រាជធានីភ្នំពេញ ៖ តារាសម្តែងនាង ម៉ិច ម៉ារីកា បានប្រកាសវិលចូលសិល្បៈសារជាថ្មីឡើងវិញហើយ បន្ទាប់ពីនាងបានខកខានអស់រយៈពេលប្រមាណជា៣ឆ្នាំ ក្រោយពីនាងបានពើបប្រទះនូវបញ្ហាសុខភាពដែលតម្រូវនាងត្រូវនៅផ្ទះសម្រាកព្យាបាលជំងឺមិនអាចចេញទៅណាឆ្ងាយនោះ។
មុនផ្អាកសិល្បៈមួយរយៈ តារារូបនេះក៏ជាតារាមួយដួងដែលមានកេរ្តិ៍ឈ្មោះ និងទីផ្សារសិល្បៈយ៉ាងល្អផងដែរ ក្នុងពេលដែលនាងតែងតែទទួលបានតំណែងតួឯកជាបន្តបន្ទាប់ ក្នុងខ្សែភាពយន្តដែលនាងបានសម្តែង មិនថារឿងភាគទូរទស្សន៍ ឬក៏រឿងខ្នាតធំនោះឡើយ។
ប៉ុន្តែមួយរយៈចុងក្រោយនេះនាងបានបាត់វត្តមានសម្តែង ដោយតំណែងជាតួឯកបានត្រូវធ្លាក់ទៅលើតារាថ្មីៗ ដែលទើបដុះពន្លក ដែលនាំឲ្យមានមតិមួយចំនួនបានលើកឡើងថា តារាចាស់ដែលធ្លាប់ល្បីឈ្មោះ និងបង្ហាញវត្តមានសម្តែងជាញឹកញាប់នោះទំនងជាបាត់ទីផ្សារច្រើនដោយសារតួថ្មីៗដែលកំពុងតែពេញនិយម។
ទោះជាយ៉ាងណាក៏ដោយ នាពេលនេះ ម៉ិច ម៉ារីកា បានប្រកាសវិលមកសង្វៀនសម្តែងរបស់នាងសារជាថ្មីឡើងវិញហើយ បន្ទាប់ពីខកខាន ខណៈពេលដែលការវិលមកជាថ្មីឡើងវិញ នាពេលនេះក៏នាងមិនអាចទទួលការងារសម្តែងបានច្រើនដូចជាពេលមុនឡើយ ពោលគឺអាស្រ័យលើសុខភាពរបស់នាង។
ថ្លែងប្រាប់កោះសន្តិភាពតាមសារអេឡិចត្រូនិចតារាសម្តែងសប្បុរស្រអែមស្រស់នាង ម៉ិច ម៉ារីកា បានលើកឡើងថា ពេលនេះនាងបានសម្រេចទទួលយកការងារសម្តែងឡើងវិញហើយ បន្ទាប់ពីផ្អាកអស់៣ឆ្នាំមកនេះ ដោយសារសុខភាពរបស់នាងខ្សោយ ទើបមិនអាចទទួលយកការងារកើត។
នាងបញ្ជាក់ថា នាងមានបញ្ហាសុខភាព ដោយមានជំងឺខ្វះគ្រាប់ឈាម ទើបបណ្តាឲ្យនាងមានអាការៈខ្សោយអស់កម្លាំង ទើបមិនទទួលការងារសម្តែងច្រើន ដើម្បីមានពេលមើលថែសុខភាពឲ្យបានល្អជាមុនសិន ទើបទទួលយកការងារនេះឡើងវិញ។
នាងថា មកទល់ពេលនេះ ដោយសារសង្កេតឃើញអាការៈជំងឺហាក់មានភាពរឹងមាំឡើងវិញនោះ ទើននាងសម្រេចទទួលយកការសម្តែងជាថ្មីឡើងវិញ ប៉ុន្តែយ៉ាងណានឹងមិនទទួលយកការងារសម្តែងឲ្យបានច្រើនដូចជាពេលមុននោះឡើយ ដោយសារតែនាងចង់មានពេល ដើម្បីសម្រាកព្យាបាលជំងឺផងនោះ។
បើតាម ម៉ិច ម៉ារីកា បន្ទាប់ពីនាងទទួលយកការសម្តែងវិញនោះ បច្ចុប្បន្ននាងទើបទទួលការហៅថតរឿងខ្លីបានចំនួន៣រឿង ក្នុងនោះនាងបានថតបញ្ចប់បានមួយរឿង នៅ២រឿងទៀតដែលកំពុងបន្តថតនៅឡើយ ខណៈពេលខ្សែរឿងទាំង៣នោះ គឺនាងជាតួឯកទាំងអស់។
ជាការកត់សម្គាល់មុនពេលផ្អាកការសម្តែងនោះ ម៉ិច ម៉ារីកា បានចូលរួមសម្តែងទាំងរឿងដុំ និងរឿងភាគប្រមាណជិត១០ ហើយភាគច្រើនរឿងដែលនាងសម្តែងនោះគឺជាតំណែងតួឯក ហើយក្រៅពីអាជីពសម្តែងភាពយន្តនោះនាងក៏មានមុខរបរសម្អាងការផ្ទាល់ខ្លួនមួយផងដែរ៕
ចែករំលែកព័តមាននេះ