ខេត្តបន្ទាយមានជ័យ ៖ រូបចម្លាក់ស្រីគ្រប់លក្ខណ៍និងរូបចម្លាក់អវតារលោកេស្វរៈព្រះហស្ត៣២ ដែលធ្វើអំពីស៊ីម៉ង់ត៍ ស្ថិតនៅកណ្តាលក្រុងសិរីសោភ័ណ ខេត្តបន្ទាយមានជ័យ នឹងត្រូវអាជ្ញាធរខេត្តដោះដូរដាក់រូបធ្វើអំពីថ្មភក់នៅស្រុកព្រះនេត្រព្រះដែលមានតម្លៃជាង២ម៉ឺនដុល្លារក្នុងអំឡុង៣ខែទៀត ។
លោក គោស៊ុំ សារឿត អភិបាលខេត្តបានប្រាប់ថា រូបចម្លាក់ចំនួន៣ដែលគ្រោងប្តូរថ្មីនៅកណ្តាលក្រុងសិរីសោភ័ណមាន ៖
១-រូបចម្លាក់ស្រីគ្រប់លក្ខណ៍ស្ថិតនៅរង្វង់មូលស្រីគ្រប់លក្ខណ៍ដែលធ្វើអំពីស៊ីម៉ង់ត៍មានកម្ពស់៥ម៉ែត្រ ទទឹង១,៧៥ម៉ែត្រ ក្នុងភូមិបី សង្កាត់ព្រះពន្លា កសាងនៅអំឡុងឆ្នាំ១៩៩៤ សម័យលោក ដួង ខែម ជាអភិបាលខេត្ត ។
២-រូបចម្លាក់អវតារលោកេស្វរៈព្រះហស្ត៣២ នៅរង្វង់មូលមុខសាលាខេត្ត និងទីបញ្ជាការ កងរាជអាវុធហត្ថខេត្តស្ថិតក្នុងភូមិគោរដ្ឋាន សង្កាត់ព្រះពន្លា មានកម្ពស់ជាង៦ម៉ែត្រ ទទឹងជាង២ម៉ែត្រ កសាងអំឡុងឆ្នាំ២០០៨ ធ្វើអំពីស៊ីម៉ង់ត៍ នាសម័យលោក អន ស៊ុំ អភិបាលខេត្ត ។
៣-ប្តូររូបចម្លាក់ព្រះបាទជ័យវរ្ម័នទី៧ ស្ថិតនៅវេទិកាសាលាខេត្ត ដែលកសាងឡើងនៅអំឡុងឆ្នាំ១៩៩៤ សម័យលោក ដួង ខែម អភិបាលខេត្ត ។
លោកអភិបាលខេត្តបានបញ្ជាក់ថា ដោយមានការណែនាំពីលោកនាយឧត្តមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានឱ្យអាជ្ញាធរខេត្តបន្ទាយមានជ័យត្រូវយកចិត្តទុកដាក់អភិវឌ្ឍន៍ខេត្តជាប់ជាយដែនមួយនេះឱ្យមានការរីកចម្រើនដើម្បីទាក់ទាញភ្ញៀវអន្តរជាតិ ។ ត្រូវតែមានការផ្លាស់ប្តូររូបចម្លាក់ទាំងនេះដែលផ្តួចផ្តើមកសាងដោយលោកជំទាវ ម៉ៅ ម៉ាល័យ កែ គឹមយ៉ាន ចំណាយថវិកាចំនួន១២.០០០ដុល្លារនិងចម្លាក់អវតារលោេកស្វរ:ព្រះហស្ត៣២ កសាងពីថ្មភក់នៅស្រុកព្រះនេត្រព្រះមានកម្ពស់់៦,៦ម៉ែត្រ ទទឹង២,១ម៉ែត្រ កសាងដោយរដ្ឋបាលខេត្តតម្លៃ១២.០០០ដុល្លារ ។ ការកសាងរូបចម្លាក់នេះចំណាយពេល៣ខែឱ្យរួចរាល់ ហើយគ្រោងនឹងប្តូររូបចម្លាក់ព្រះបាទជ័យវរ្ម័នទី៧ នៅវេទិកាសាលាខេត្តដូចគ្នា។
លោក គោស៊ុំ សារឿត បានបន្តថា មូលហេតុដែលយើងសម្រេចឱ្យជាងឆ្លាក់រូបថ្មីពីថ្មភក់នៅស្រុកព្រះនេត្រព្រះ ដើម្បីយកមកដាក់ជំនួសរូបចាស់ព្រោះរូបចម្លាក់មុនធ្វើពីស៊ីម៉ង់ត៍មានភាពចាស់ទើបប្តូរដាក់រូបចម្លាក់ធ្វើអំពីថ្មភក់ជំនួសឱ្យមានភាពរឹងមាំនិងកែលម្អខឿនថ្មីឱ្យមានសោភ័ណភាពល្អ ៕
ចែករំលែកព័តមាននេះ