ខេត្តកំពង់ស្ពឺ ៖ ក្រុមជនសង្ស័យជាមុខសញ្ញាចែកចាយ និងជួញដូរសារធាតុញៀនខុសច្បាប់ចំនួន៣នាក់ ត្រូវបានសមត្ថកិច្ចនគរបាលក្រុងច្បារមន សហការជាមួយកម្លាំងនគរបាលប្រឆាំងបទល្មើសគ្រឿងញៀនខេត្ត ដឹកនាំដោយលោកឧត្តមសេនីយ៍ត្រី ម៉ាត់ ធុច ស្នងការរងទទួលផែនប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តកំពង់ស្ពឺ ក្រោមការចង្អុលបង្ហាញពីលោកឧត្តមសេនីយ៍ទោស្នងការនគរបាលខេត្ត និងមានការឯកភាពពីលោកស្រីព្រះរាជអាជ្ញាអមសាលាដំបូងខេត្តកំពង់ស្ពឺ ដកហូតវត្ថុតាងសាធាតុញៀនខុសច្បាប់ចំនួន១៦កញ្ចប់ ។
ការបង្ក្រាបក្រុមជនសង្ស័យជាមុខសញ្ញាខាងលើនេះ កាលពីវេលាម៉ោង១២និង១៥នាទីរសៀល ថ្ងៃទី២ ខែសីហា ឆ្នាំ២០២០ នៅចំណុចភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្ដកំពង់ស្ពឺ ។
តាមការអោយដឹងពីសមត្ថកិច្ចនគរបាលថា ក្រុមជនសង្ស័យជាមុខសញ្ញាចែកចាយ និងជួញដូរគ្រឿងញៀនមាន ទី១-ឈ្មោះ ម៉ៅ រ៉ាដែន ភេទប្រុស អាយុ១៦ឆ្នាំ មុខរបរមិនពិតប្រាកដ រស់នៅភូមិពាណិជ្ជកម្ម សង្កាត់រការធំ ក្រុងច្បារមន ទី២-ឈ្មោះ វ៉ង សំបូរ ហៅកុយ ភេទប្រុស អាយុ២០ឆ្នាំ មុខរបរមិនពិតប្រាកដ រស់នៅភូមិត្រស់ សង្កាត់ស្វាយក្រវ៉ាន់ ក្រុងច្បារមន និងទី៣-ឈ្មោះ ពេជ្រ ណាសៀន ភេទប្រុស អាយុ១៧ឆ្នាំ មុខរបរមិនពិតប្រាកដ រស់នៅភូមិអូរ១ សង្កាត់៤ ក្រុងកំពង់សោម ខេត្តព្រះសីហនុ ។
មន្ត្រីនគរបាលដដែលបន្តថា នៅមុនពេលឃាត់ខ្លួនក្រុមជនសង្ស័យខាងលើ គឺកម្លាំងនគរបាលក្រុងច្បារមន ធ្វើការស្រាវជ្រាវតាមដានក្រុមជនសង្ស័យខាងលើយូរមកហើយ ដោយក្រុមជនសង្ស័យតែងតែពពាក់ពពូនគ្នា ចរាចរណ៍គ្រឿងញៀននៅតំបន់ខាងលើនេះ រួចមកកម្លាំងបានធ្វើការបង្ក្រាបបានតែម្តង ។
ក្រោយឃាត់ខ្លួននគរបាលដកហូតវត្ថុតាងរួមមាន ម្សៅក្រាមពណ៌សថ្លា សង្ស័យជាគ្រឿងញៀន (ប្រភេទម៉ាទឹកកកចំនួន១៦កញ្ចប់ ក្នុងនោះមាន១តូច និង១៥ធំ ជញ្ជីងថ្លឹងគ្រឿងញៀន១ រួមនឹងឧបករណ៍ប្រើប្រាស់គ្រឿងញៀនមួយចំនួនថែមទៀត ។
បច្ចុប្បន្នមុខសញ្ញា៣នាក់ រួមជាមួយវត្ថុតាងគ្រឿងញៀនខាងលើ ការិយាល័យជំនាញកសាងសំណុំរឿង បញ្ជូនទៅតុលាការដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ