រាជធានីភ្នំពេញ ៖ ស្ត្រីជាអាជីវករលក់គ្រឿងអគ្គិសនីម្នាក់ បានប្តឹងកម្លាំងមានសម្ថកិច្ចឲ្យជួយស្ទាក់ចាប់រថយន្ត ទេសចរណ៍ម៉ាកហ៊ីយ៉ាន់ដាយពណ៌ស ពាក់ស្លាកលេខ ព្រះសីហនុ ២A-៧៤៥៩ មួយគ្រឿងក្រោយពីរូបគាត់ ត្រូវបានបុរសម្នាក់ដែលមានគណនីហ្វេសប៊ុកឈ្មោះ «រតនៈ» ឆាតមកកុម្មង់ទិញកង្ហារ និងខ្សែភ្លើងដែលមានតម្លៃ សរុបជិត ២ពាន់ដុល្លារ និងមានឈ្មោះ «យូ» ជាអ្នកទទួល។
ហើយគាត់ក៏បានប្រើបុគ្គលិកប្រុសៗពីរនាក់ ដឹកតាមរ៉ឺម៉កម៉ូតូយកទៅឲ្យនៅម្តុំផ្លូវ២០០៤ ដល់រថយន្តហើយនៅមិនទាន់ឃើញវេលុយមកឲ្យនោះ ក៏ឆាតទៅសួរ តែមិនចូលទាក់ទងលែងបាន ដោយមានការសង្ស័យទើបប្តឹងសម្ថកិច្ចឃាត់ទាំងរថយន្ត និងអ្នកបើកបរតែម្តង។ ករណីនេះដែរបានកើតឡើងកាលពីវេលាម៉ោង០៣ និង៤៥នាទីរសៀល ថ្ងៃទី០៣ ខែសីហា ឆ្នាំ២០២០ នៅតាមបណ្តោយផ្លូវព្រះសុធារស ក្នុងសង្កាត់ទន្លេបាសាក់ ខណ្ឌចំការមន។
ស្ត្រីរងគ្រោះបានប្រាប់ឱ្យដឹងថា កាលពីពេលកន្លងទៅមានបុរសម្នាក់ដែលប្រើគណនីហ្វេសប៊ុកឈ្មោះ «រតនៈ» បានឆាតមកកុម្មង់ទិញកង្ហារ និង ខ្សែភ្លើងដែលមានតម្លៃសរុបចំនួនជិត២ពាន់ដុល្លារ ដោយបង្គាប់ឲ្យដាក់ឈ្មោះអ្នកទទួល ឈ្មោះ «យូ» នៅឯខេត្តព្រៃវែងវិញ។ ហើយរូបគាត់ក៏បានប្រើឲ្យបុគ្គលិកប្រុសៗពីរនាក់ដឹកពីហាងលក់គ្រឿងអគ្គសនី របស់គាត់ម្តុំវត្តកោះ តាមរ៉ឺម៉កម៉ូតូយកទៅឲ្យរថយន្តមួយគ្រឿងខាងលើនៅរង់ចាំនៅម្តុំផ្លូវ២០០៤។
ពេលដែលរូបគាត់បានប្រើបុគ្គលិកដឹកយកទៅ និងលើកអីវ៉ាន់ដាក់លើរថយន្តអស់ហើយ រូបគាត់ក៏បានឆាតទៅសួរនាំឈ្មោះ «រតនៈ» ឲ្យវេរលុយមកឲ្យជាច្រើនលើកច្រើនសារក៏ស្រាប់ទាក់ទងលែងចូល ដោយរូបបុគ្គលិករបស់គាត់ម្នាក់ឡើងជិះក្នុងរថយន្ត និងម្នាក់ទៀតជាអ្នកបើករ៉ឺម៉កតាមផងដែរ។ តាមប្រភពដដែល បានប្រាប់បន្តទៀតថា ពេលដែលរូបគាត់ឆាតតាមហ្វេសប៊ុកទៅបុរសម្នាក់ដែលមានគណនីហ្វេសប៊ុកឈ្មោះ រតនៈ សួរនាំរឿងវេលុយឲ្យលែងបានហើយបុគ្គលិករបស់គាត់ជិះនៅក្នុងរថយន្ត ដោយមានបុរសម្នាក់ចេះតែបើកចុះឡើង បន្តិចទៅទិនេះបន្តិចទៅទីនោះដោយមានការសង្ស័យរូបគាត់ក៏បានប្តឹងកម្លាំងមានសម្ថកិច្ចឲ្យជួយឃាត់រថយន្តខាងលើតែម្តង។
ភ្លាមនោះកម្លាំងនគរបាលប៉ុស្តិ៍ទន្លេបាសាក់ក៏បានធ្វើការសួរនាំបុរសជាអ្នកបើកបរ រថយន្តខាងលើ បាននិយយាយប្រាប់ថា «រូបគាត់ត្រូវបានបុរសម្នាក់ឈ្មោះ យូ ជាអ្នកលក់គ្រឿងអគ្គិសនីនៅផ្សារស្នេហ៍ ម្តុំភ្នំឈើកាច់ ស្រុកបាភ្នំខេត្តព្រៃវែង មានផ្ទះក្បែរគ្នាជួលឲ្យដឹកគ្រឿងអគ្គិសនីយកទៅឲ្យក្នុងតម្លៃ៣០ដុល្លារ និងបានប្រាប់ថា រូបគាត់បានវេរលុយទៅឲ្យឈ្មោះ រតនៈ រួចហើយ»។ ពាក់ព័ន្ធទៅនឹងករណីខាងលើនេះដែរ ទំនងជាស្ត្រីរងគ្រោះ ជាអ្នកលក់គ្រឿងអគ្គិសនីចាញ់បោកបុរសម្នាក់ដែលប្រើគណនីហ្វេសប៊ុកឈ្មោះ «រតនៈ» ធ្វើជាកុម្មង់ទិញកង្ហារ និង ខ្សែភ្លើង រួចហើយយកទៅលក់បន្តឲ្យបុរសម្នាក់ឈ្មោះ «យូ» បន្តយកលុយរបស់ហើយក៏បិទគណនីហ្វេសប៊ុក របស់គេតែម្តងទៅតាមមើល។
ក្រោយពេលកើតហេតុ ដោយសារតែទីតាំងហាងលក់គ្រឿងអគ្គិសនីខាងលើ មានទីតាំងស្ថិតនៅម្តុំវត្តកោះ ក្នុងសង្កាត់បឹងរាំង ខណ្ឌដូនពេញ ជាកន្លែងកើតហេតុនោះ កម្លាំងនគរបាលប៉ុស្តិ៍ទន្លេបាសាក់ក៏បានប្រគល់ទាំងរថយន្ត គ្រឿងអគ្គិសនីនៅក្នុងរថយន្ត និងបុរសអ្នក បើកបរទៅឲ្យនគរបាលប៉ុស្តិ៍បឹងរាំងធ្វើការសាកសួរជាបន្តទៀត៕ ដោយ ៖ ភី ផល
ចែករំលែកព័តមាននេះ