ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា ប្តីប្រពន្ធ២នាក់បានយករណាយន្តទៅកាត់ឈើ ដើម្បីធ្វើជាអុសលក់ តែជាគ្រោះអកុសលខណៈពេលបុរសជាប្តីកំពុងតែអារឈើនោះ បែរជារលំបាក់ដើមឈើរសង្កត់ពីលើប្រពន្ធខ្លួន បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុតែម្តង ហេតុការណ៍នេះបានកើតឡើងកាលពីម៉ោង១១ព្រឹក ថ្ងៃទី៣ ខែសីហា ឆ្នាំ២០២០ នៅចំណុចត្រពាំងជ្រៃ ស្ថិតក្នុងភូមិសំណាក ឃុំកកោះ ស្រុកសន្ទុក ខេត្តកំពង់ធំ ។
សេចក្តីរាយការណ៍បន្តថា បុរសជាប្តី និងជាអ្នកកាន់រណាយន្តកាត់ឈើខាងលើឈ្មោះ សៀ តូច ភេទប្រុស អាយុ៣៧ឆ្នាំ មានមុខរបរកាត់អុសលក់ មានទីលំនៅនៅក្នុងភូមិ-ឃុំកើតហេតុខាងលើ ចំណែកជនរងគ្រោះជាប្រពន្ធឈ្មោះ អ៊ុយ សុផន អាយុ៣៧ឆ្នាំ។
បើតាមសម្តីសាច់ញាតិជនរងគ្រោះបាននិយាយថា ទាំងពីរនាក់ប្តីប្រពន្ធនេះ កន្លងមកពុំដែលចេះឈ្លោះប្រកែកគ្នានោះទេ ហើយប្រពន្ធតែងតែទៅតាមប្ដីរាល់ដង ខណៈនៅពេលដែលប្តីទៅកាត់អុសគ្រប់ទីកន្លែង ។ លុះមុនពេលកើតហេតុ ទាំងពីរនាក់ប្តីប្រពន្ធបាននាំគ្នាទៅកាត់ដើមឈើធ្វើអុស ដែលជាឈើទាំងនោះគឺនៅក្នុងដីរបស់បងថ្លៃខ្លួនដែលបានឱ្យពួកគេកាត់ធ្វើអុសលក់ ។
ប្រភពដដែលបន្តថា នៅពេលដែលកាត់អស់ចំនួនពីដើម ក្នុងនោះមានដើមក្រឡាញ់១ដើម និងដើមចាន់ទី១ដើម រួចក៏បន្តទៅកាត់ដើមសាឡាត់មួយទៀតដែលមានគល់ទំហំមុខកាត់ជាង៣០ស.ម ។ នៅពេលដែលបុរសជាប្តីកំពុងតែកាត់ឈើនោះ ពុំបានមើលឃើញប្រពន្ធនោះទេ លុះពេលដើមឈើរាបនឹងដួលរលំចុះ ក៏ឃើញប្រពន្ធរត់ទៅបណ្តោយស្របនឹងដើមឈើតែម្តង ចៃដន្យគ្រានោះប្រពន្ធក៏ទាក់ជើងនឹងវល្លិ រួចដួលផ្កាប់មុខ ក៏ត្រូវដើមឈើរលំសង្កត់ចំពីលើចង្កេះ បណ្តាលឱ្យស្ត្រីជាប្រពន្ធត្រូវបាត់បង់ជីវិតភ្លាមនៅកន្លែងកើតហេតុយ៉ាងអាណោចអាធ័មតែម្តង។
ក្រោយពេលកើតហេតុ សមត្ថកិច្ចជំនាញបានចុះទៅដល់ទីកន្លែងកើតហេតុ ដើម្បីធ្វើការពិនិត្យកន្លែងកើតហេតុ និងសាកសពជនរងគ្រោះ ឃើញថា នៅលើចង្កេះមានស្នាមជាំក្រម៉ៅធ្ងន់ធ្ងរ (សង្ស័យបាក់ឆ្អឹង) ចំណែកនៅលើដើមទ្រូង និងនៅលើភ្លៅខាងឆ្វេងមានស្នាមជាំសាច់ ។ ក្រោយពេលពិនិត្យចប់ សមត្ថកិច្ចបានធ្វើកំណត់ហេតុ រួចប្រគល់សពជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។
ចែករំលែកព័តមាននេះ