រាជធានីភ្នំពេញ ៖ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងជាគណៈកម្មការគ្រប់គ្រងពហុកីឡដ្ឋានជាតិនាថ្ងៃទី៤ ខែសីហា ឆ្នាំ២០២០ បានដឹកនាំកិច្ចប្រជុំស្ដីពីការអនុវត្តការងារសន្តិសុខ សណ្ដាប់ធ្នាប់ អនាម័យក្នុងពហុកីឡដ្ឋានជាតិ ជាមួយសហព័ន្ធកីឡាជាតិទាំង១៩ និងក្រុមហ៊ុនសន្តិសុខ ដើម្បីប្រយុទ្ធប្រឆាំងមេរោគCOVID-19។
ក្នុងឱកាសនោះ លោក អ៊ុក សិទ្ធិជាតិ បានអំពាវនាវដល់កីឡាករ-កីឡាការិនីក្រុមជម្រើសជាតិទាំងឈុតធំ និងថ្នាល បងប្អូនអ្នកហាត់ប្រាណដើម្បីសុខភាព និងអ្នកធ្វើដំណើរឆ្លងកាត់តាមពហុកីឡដ្ឋានជាតិ មិនត្រូវធ្វើដំណើរបញ្ច្រាសទិសខុសការកំណត់របស់គណៈកម្មការគ្រប់គ្រងពហុកីឡដ្ឋានជាតិឡើយ ដើម្បីបញ្ចៀសគ្រោះថ្នាក់ដល់អ្នកធ្វើដំណើរដោយថ្មើរជើង។
លោកបន្តថា សហព័ន្ធកីឡាជាតិស្ថិតក្នុងការប្រមូលផ្តុំចំនួន៣៥សហព័ន្ធ ។ សហព័ន្ធនីមួយៗ
ត្រូវឲ្យកីឡាករកីឡាការិនីហ្វឹកហាត់(រត់)ផ្លាស់ប្តូរទៅធ្វើក្នុងទីលានបាល់ទាត់វិញ ដោយគណៈកម្មការគ្រប់គ្រងពហុកីឡដ្ឋានជាតិមិនអនុញ្ញាតឲ្យបងប្អូនហាត់ប្រាណដើម្បីសុខភាពចូលហាត់នៅក្នុងទីលានបាល់ទាត់ទៀតឡើយ។
កីឡាករ-កីឡាការីនីក្រុមជម្រើសជាតិទាំងឈុតធំនិងថ្នាល អ្នកហាត់ប្រាណដើម្បីសុខភាព និងអ្នកធ្វើដំណើរចូលក្នុងពហុកីឡដ្ឋានត្រូវទទួលការត្រួតពិនិត្យកម្តៅដើម្បីប្រយុទ្ធប្រឆាំងនឹងមេរោគCOVID-19។ នៅក្នុងការអនុញ្ញាតឲ្យដំណើរការឡើងវិញនេះ ក្រសួងស្នើឲ្យទីកន្លែងហាត់ប្រាណ និងលេងកីឡាទាំង អស់ត្រូវបន្តគោរពតាមវិធានសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោកឱ្យបានត្រឹមត្រូវ និងម៉ឺងមាត់។
វិធានសុវត្ថិភាពសុខភាពនោះមានដូចជាការរក្សាអនាម័យជាប្រចាំដោយលាងសម្អាតដៃនឹងសាប៊ូ ទឹកអាល់កុលសម្លាប់មេរោគ ពាក់ម៉ាស់ និងវាស់កម្តៅ ។ រក្សាគម្លាតសុវត្ថិភាពបុគ្គល ដោយរក្សាចម្ងាយពីម្នាក់ទៅម្នាក់យ៉ាងតិច ១,៥ម៉ែត្រ ហើយទីកន្លែងហាត់ប្រាណ និងកន្លែងលេងកីឡា ត្រូវបាញ់ថ្នាំសម្លាប់មេរោគ និងធ្វើអនាម័យជាប្រចាំ ។ ត្រូវធានាថា កន្លែងហាត់ប្រាណ និងកន្លែងលេងកីឡា មិនមែនជាកន្លែងឆ្លងជំងឺកូវីដ-១៩។
ក្រសួងអប់រំ យុវជន និងកីឡាសង្ឃឹម និងជឿជាក់ថា បងប្អូនប្រជាពលរដ្ឋទាំងអស់នឹងចូលរួមហាត់ប្រាណ និងលេងកីឡា ព្រមទាំងបន្តអនុវត្តនូវវិធានសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោកប្រកបដោយការទទួលខុសត្រូវខ្ពស់ ៕
ចែករំលែកព័តមាននេះ