រាជធានីភ្នំពេញ ៖ កម្លាំងសមត្ថកិច្ចចម្រុះមួយក្រុមរួមមាន គណៈកម្មាធិការប្រយុទ្ធប្រឆាំង ផលិត ផលក្លែងក្លាយ(គ.ប.ផ.ក) កម្លាំងនគរបាលការិយាល័យនៃលេខាធិការដ្ឋានគណៈកម្មាធិការប្រយុទ្ធប្រឆាំងផលិតផលក្លែងក្លាយ(គ.ប.ផ.ក) កម្លាំងនាយកដ្ឋានបញ្ញត្តកម្មនៃវិទ្យាស្ថានស្តង់ដាកម្ពុជា និងមានការចូលរួមពីអាជ្ញាធរសង្កាត់ចោមចៅទី៣ នគរបាលប៉ុស្តិ៍ចោមចៅទី៣ ព្រមទាំងលោកមេភូមិ ក្រោមការសម្របសម្រួលពីព្រះរាជអាជ្ញារងសាលាដំបូងរាជធានីភ្នំពេញ បានធ្វើការផ្អាកដំណើរការសិប្បកម្មផលិតប្រហិតមួយកន្លែងយីហោ«លីហួង» ។
ការផ្អាកសិប្បកម្មខាងលើនេះ បន្ទាប់ពីធ្វើការត្រួតពិនិត្យរកឃើញថា ទីតាំងសិប្បកម្មដំណើរការដោយគ្មានច្បាប់អនុញ្ញាតត្រឹមត្រូវ និងម៉ាស៊ីន សង្វាក់ផលិតកម្មគ្មានអនាម័យ ព្រមទាំងលើក
ស្លាកយីហោខុស ហើយផលិតផលប្រហិតដែលកំពុងផលិតខុសពីផលិតផលដែលបានស្នើសុំចុះបញ្ជីផលិតផល(ចបផ)ផងដែរ ។
ប្រតិបត្តិការនេះ បានធ្វើឡើងកាលពីវេលាម៉ោងប្រមាណ៩និង១០នាទីព្រឹកថ្ងៃទី៥ ខែសីហា ឆ្នាំ២០២០ ដែលសិប្បកម្មនេះមានទីតាំងស្ថិតនៅក្នុងភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ ។
កម្លាំងសមត្ថកិច្ចចម្រុះបានឲ្យដឹងថា ម្ចាស់ទីតាំងសិប្បកម្មនេះឈ្មោះ ព្រៃ សុភ័ក្ត្រ ភេទប្រុស អាយុ៣៧ឆ្នាំ ហើយខណៈសមត្ថកិច្ចចុះទៅដល់ គឺគាត់បានចូលរួមសហការជាមួយដើម្បីធ្វើការត្រួតពិនិត្យនៅក្នុងទីតាំងសិប្បកម្មរបស់គាត់ទាំងមូល ។ ពេលនោះមន្ត្រីជំនាញបានឃើញជាក់ស្ដែងរួមមាន ៖
១-ប្រហិតសាច់ជ្រូកចំនួន១៥ធុង ស្មើនឹង៤.៥០០គីឡូក្រាម
២-ប្រហិតសាច់គោចំនួន១៦ធុងស្មើនឹង៤.៨០០គីឡូក្រាម
៣-ប្រហិតចម្រុះចំនួន២០០ថង់ស្មើនឹង១.០០០គីឡូក្រាម
៤-ស្លាបមាន់ចំនួន១៩កេសស្មើនឹង២៨០គីឡូក្រាម
៥-សាច់ក្របីចំនួន១៤កេស ស្មើនឹង៦០គីឡូក្រាម
៦-តង្កៀបក្ដាមចំនួន១៨កេស ស្មើនឹង១៨០គីឡូក្រាម
៧-កោះមាន់ចំនួន៥កេស ស្មើនឹង៦០គីឡូក្រាម
៨-បង្គាចំនួន១៧កេស ស្មើនឹង១៨០គីឡូក្រាម
៩-វត្ថុធាតុដើមសម្រាប់ផលិតមានដូចជា សាច់ជ្រូក សាច់គោកិនរួច ម្សៅឆា ប៊ីចេង ស្ករសប្រហែល៧តោន និង
១០-ម៉ាស៊ីនសង្វាក់ផលិតកម្មមានដូចជា ម៉ាស៊ីនវាយសាច់ ម៉ាស៊ីនកិនសាច់ ម៉ាស៊ីនលញ់ប្រហិត និងម៉ាស៊ីនកម្ដៅប្រហិត ។
ប្រភពដដែលឲ្យដឹងទៀតថា ក្រៅពីនេះសមត្ថកិច្ចបានរកឃើញថា ទីតាំងសិប្បកម្មផលិតប្រហិត«លីហួង»នេះ គ្មានលិខិតអនុញ្ញាតពីក្រសួងពាណិជកម្ម ទីតាំងលើកស្លាកយីហោខុសពីលិខិតបញ្ជាក់ សង្វាក់ផលិតកម្មគ្មានអនាម័យត្រឹមត្រូវ វិញ្ញាបនបត្របញ្ជាក់គុណភាពហួសសុពលភាព ផលិតផលប្រហិតដែលកំពុងផលិតខុសពីផលិតផលដែលបានស្នើសុំចុះបញ្ជីផលិតផល(ចបផ) ហើយផលិតផលសរុបចំនួន៨ប្រភេទខាងលើពុំបានបិទ«ច.ប.ផ»នៅលើសម្បកវេចខ្ចប់ ។
ក្រោយពីការពិនិត្យឃើញដូចខាងលើ សមត្ថកិច្ចចម្រុះសម្រេចបិទផ្អាកដំណើរការផលិតជាបណ្ដោះអាសន្ន និងតម្រូវឲ្យម្ចាស់ទីតាំងចូលខ្លួនទៅបំភ្លឺចំពោះមុខសមត្ថកិច្ចប្រយុទ្ធប្រឆាំងផលិតផលក្លែងក្លាយ(គ.ប.ផ.ក) ព្រមទាំងដកហូតយកសំណាកផ្សេងៗទៅពិនិត្យផងដែរ ៕
ចែករំលែកព័តមាននេះ