រាជធានីភ្នំពេញ ៖ ស្ថានទូតកម្ពុជាប្រចាំប្រទេសថៃ បានផ្តល់ដំណឹងថា កាលពីវេលាម៉ោង22និង00នាទីយប់ ថ្ងៃទី03 ខែសីហា ឆ្នាំ2020 មានហេតុការណ៍ផ្ទុះអាវុធបានកើតឡើងនៅក្នុងកន្លែងលេងល្បែងស៊ីសងមួយ នៅអគារលេខ 501/237 ផ្រាក់រ៉ាម3 សយ 66 សង្កាត់ឆង់នុនស៊ី ខណ្ឌយ៉ានណាវ៉ា ទីក្រុងបាងកក ។ នេះបើយោងតាមទូរទស្សន៍ជាតិកម្ពុជា បានចេញផ្សាយនាថ្ងៃទី០៤ ខែសីហា ឆ្នាំ២០២០នេះ ។
ក្នុងហេតុការណ៍នោះ បណ្តាលឱ្យមានអ្នករងរបួសចំនួន២នាក់ និងស្លាប់ចំនួន 4នាក់ ដែលនៅក្នុងចំណោមអ្នកស្លាប់ មានពលរដ្ឋខ្មែរម្នាក់ឈ្មោះ ម៉ៅ ស្រីពៅ ភេទស្រី អាយុ29ឆ្នាំ មានទីលំនៅសង្កាត់ប៉ោយប៉ែត ខេត្តបន្ទាយមានជ័យ ។
ស្ថានទូតកំពុងធ្វើការជាមួយ អាជ្ញាធរថៃ ជាពិសេសជាមួយប៉ូលិសដែលបានបញ្ជាក់ថា គេពុំទាន់អាចផ្ដល់ព័ត៌មានបានទេ រង់ចាំម៉ោង១រសៀលសិន ។ មន្ត្រីស្ថានទូតកំពុងបន្តធ្វើដំណើរទៅកាន់កន្លែងតម្កល់សព ចូលរួមសង្កេតការក្នុងការធ្វើកោសល្យវិច្ច័យរកមូលហេតុនៅពីក្រោយការបាញ់សម្លាប់ ។
ក្រោយបានទំនាក់ទំនងជាមួយសាច់ញាតិនៅខ្មែររួចហើយ និងសាច់ញាតិបានស្នើស្ថានទូតជួយសម្របសម្រួល និងចេញឯកសារនាំសពទៅធ្វើបុណ្យតាមប្រពៃណីនៅខ្មែរ ៕
ចែករំលែកព័តមាននេះ