រាជធានីភ្នំពេញ ៖ ក្នុងអំឡុងពេល ៦ខែមកនេះ ទូទាំងសាកលលោកបានជួបវិបត្តិនៃការវាយប្រហារពីជំងឺឆ្លងកូវីដ១៩ ដែលសឹងតែគ្រប់ប្រទេសក្នុងសាកលលោកកំពុងរងគ្រោះធ្ងន់ធ្ងរ មានក្រុមហ៊ុនម្ចាស់ប្រែនធំៗជាច្រើនប្រកាសក្ស័យទុន ឬបិទទ្វារអាជីវកម្ម ឬក៏កាត់បន្ថយបុគ្គលិក ខ្លះក៏បិទហាងតាមទីតាំងមួយចំនួ ។ ក៏មិនខុសគ្នាផងដែរ ក្នុងប្រទេសកម្ពុជាក៏បានទទួលរងនូវវិបត្តិនេះដូចគ្នា។
យ៉ាងណាមិញ ក្នុងប្រទេសកម្ពុជា ស្ទើរតែគ្រប់វិស័យទទួលរងនូវវិបត្តិកូវីដ១៩នេះ ជាពិសេសវិស័យឧស្សាហកម្ម កាត់ដេរ និងវិស័យទេសចរណ៍ជាដើម។ អ្នកមគ្គទេសក៍ និងក្រុមហ៊ុនទេសចរណ៍ខ្លះត្រូវបានផ្អាក ហើយខ្លះទៀតបានធ្វើការព្យួរការងារ រហូតអ្នកមគ្គទេសក៍ខ្លះត្អូញត្អែរដាច់លុយ ខ្លះទៅរត់ម៉ូតូឌុប បានចំណូលតិចតួចបំផុត ។
យោងតាមការព្យាករណ៍ របស់ប្រធានសមាគមភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានធ្លាប់បានលើកឡើងថា ប្រសិនបើវិបត្តិនេះនៅតែអូសបន្លាយ ក្រុមហ៊ុនទេសចរណ៍ អាចនឹងបិទទ្វា និងមគ្គទេសក៍ នឹងបន្តគ្មានការងារធ្វើកាន់តែច្រើន។ ប៉ុន្តែក៏អាច ជួយបានខ្លះៗ ប្រសិនបើក្រុមហ៊ុនទេសចរណ៍ក្នុងស្រុក អាចងាកមករកការធ្វើសេវាកម្មក្នុងស្រុក ហើយប្រជាពលរដ្ឋ មានការធ្វើដំណើរកំសាន្តក្នុងស្រុកឱ្យបានច្រើន និងជួយប្រើសេវាកម្មខ្លះៗរបស់ ក្រុមហ៊ុនទេសចរណ៍ ឬសេវាកម្មនានាក្នុងតំបន់ទេសចរណ៍នីមួយៗ។
ជានាយកគ្រប់គ្រង នៃក្រុមហ៊ុន អ៊ែរ តេ អ៊ែរ ទួស៌ ខូអិលធីឌី (RTR Tours Co., Ltd) លោកស្រី ប៊ី ឧដ្ឋានវតី បានឱ្យដឹងថា ក្រុមហ៊ុនរបស់លោកស្រី អាចប្រឈមនឹងការក្ស័យធុន ប្រសិនបើកូវីដ១៩ នៅតែបន្តអូសបន្លាយរាប់ខែទៅមុខទៀត។
លោកស្រី ប៊ី ឧដ្ឋានវតី បាននិយាយថា «ផ្នែកហិរញ្ញវត្ថុគឺយើងអាចនិយាយបានថា ស្ទើរតែមិនមានប្រាក់ចំណូល។ ហេតុផលដែលពួកយើងនៅតែព្យាយាម នៅតែបន្តឱ្យក្រុមហ៊ុន បើកក៏ព្រោះយើង មិនចង់ឱ្យបាត់បង់កេរ្តិ៍ឈ្មោះរបស់ក្រុមហ៊ុនទេសចរណ៍មួយនេះ ដែលបានសាងកេរ្តិ៍ឈ្មោះ អស់រយៈពេល ២៤ ឆ្នាំមកហើយ ហើយទើបតែក្នុងអំឡុងពេលនេះទេ បានក្រុមហ៊ុនយើងមានការថយចុះ ប្រាក់ចំណូលយ៉ាងខ្លាំង ហើយក៏មានក្រុមហ៊ុនអាកាសចរណ៍ក្រៅស្រុក ជំពាក់យើងមិនព្រមធ្វើការវេរលុយសងយើងវិញទេ។ ខ្ញុំគិតថាមិនមែនមានតែក្រុមហ៊ុនខ្ញុំនោះទេ មានក្រុមហ៊ុនជាច្រើនក៏ជួបនឹងបញ្ហា ក្រុមហ៊ុនអាកាសចរណ៍ មិនបង្វិលលុយឱ្យវិញដែរ»។
លោកស្រីថា បន្ទាប់ពីមានប្រឈមបែបនេះហើយ គាត់ក៏បានព្យាយាមរកវិធីសាស្ត្រផ្សេងៗ ដើម្បីជាការដំណើរការឱ្យក្រុមហ៊ុននៅតែមានឈ្មោះ ដោយលោកស្រី បានបង្កើតឱ្យមានដំណើរកំសាន្តណាមួយ ដើម្បីទាក់ទាញភ្ញៀវក្នុងស្រុក និងសេវាកម្មដឹកអ្នកដំណើរតាមឧទ្ធម្ភាគចក្រ និងដឹកអ្នកជំងឺទៅប្រទេសថៃតាមឧទ្ធម្ភាគចក្រ ផងដែរ។
លោកស្រី ប៊ី ឧដ្ឋានវតី បានបន្ថែមថា «វាមិនជាចំណេញអ្វីប៉ុន្មានទេ តែយើងនេះដើម្បីឱ្យខាងបុគ្គលិកមានការងារធ្វើខ្លះៗ ហើយអតិថិជន ខ្លះនឹងមិនភ្លេចឈ្មោះក្រុមហ៊ុនយើងផងដែរ។ ក៏ព្រោះថា ប្រជាពលរដ្ឋខ្លះគាត់ចូលចិត្តដើរក្នុងក្រៅស្រុក ហើយពេលនេះពួកគាត់ចេញមិនបាន ដូចនេះយើងព្យាយាមរកទីកន្លែងណាប្លែក សម្រាប់រៀបចំដំណើរកំសាន្តទាំងនោះជូនពួកគាត់»៕
ចែករំលែកព័តមាននេះ