រាជធានីភ្នំពេញ ៖ រឿងរ៉ាវជុំវិញការចាប់ខ្លួនលោក រ៉ុង ឈុន កំពុងតែបង្កឲ្យមានការលើកឡើងខុសៗគ្នា ។ ថ្នាក់ដឹកនាំរាជរដ្ឋាភិបាលក៏ដូចជា ស្ថាប័នតុលាការបានអះអាងថា ទង្វើលោក…
រាជធានីភ្នំពេញ ៖ រឿងរ៉ាវជុំវិញការចាប់ខ្លួនលោក រ៉ុង ឈុន កំពុងតែបង្កឲ្យមានការលើកឡើងខុសៗគ្នា ។ ថ្នាក់ដឹកនាំរាជរដ្ឋាភិបាលក៏ដូចជា ស្ថាប័នតុលាការបានអះអាងថា ទង្វើលោក រ៉ុង ឈុន គឺជាទង្វើញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ខណៈមតិខ្លះលើកឡើងថា គ្រាន់តែជាការបញ្ចេញមតិជុំវិញបញ្ហាព្រំដែន ។
ថ្មីៗនេះទៀតសោត លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់បក្សប្រឆាំងបានលើកឡើងថា ការចាប់ខ្លួនលោករ៉ុង ឈុន ធ្វើឲ្យកម្ពុជាកំពុងតែដើរលើផ្លូវដែលកាន់តែគ្រោះថ្នាក់ដល់លទ្ធិប្រជាធិបតេយ្យ និងការគោរពសិទ្ធិមនុស្ស និងទាមទារឲ្យមានការដោះលែងលោក រ៉ុង ឈុន ប្រធាន សហភាពសហជីពកម្ពុជា ជាបន្ទាន់ និងដោយគ្មានលក្ខខណ្ឌ ។ នេះបើយោងតាមសំណេររបស់ លោក អ៊ូ ច័ន្ទរ័ត្ន បង្ហោះលើបណ្តាញសង្គម កាលពីថ្ងៃទី៥ សីហានេះ។
លោក អ៊ូ ច័ន្ទរ័ត្ន បានបន្តថា ការងើបតវ៉ាពីសំណាក់ពលរដ្ឋខ្មែរមួយចំនួន ទាំងមតិជាតិ និងអន្តរជាតិបានសម្តែងការខកចិត្ត និងថ្កោលទោសចំពោះចំណាត់ការរបស់អាជ្ញាធរកម្ពុជាលើករណីនេះ ដែលសុទ្ធតែយល់ឃើញថាជាការរំលោភបំពានសិទ្ធិសេរីភាពបញ្ចេញមតិ ដែលការពារដោយច្បាប់ជាតិ និងអន្តរជាតិ ។ ករណីនេះ ជារឿងអយុត្តិធម៌បំផុតសម្រាប់ លោករ៉ុង ឈុន ដែលជាអ្នកសកម្មក្នុងការការពារប្រយោជន៍ជាតិ និងប្រជាពលរដ្ឋ ។ លោកបានបញ្ជាក់ថា «ខ្ញុំ អ៊ូ ច័ន្ទរ័ត្ន យល់ឃើញថា ជំហរ និងការអនុវត្តន៍របស់រដ្ឋាភិបាលបច្ចុប្បន្នកំពុងតែដើរលើផ្លូវដែលកាន់តែគ្រោះថ្នាក់ដល់ លទ្ធិប្រជាធិបតេយ្យ និងការគោរពសិទ្ធិមនុស្ស ដែលវានឹងប៉ះពាល់ដល់់មុខមាត់ជាតិ និងនយោបាយកម្ពុជា លើឆាកអន្តរជាតិ ។ ជាពិសេសកម្ពុជានឹងបាត់បង់ការគាំទ្រ ផ្នែកអភិវឌ្ឍន៍សេដ្ឋកិច្ចរបស់ខ្លួន ពីសំណាក់សហគមន៍អន្តរជាតិ និងដៃគូរអភិវឌ្ឍន៍នានា» ។
យ៉ាងណាមិញ លោក សុខ ឥសាន្ត អ្នកនាំពាក្យគណបក្សប្រជាជនកម្ពុជាបានលើកឡើងថា ការចាប់ខ្លួនលោករ៉ុង ឈុន គឺជាបុគ្គលរូបនេះ «ត្រូវចាប់ខ្លួនពីរឿងនិយាយមិនពិតអំពីបញ្ហាព្រំដែន មិនមែនដោយសារការងារសហជីពទេ ។ ជាងនេះទៅទៀត ការស្រែកឲ្យដោះលែង រ៉ុង ឈុន គឺអាស្រ័យលើសមត្ថកិច្ចរបស់តុលាការកម្ពុជា» ។ លោក សុខ ឥសាន្តបានបន្តទៀតថា ការលើកឡើងថាការចាប់ខ្លួនលោក រ៉ុង ឈុន «អយុត្តិធម៌ គឺអយុត្តិធម៌សម្រាប់តែក្រុមឧទ្ទាមក្រៅច្បាប់ ឯប្រជាជនកម្ពុជាទូទៅ គឺត្រឹមត្រូវណាស់» ។
សូមរម្លឹកថាលោក រ៉ុង ឈុន ត្រូវបានសម្ថកិច្ចឃាត់ខ្លួនកាលពីថ្ងៃទី១ សីហា ឆ្នាំ២០២០ និងត្រូវបានតុលាការសម្រេចចេញដីកាឃុំខ្លួន ជាបណ្តោះអាសន្នពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា៤៩៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា ក្រោយលោក ចេញសេចក្តីថ្លែងការណ៍ កាលពីថ្ងៃទី២០ ខែកក្កដា ឆ្នាំ២០២០ ដោយបានចោទប្រកាន់ថា «ការបោះបង្គោលព្រំដែនពីលេខ១១៤ ដល់លេខ១១៩ មានភាពមិនប្រក្រតីច្រើន ដែលធ្វើឱ្យពលរដ្ឋបាត់បង់ដីអាស្រ័យផលទៅខាងភាគីវៀតណាម នៅខេត្តត្បូងឃ្មុំ ។
ភ្លាមៗនោះ គណៈកម្មាធិការចម្រុះកិច្ចការព្រំដែន បានប្រតិកម្មតបថា សេចក្តីថ្លែងការណ៍នេះបានប្រឌិតរឿង និងផ្សព្វផ្សាយនូវព័ត៌មានក្លែងក្លាយដោយចេតនាទុច្ចរិត ក្នុងគោលបំណងបំភ័ន្តសាធារណៈមតិជាតិ និងអន្តរជាតិ ដោយធ្វើការចោទប្រកាន់ដោយគ្មានមូលដ្ឋានមកលើការងារព្រំដែនរបស់រាជរដ្ឋាភិបាល អំពីការធ្វើឱ្យបាត់បង់ទឹកដី ក៏ដូចជាការបណ្ដោយឱ្យមានការរំលោភបំពានទឹកដីពីប្រទេសជិតខាង ធ្វើឱ្យប្រជា ពលរដ្ឋបាត់បង់ដីស្រែចម្ការនៅភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ៕
ចែករំលែកព័តមាននេះ