លក់​ចំណីអាហារ​ផ្ទុក​សារធាតុ​គីមី បើ​មិន​ខ្លាច​ច្បាប់​ក៏​គួរ​ខ្លាច​បាប​ដែរ


ខេត្ត​ត្បូងឃ្មុំ ៖ សមត្ថកិច្ច​ជំនាញ នៅ​ខេត្ត​ត្បូងឃ្មុំ បាន​ចុះ​ត្រួតពិនិត្យ​គុណភាព​ម្ហូបអាហារ និង​ទំនិញ​វេច​ខ្ចប់​ស្រាប់ នៅ​ក្នុង​ទីផ្សារ​សួង ស្ថិត​នៅ​ក្រុង​សួង ខេត្ត​ត្បូងឃ្មុំ​កាល នៅ​ថ្ងៃ​ទី​០៥ ខែសីហា ឆ្នាំ​២០២០ ហើយ​បាន​ធ្វើការ​វិភាគ​បឋម​ទៅ​លើ​ពពុះសណ្តែក ដើម្បី​ស្វែងរក​សារធាតុ​គីមី​ហាមឃាត់ ដែល​អាច​ធ្វើ​ឱ្យ​ប៉ះពាល់​ដល់​សុខភាព​ប្រជាពលរដ្ឋ ហើយ​នៅ​ខេត្តស្ទឹងត្រែង​សមត្ថកិច្ច​ជំនាញ​ក៏​បាន​រក​ឃើញ​មាន​ពុះ​សណ្តែក​ដែល​មាន​គីមី​ផង​ដែរ ។

មន្ត្រី​ជំនាញ​បាន​ធ្វើការ​ត្រួតពិនិត្យ​រក​ភាព​មិន​អនុលោម​របស់​ទំនិញ​នៅ​លើ​សំបក​វេច​ខ្ចប់​ផង​ដែរ ។ ជា​លទ្ធផល​បាន​រក​ឃើញ​ពពុះសណ្ដែក​មាន​ផ្ទុក​សារធាតុ​គីមី​បូ​រ៉ា​ក់ ដែល​ធ្វើ​ឲ្យ​ប៉ះពាល់​សុខភាព​ពលរដ្ឋ​ធ្ងន់ធ្ងរ ។ ចំណីអាហារ​មាន​សា​ធារ​ពុល មាន​សារធាតុ​គីមី មិនមែន​ជា​រឿង​ថ្មី​ឡើយ​នៅ​កម្ពុជា​។

ទាំង​ថ្នាក់ដឹកនាំ ទាំង​ពលរដ្ឋ​សាមញ្ញ បាន​បារម្ភ​ពី​បញ្ហា​នេះ ។ ពលរដ្ឋ​បាន​កើត​ជំងឺ​ប្លែក​ៗ ទឹកនោមផ្អែម លើស​សំពាធ​ឈាម ជំងឺថ្លើម ឈឺពោះវៀន​ក្រពះ មហារីក សុទ្ធ​សឹង​មានការ​សង្ស័យ​ថា​អាច បណ្តាល​មក​ពី​ការ​ទទួលទាន​អាហារ​មាន​សារធាតុ​គីមី​នេះឯង ។ មិន​ថា​អាហារ​វេច​ខ្ចប់ បន្លែ ត្រី​សាច់​ស្រស់ នាំ​ចូល​ពី​ក្រៅប្រទេស ឬ​ដាំ​ដុះ​នៅ​ក្នុងស្រុក​នោះ​ទេ សុទ្ធ​សឹង​អាច​មាន​សារធាតុ​គីមី​ខ្ពស់ តាម​រយៈ​ហេតុផល​ដើម្បី​ទុក​ទំនិញ​ទាំងនោះ​ឲ្យ​មាន​យូរ បាន​ស្រស់ បាន​ធ្ងន់ ដើម្បី​លក់​បាន​ចំណេញ​ច្រើន​។

អ្នកលក់​ខំ​ដាក់​សារធាតុ​គីមី ដើម្បី​តែ​បាន​ចំណេញ ដោយ​មិន​បាន​គិតដល់​សុខភាព​អ្នក​ទទួលទាន​ដែល​ជា​ពលរដ្ឋ​ជាតិ​សាសន៍​តែ​មួយ​នោះ​សោះ ។ កន្លង​មក​មាន​សាក្សី​អះអាង​ថា មាន​បន្លែ​ដែល​ស្រពោន​ៗ គេ​មាន​ថ្នាំ​ត្រាំ​ឲ្យ​ស្រស់​វិញ ។ ផ្លែក្រូច​ឆ្មា​តូច​ៗ មិន​ទាន់​ដល់​ពេល​បេះ គេ​មាន​ថ្នាំ​ដាក់​ឲ្យ​វា​ធំ​ភ្លាម​ៗ​ក្នុង​រយៈពេល​មួយ​យប់​ដើម្បី​ប្រមូល ។ មាន​អ្នក​ផលិត​ទឹកកក​ខ្លះ មិន​ទទួលទាន​ទឹកកក​ជា​ដាច់ខាត ដោយសារ​គាត់​ដឹង​ថា​ក្នុង​ទឹកកក​នោះ មាន​ដាក់​សារធាតុ​អ្វី ។

មាន​ប្រហុក ផ្អក ដែល​ជា​ចំណី​ផ្អាប់ ត្រូវ​មាន​ក្លិន ត្រូវ​មាន​រុយ​រោម ប៉ុន្តែ​ចំណី​ទាំង​អស់នោះ នា​ពេល​ឥឡូវនេះ​មិន​មាន​រុយ​រោម​ឡើយ បន្លែ ផ្លែ ឈើ​ខ្លះ ទុក​ច្រើន​ថ្ងៃ​នៅ​តែ​ស្រស់​ជា​និច្ច ។ ការ​លក់ដូរ​ដូច​សាច់​អាំង សាច់​ដុត តាម​ទី​សាធារណៈ មានទឹក​ជូត​លាប ដើម្បី​ស្រស់​ឲ្យ​ក្រហម ទាក់ទាញ​អ្នក​ទទួលទាន ។ ទាំង​អស់នេះ​សុទ្ធ​សឹង​ជា​សកម្មភាព​ជួញដូរ​ដើម្បី​រក​ប្រាក់​ចំណេញ​។ ចំណេញ​ដោយសារ​ការ​ធ្វើ​ជំនួញ​ទិញ​មក​ថោក លក់​ថ្លៃ​ខ្ពស់​បន្តិច​ជា​រឿង​ធម្មតា​សម្រាប់​ការ​ធ្វើ​ជំនួញ ប៉ុន្តែ​មិន​គួរ​ណា ដើម្បី​ចំណេញ សុខចិត្ត​ប្រើ​សារធាតុ​គីមី លើ​ចំណីអាហារ​ឡើយ ។

អាហារ​មនុស្ស​ទទួលទាន​ចូល​ពោះ​តើ ដើម្បី​ចំណេញ​មនុស្ស​ភ្លេច​គិត​ពី​បុណ្យ បាប ឬ​ភ្លេច​ថា មានកម្ម មាន​ពៀរ​ឬ​យ៉ាងណា ។ ពលរដ្ឋ​កម្ពុជា​ភាគច្រើន​ជា​អ្នក​កាន់​ព្រះពុទ្ធ​សាសនា សាសនាព្រះពុទ្ធ ដែល​បាន​អប់រំ​មនុស្ស​ឲ្យ​ទៀងត្រង់ មាន​សច្ចៈ​ធម៌ មាន​ខន្តី មិន​បៀតបៀន​ជីវិត​មនុស្ស​សត្វ ចុះ​ហេតុ​អី​បាន​ដើម្បី​ចំណេញ​តែ​ប្រាក់ រហូត​ដល់​ត្រូវធ្វើ​ជំនួញ​បំផ្លាញ​ជីវិត​មនុស្ស​នោះ ។

ជា​ការ​ពិត​ណាស់ ការ​ដាក់​សារធាតុ​គីមី​ខ្ពស់​ក្នុង​ចំណីអាហារ​ខ្ពស់​ជា​បទល្មើស​ខុសច្បាប់ ប៉ុន្តែ​ការ​ខុសច្បាប់​ដែល​មនុស្ស​ធម្មតា​ពិ​កបាក​មើលឃើញ និង​ពិបាក​សន្មត់​ដោយ​ភ្លែ​ក​ទទេ រង​ចាំ​សមត្ថកិច្ច​ចុះ​ឆែកឆេរ​នោះ​ពិបាក​នឹង​លុប​បំបាត់​ណាស់ ។ ការ​លុប​បំបាត់​សកម្មភាព​នេះ ដោយ​ងាយ​បំផុត​នោះ អ្នកលក់​គួរ​ខ្លាច​បាប ខ្លាច​ចំណីអាហារ​ដែល​មាន​សារធាតុពុល មាន​សារធាតុ​គីមី​នោះ ខ្លួនឯង ឬ​ក៏​សាច់​ញ្ញត្តិ​ខ្លួន​ទទួលទាន​វិញ តើ​យ៉ាងណា​ទៅ​វិញ ។ ព្រះពុទ្ធ​បាន​អប់រំ​មនុស្ស​ឲ្យ​ចេះ​ឧបមា​ខ្លួន​ទៅ​អ្នក​ដទៃ បើ​មនុស្ស​គិតដល់​ចំនុច​នេះ ម្លេះ​គ្រាន់តែ​ចំណេញ​ប្រាក់​ហ៊ាន​ធ្វើអំពើ​បាប​ធ្ងន់ធ្ងរ​នោះ​ឡើយ ៕

Facebook Google Twitter Email

Live

Sponsored News

០២:៣៩ | ក្នុងស្រុក

ក្រុមហ៊ុន ភីធីធី កម្ពុជា ផ្តល់អាហារូបករណ៍ ៣០០កន្លែងដល់សិស្សកម្ពុជា ដើម្បីបណ្តុះបណ្តាលអ្នកដឹកនាំវ័យក្មេងតាមរយៈវគ្គសិក្សាពីចម្ងាយ «ទម្លាប់ល្អទាំង ៧របស់យុវវ័យឆ្នើម»

ការស្ទង់មតិគេហទំព័រថ្មី




សូម​អរគុណ