ខេត្តកំពង់ឆ្នាំង ៖ ប្រជាពលរដ្ឋនៅក្នុងក្រុងកំពង់ឆ្នាំងបានលើកឡើងថា ផ្លូវកៅស៊ូ១ខ្សែមានប្រវែងប្រមាណ១គីឡូម៉ែត្រ នៅក្នុងតំបន់កំពុងអភិវឌ្ឍន៍ ក្រុងកំពង់ឆ្នាំង ពីចំណុចវង្វង់មូលទូកទៅកាន់ផ្សារកំពង់ឆ្នាំងថ្មី និងទៅកាន់មាត់ទន្លេកំពង់ផែថ្មី បានរងការខូចខាតជាច្រើនកន្លែង ដែលជួបលំបាកក្នុងការធ្វើចរាចរណ៍ ហេតុនេះហើយទើបពួកគាត់ស្នើសុំអាជ្ញាធរខត្តមេត្តាជួយជួលជុលផ្លូវនេះផង ដើម្បីអោយស័ក្តិសមជាទីក្រុងដែលកំពុងមានការអភិវឌ្ឍន៍ ។
ទាក់ទងបញ្ហាផ្លូវថ្មីទៅកាន់តំបន់អភិវឌ្ឍន៍ខាងលើនេះដែរ មន្ត្រីមន្ទីរសាធារណៈការខេត្តកំពង់ឆ្នាំងមួយរូបដែលសុំមិនបញ្ចេញឈ្មោះបានបញ្ជាក់ថា ផ្លូវកៅស៊ូ ដែលរងការខូចខាតខាងលើនេះ គឺស្ថិតនៅក្នុងការគ្រប់គ្រង ថែទាំនិងជួសជុល របស់រដ្ឋបាលខេត្ត ( សាលាខេត្ត កំពង់ឆ្នាំង ) មិនមែនស្ថិតក្នុងការគ្រប់គ្រងថែទាំនិងជួសជុលរបស់មន្ទីរសាធារណៈការខេត្តនោះឡើយ ។
ទោះបីជាយ៉ាងនេះក្តី មន្ត្រីជំនាញដដែលបានបញ្ជាក់ថា៖ មន្ត្រីសាធារណៈការខេត្ត និងអាជ្ញាធរក្រុងកំពង់ឆ្នាំង បានចុះសិក្សាគម្រោងដែលត្រូវធ្វើការជួសជុលផ្លូវដែលខូចខាតនៅចំណុចនេះ និងបានរាយការជូនអាជ្ញាធរខេត្តរួចហើយដែរ ដើម្បីស្នើសុំថវិកាពីថ្នាក់លើ សំរាប់ធ្វើការជួសជុលកែលំអរឡើងវិញ ។
តាមការបញ្ជាក់ពីមន្ត្រីជំនាញបានអោយដឹងថា ផ្លូវកៅស៊ូ១ខ្សែនេះគឺជាផ្លូវដែលទើបនិងកសាងនៅលើដីថ្មី ទើបមានរយៈពេលប្រមាណជាង២ឆ្នាំតែប៉ុណ្ណោះ ។តាមធម្មតានៅលើដីថ្មី បើគេមិនធ្វើការកិនបង្ហាប់ដីទុកចោល និងប្រើប្រាស់ផ្លូវក្រហមនោះអោយបានហាប់ល្អសិន ចាំធ្វើការចាក់កៅស៊ូជាក្រោយ វាមិនហើមខូចខាតដូច្នេះឡើយ ។
ជាមួយគ្នានេះដែរ តំបន់ថ្មីដែលកំពុងអភិវឌ្ឍន៍ អាជ្ញាធរខេត្តក៏បានអោយក្រុមហ៊ុនវិនិយោគទុនកសាងផ្សារកំពង់ឆ្នាំងថ្មី១កន្លែង មានតូបនិងរាន លក់ដូរប្រមាណជិត១ពាន់កន្លែង រួចរាល់ហើយ ដើម្បីទុកអោយប្រជាពលរដ្ឋ អត់កន្លែងលក់ដូរ នៅក្នុងផ្សារលើ ផ្សារក្រោម និងពិសេសអាជីវករលក់ដូរ តាមចិញ្ចើមផ្លូវដើមស្រស់មុខវត្តយាយទេព អោយចូលមកលក់ដូរក្នុងផ្សារកំពង់ឆ្នាំថ្មីមួយនេះ ។ ប៉ុន្តែបើផ្លូវកៅស៊ូនេះ គ្មានការ កសាងជួសជុលអោយបានល្អឡើងវិញនោះទេ អាជីវករដែលត្រូវចូលមកលក់នៅផ្សារថ្មីនេះ នឹងមានការរួយរាជាពុំខានឡើយ ។
សូមបញ្ជាក់ដែរថា បន្ទាប់ពីអាជ្ញាធរខេត្តបានរៀបចំបន្លាស់ទីផ្ទះប្រជាពលរដ្ឋ ដែលបណ្តែតលើទឹក ឱយឡើងមករស់នៅលើគោករួចមក នៅតំបន់ចុងកោះ ក៍មានការរៀបចំអភិវឌ្ឍន៍ក្លាយពីតំបន់ព្រៃលិចទឹក ឱយក្លាយជាទីប្រជុំជន មានផ្សារ មានសាលារៀន សាលាបុណ្យ ជាដើម ។ល។ (កែសម្រួលដោយ ៖ ធីតា)
ចែករំលែកព័តមាននេះ