រាជធានីភ្នំពេញ ៖ ជនសង្ស័យចំនួន២នាក់ ខណៈពេលដែលពួកគេមកពីទិញថ្នាំញៀនយកទៅប្រើប្រាស់ ហើយជិះម៉ូតូអត់កញ្ចក់ និងអត់ពាក់មួក ត្រូវសមត្ថកិច្ចហៅផាកពិន័យ រួចផ្តួលម៉ូតូរត់គេច ក៏ត្រូវកម្លាំងនគរបាលការិយាល័យ ចរាចរណ៍ផ្លូវគោក និងនគរបាលអន្តរាគមន៍ ដាក់គោលដៅត្រួតពិនិត្យពង្រឹងច្បាប់ចរាចរណ៍ដេញឃាត់ខ្លួនបាន ព្រមទាំងដកហូតបានថ្នាំញៀន១កញ្ចក់ ។
ហេតុការណ៍ដេញឃាត់ខ្លួនជនសង្ស័យទាំង២នាក់ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ២និង៤០នាទីរសៀលថ្ងៃទី៥ ខែសីហា ឆ្នាំ២០២០ នៅចំណុច ខាងត្បូងអតីតរង្វង់មូលកាំកូស៊ីធី តាមបណ្តោយផ្លូវលេខ៣៥៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
ជនសង្ស័យ២នាក់ដែលត្រូវឃាត់ខ្លួន ក្នុងនោះម្នាក់ឈ្មោះ ជា ម៉ៅ ភេទប្រុស អាយុ៣០ឆ្នាំ និងម្នាក់ទៀតឈ្មោះសំ សារិទ្ធ ភេទប្រុស អាយុ៣១ឆ្នាំ ។ អ្នកទាំង២នាក់ជាមនុស្សញៀនថ្នាំ ស្នាក់នៅតាមចិញ្ចើមផ្លូវម្តុំវត្តកោះ ខណ្ឌដូនពេញ រាជធានីភ្នំពេញ ។
តាមប្រភពពីនគរបាលចរាចរណ៍បានអោយដឹងថា នៅមុនពេលកើតហេតុ គេឃើញជនសង្ស័យ២នាក់ បានជិះម៉ូតូមួយគ្រឿង ពណ៌ក្រហមលាយខ្មៅ ពាក់ស្លាកលេខ ភ្នំពេញ១X-៧៤០៨ មួយគ្រឿង ធ្វើដំណើរ តាមផ្លូវលេខ៣៥៥ ក្នុងទិសដៅពីជើងទៅត្បូង ដោយម៉ូតូអត់មានកញ្ចក់ និងពាក់មួយសុវត្តិភាព។ លុះពេលមកដល់គោលដៅសមត្ថកិច្ច ក៍បានហៅផាកពិន័យ ស្រាប់តែជនសង្ស័យទាំង២នាក់នោះភ័យក៏បានផ្តួលម៉ូតូ រួចរត់គេចខ្លួន ។
តាមប្រភពដដែលបានអោយដឹងទៀតថា ភ្លាមៗជនសង្ស័យបានបំបែកគ្នារត់គេចខ្លួនហើយក៏ត្រូវបានកម្លាំងនគរបាលចរាចរណ៍ និងកម្លាំងនគរបាលអន្តរាគមន៍ ដែលសហការណ៍គ្នាដាក់គោលដៅពង្រឹងច្បាប់ចរាចរណ៍នាំគ្នាដេញតាមឃាត់ខ្លួនបានទាំង២នាក់ ព្រមទាំងដកហូតបានថ្នាំញៀនមួយកញ្ចប់ ។
តាមប្រភពពីជនសង្ស័យបានសារភាពអោយដឹងថា នៅមុនពេលចាប់ខ្លួន ពួកគេបានជិះម៉ូតូទៅរកឃើញថ្នាំញៀន១កញ្ចប់នៅម្តុំបឹងកក់ដើម្បីយកទៅប្រើប្រាស់ លុះពេលធ្វើដំណើរតាមផ្លូវក៍បានប្រទះឃើញនគរបាលហៅត្រួតពនិត្យ ក៍បានផ្តួលម៉ូតូរត់ដែរ តែរត់មិនរួច ។
បន្ទាប់ពីឃាត់ខ្លួនជនសង្ស័យទាំង២នាក់ខាងលើនេះ នគរបាលចរាចរណ៍ក៏បានប្រគល់អោយនគរបាលប៉ុស្តិ៍បឹងកក់ទី១ ដើម្បីចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ