ការក្លាយជាតារា Instagram ក្នុងពេលបច្ចុប្បន្ននេះមិនងាយដូចកាលពីប៉ុន្មានឆ្នាំមុនឡើយ។ ប៉ុន្តែអ្វីដែលល្អគឺអ្នកមិនចាំបាច់ត្រូវការអ្នកគាំទ្ររាប់រយពាន់នាក់ដើម្បីជោគជ័យលើ Instagram ទេ ក្នុងឆ្នាំ ២០២០ នេះ ព្រោះអ្នកនៅតែអាចរកបានការផ្សាយពាណិជ្ជកម្មជាច្រើនដដែល។
ដូច្នេះមិនថាអ្នកទើបតែចាប់ផ្តើមដំណើរមួយនេះ ឬអ្នកត្រូវការគន្លឹះមួយចំនួនដើម្បីជួយដល់វត្តមានលើ Instagram របស់អ្នកទេ អ្នកអាចរៀនពីគន្លឹះសំខាន់ៗខាងក្រោមនេះពីតារា Instagram ជុំវិញពិភពលោក៖
១. រកប្រធានបទមួយច្បាស់លាស់
ឧទាហរណ៍ដូចជាអ្នកចូលមើល Explore Page របស់ Instagram និងមើលឃើញរូបភាពទេសភាពដ៏ស្រស់ស្អាតមួយ។ ព្រោះអ្នកជាមនុស្សដែលចូលចិត្តការធ្វើដំណើរកម្សាន្ត និងតែងតែរកមើលទីតាំងថ្មីៗ អ្នកក៏ចូលមើល Profile របស់អ្នកដែលបានចែករំលែកនោះ។ ជាលទ្ធផល អ្នកប្រហែលជាអាច Follow ម្នាក់នោះប្រសិនបើអ្នកមើលឃើញរូបភាពធ្វើដំណើរដទៃរបស់គេ។
ពេលដែលមនុស្សចូលមកមើល Profile របស់អ្នក ពួកគេចង់ដឹងថាតើពួកគេនឹងមើលឃើញអ្វីពីអ្នក និងជឿជាក់ថាអ្នកនឹងផ្តល់នូវរូបភាពឬវីឌីអូទាំងអស់នោះមែន។ ដូច្នេះតើអ្នកមានចំណូលចិត្តលើអ្វី? តើអ្នកមានជំនាញនិងចំណេះដឹងផ្នែកអ្វីជាងគេ?
២. រក្សាភាពជាប់លាប់
ប្រសិនបើអ្នកចង់ជោគជ័យ អ្នកត្រូវតែមានភាពជាប់លាប់។ អ្នកគួរតែរៀបផែនការចែករំលែកជារៀងរាល់ថ្ងៃ ឬនៅថ្ងៃណាមួយជាកំណត់ពីមួយសប្តាហ៍ទៅមួយសប្តាហ៍ដើម្បីឲ្យអ្នកគាំទ្ររបស់អ្នកដឹងថាពួកគេអាចមើលឃើញអ្នកនៅថ្ងៃណាខ្លះ។ អ្នកជំនាញផ្តល់យោបល់មកថាមិនថាអ្នករវល់យ៉ាងណាក្តីទេ អ្នកយ៉ាងហោចណាស់ក៏គួរចែករំលែកជា Instagram Stories ជារៀងរាល់ថ្ងៃដែរ។
៣. ផ្តោតស្មារតីលើការកសាងជាសហគមន៍
ទោះជាចំនួនអ្នក Follow មានសារៈសំខាន់ពិតមែនក្តី អ្នកក៏ត្រូវផ្តល់តម្លៃលើគុណភាពដែរដោយផ្តោតស្មារតីលើការកសាងសហគមន៍។ មានន័យថាអ្នកគាំទ្ររបស់អ្នកក៏គួរតែសកម្មក្នុងការចូលសន្ទនាជាមួយអ្នកដែរ។
ដើម្បីសម្រេចបានចំណុចនេះ អ្នកគួរតែចាប់ផ្តើមការសន្ទនា ឬឆ្លើយតបនឹង Comments ជារៀងរាល់ថ្ងៃយ៉ាងតិចណាស់ក៏ ៣០នាទីដែរ។ ប្រសិនបើអ្នកទទួលបានសារផ្ទាល់ខ្លួន អ្នកគួរតែឆ្លើយតបដោយអស់ពីចិត្តផងដែរ ៕
ចែករំលែកព័តមាននេះ