ្លូវដោយមិនមានដាក់ភ្លើងសញ្ញាឡើយ បង្កឱ្យមានការភ្ញាក់ផ្អើលកាលពីម៉ោង១១និង៣០នាទីយប់ ថ្ងៃទី៨ ខែសីហា ឆ្នាំ២០២០ នៅលើកំណាត់ផ្លូវជាតិ ត្រង់ចំណុចរូបសំណាកឆ្នាំងមាស ចន្លោះគីឡូម៉ែត្រលេខ៨៦ និង៨៧ ស្ថិតក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ។
បើតាមមន្ត្រីចរាចរណ៍ក្រុងកំពង់ឆ្នាំងដែលចុះដល់កន្លែងកើតហេតុ បានឱ្យដឹងថា ជនរងគ្រោះខាងលើឈ្មោះ មាស ចាន់តារា ភេទប្រុស អាយុ៣២ឆ្នាំ មានមុខរបរលក់គ្រឿងដែក មានទីលំនៅភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង ជិតកន្លែងកើតហេតុ ។
ប្រភពដដែលបានបន្តថា មុនកើតហេតុ ជនរងគ្រោះបានបើករថយន្តម៉ាកម៉ូនីង ពណ៌ស ពាក់ស្លាកលេខកំពង់ឆ្នាំង 2b 3546 ក្នុងទិសដៅពីជើងទៅត្បូង លុះមកដល់ចំណុចកើតហេតុក៏បើកឆ្លងថ្នល់បម្រុងនឹងចូលទៅផ្ទះ ក៏ស្រាប់តែជ្រុលចង្កូតទៅបុកជាមួយនឹងរថយន្ត ១គ្រឿងទៀតម៉ាកហ្វុយហ្សូ ពណ៌ស មានសណ្តោងសឺមីរ៉ឺម៉ក ដែលមានក្បាលរថយន្តពាក់ស្លាកលេខភ្នំពេញ 3a 8833 និងសឺមីរ៉ឺម៉កពាក់ស្លាកលេខភ្នំពេញ 4A.0852 បើកបរដោយជនពុំស្គាល់ឈ្មោះ ដែលឈប់ស្ងៀមនៅចំណុចកើតហេតុ ដោយមិនមានភ្លើងបំភ្លឺ ឬសញ្ញាអ្វីឡើយ ដែលជាហេតុធ្វើឲ្យអ្នកបើកបររថយន្តរងគ្រោះមើលមិនឃើញ ក៏បុកគ្នាពេញទំហឹងតែម្តង បណ្ដាលឱ្យជនរងគ្រោះដែលបើករថយន្តម៉ូនីង កៀបជាប់ក្នុងរថយន្តបណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុតែម្តង ។
ក្រោយពេលកើតហេតុ សមត្ថកិច្ចនគរបាល និងប្រជាពលរដ្ឋ បាននាំគ្នាជួយទាញយកជនរងគ្រោះពីក្នុងរថយន្ត រួចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តទាំង២គ្រឿងដែលខូចខាតយ៉ាងដំណំ ត្រូវបានអូសយកទៅរក្សាទុកនៅការិយាល័យចរាចរណ៍ផ្លូវគោកខេត្ត ដើម្បីរង់ចាំការដោះស្រាយតាមនីតិវិធីច្បាប់ ដោយឡែកអ្នកបើកបររថយន្តបង្ក ព្រោះឈប់ចំទ្រូងផ្លូវបានគេចខ្លួនបាត់ ។
សមត្ថកិច្ចនគរបាល បានបញ្ជាក់ថា ពាក់ព័ន្ធនឹងករណីគ្រោះថ្នាក់ខាងលើ គឺបង្កឡើងដោយរថយន្តយីឌុបដែលមានសណ្ដោងកន្ទុយរ៉ឺម៉ក ហើយឈប់កណ្ដាលទ្រូងផ្លូវ ដោយមិនមានដាក់ភ្លើងសញ្ញាឡើយ ៕
ចែករំលែកព័តមាននេះ