ដាណាង ៖ មនុស្ស១៥នាក់ នៅដាណាង និង៦នាក់ផ្សេងទៀត នៅខេត្តជាប់គ្នានោះ គឺខេត្តក្វាងណាម បានឆ្លងវីរុស Covid-19 នាំឲ្យករណីឆ្លងសរុបនៅទូទាំងប្រទេសវៀតណាម កើនដល់ ៦៤២ករណីហើយ គិតត្រឹមល្ងាចថ្ងៃទី០៣ សីហា ២០២០នេះ ។
នៅព្រឹកថ្ងៃចន្ទ ស្ត្រីម្នាក់នៅមើលថែអ្នកជំងឺនៅមន្ទីរពេទ្យដាណាង ក៏ត្រូវបានគេធ្វើរោគវិនិច្ឆ័យរកឃើញថា មាន ឆ្លង Covid-19 នាំយកចំនួនសរុប ត្រឹមរយៈពេល១ថ្ងៃចន្ទនេះ មានដល់ ២២ករណី ។
អ្នកជំងឺកូវីដ-១៩ ចំនួន៦នាក់ នៅខេត្តក្វាងណាម មានអាយុចន្លោះពី៣៨ ទៅ ៨៣ឆ្នាំ ។ ក្នុងចំណោម៦នាក់ មាន ៣នាក់ បានទៅសួរសុខទុក្ខអ្នកជំងឺនៅមន្ទីរពេទ្យដាណាង នាពេលថ្មីៗនេះ ។ ២នាក់ទៀត បាននៅមើលថែ ជាប់ទាក់ទងយ៉ាងជិតស្និទ្ធជាមួយអ្នកជំងឺនៅមន្ទីរពេទ្យ ខណៈដែលម្នាក់ទៀត មកទទួលការព្យាបាលតម្រងនោម និងប្រព័ន្ធចក្ខុវិទ្យារបស់មន្ទីរពេទ្យ ។
អ្នកជំងឺទាំង ៦នាក់ កំពុងដាក់នៅដាច់ដោយឡែកពីគ្នាហើយ បច្ចុប្បន្នពួកគេកំពុងសម្រាកព្យាបាលនៅមន្ទីរពេទ្យខេត្តក្វាងណាម ។
ចំណែកអ្នកជំងឺ១៥នាក់ នៅដាណាង មានអាយុចន្លោះពី២០ ទៅ ៧៨ឆ្នាំ ។ ក្នុងចំណោមពួកគេ មាន១២ករណីមានទំនាក់ទំនងជាមួយមនុស្ស៧នាក់ ដែលធ្វើរោគវិនិច្ឆ័យឃើញ វិជ្ជមាន Covid-19 ។ នៅសល់៣នាក់ទៀត គឺជាមនុស្សដែលបានមើលថែទាំសមាជិកគ្រួសារនៅមន្ទីរពេទ្យដាណាង ។
ជាមួយគ្នានេះផងដែរ នៅថ្ងៃចន្ទនេះ ក៏មានស្ត្រីអាយុ៥៨ឆ្នាំ ដែលកំពុងទទួលការព្យាបាលនៅខេត្តហៃដុង ភាគខាងជើង ត្រូវបានប្រកាសជាសះស្បើយពីជំងឺ Covid-19 នាំឲ្យចំនួនអ្នកជាសះស្បើយ សរុបចំនួន ៣៧៤នាក់ ក្នុងចំណោម ៦៤២ករណី ។
Covid-19 បានផ្ទុះឡើងវិញ ចម្លងក្នុងសហគមន៍ នៅដាណាងប្រទេសវៀតណាម នៅថ្ងៃទី២៥ ខែកក្កដា បន្ទាប់ពីមិនមានករណីឆ្លងសោះ ជាង៣ខែ ។
អ្នកជំងឺកូវីដ-១៩ ចំនួន៦នាក់ បានស្លាប់ចាប់តាំងពីថ្ងៃសុក្រមក អ្នកស្លាប់មានអាយុចន្លោះពី៥៣ ទៅ៨៦ឆ្នាំ ហើយពួកគេទាំងអស់សុទ្ធតែមានជំងឺរ៉ាំរ៉ៃ ប្រចាំកាយ ។ រហូតមកដល់ពេលនេះ មានអ្នកជំងឺ ១៣នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ ។
ក្រៅពីឆ្លងក្នុងសហគមន៍ នៅដាណាង ក៏មាននៅទីក្រុងនិងខេត្ត ចំនួន៨ផ្សេងទៀត ផងដែរ ។ ឥឡូវនេះ មនុស្សជាង ១០៣.០០០នាក់ បាននិងកំពុងដាក់នៅដាច់ដោយឡែកពីគេ នៅក្នុងប្រទេសវៀតណាម ៕
ចែករំលែកព័តមាននេះ