ខេត្តស្វាយរៀង៖ លោក ប៉ុក ម៉ាន់នី អនុរដ្ឋលេខាធិការក្រសួងយុត្តិធម៌បានមានប្រសាសន៍ថា មូលហេតុនៃការដុតបំផ្លាញគ្រឿងញៀនចោល គឺរាជរដ្ឋាភិបាលមានការព្រួយបារម្ភខ្លាចគ្រឿងញៀនឆ្លងចូលក្នុងសហគមន៍ ជាពិសេសកុមារ ។ បើគ្រឿងញៀនធ្លាក់ទៅដល់ដៃក្រុមឧក្រិដ្ឋជន គឺពួកវានិងចែកចាយឲ្យយុវជន ជាពិសេសកុមារ ពីព្រោះគ្រឿងញៀន បើជនណាសេពវាហើយនឹងធ្វើឲ្យប៉ះពាល់ដល់សុខភាពនិងសង្គមយ៉ាងធ្ងន់ធ្ងរ ។ ដូច្នេះត្រូវតែដុតបំផ្លាញចោលដើម្បីទប់ស្កាត់និងបង្ក្រាបក្រុមឧក្រិដ្ឋជនយកទៅចែកចាយ ។
លោក ប៉ក់ ម៉ាន់នី បញ្ជាក់ថា អ្នកសេពគ្រឿងញៀនគឺជាជនរងគ្រោះ ការអនុវត្តច្បាប់ទៅលើជនណាដែលចែកចាយ ជួញដូរគ្រឿងញៀនដោយខុសច្បាប់គឺសមត្ថកិច្ចត្រូវតែបង្ក្រាបនិងចាប់មកផ្តន្ទាទោសតាមច្បាប់ ។
លោកបន្តទៀតថា កន្លងមកមានប្រជាពលរដ្ឋនិងមហាជនមួយចំនួនបានវាយតម្លៃថា ឃើញតែសមត្ថកិច្ចចាប់ មិនដែលឃើញដុតបំផ្លាញចោល ចាប់ហើយលែងៗ និងចោទ ក្រសួងយុត្តិធម៌ថា បណ្តោយឲ្យតុលាការដោះលែងជនសង្ស័យ ជួញដូរគ្រឿងញៀន ។ ការរិះគន់បែបនេះហើយទើបរាជរដ្ឋាភិបាលបង្កើតឲ្យមានទិវាដុតបំផ្លាញគ្រឿងញៀន ហើយលោកបានបញ្ជាក់ទៀតថា ហេតុអីបានជានៅខេត្តស្វាយរៀងដុតគ្រឿងញៀន២ដង ដោយអាជ្ញាធរជាតិបានពិភាក្សាជាមួយក្រសួងយុត្តិធម៌គឺយកទីតាំងខេត្តណាដែលចាប់បានគ្រឿងញៀនច្រើនជាងគេទើបសម្រេចយកខេត្តស្វាយរៀងជាទីតាំងដុតបំផ្លាញគ្រឿងញៀនជាលើកទី២ នៅថ្ងៃទី៤ សីហា ២០២០នេះ ។
លោក ប៉ក់ ម៉ាន់នី មានប្រសាសន៍បែបនេះនៅក្នុងពិធីពិនិត្យវត្ថុតាងគ្រឿងញៀនដែលយកមកតាមបណ្តាខេត្តទាំងបួន រួមមានខេត្តកំពង់ចាម ខេត្តត្បូងឃ្មុំ ខេត្តព្រៃវែង និងខេត្តស្វាយរៀង នាព្រឹកថ្ងៃទី៣សីហា២០២០ នៅសាលសវនាការសាលាដំបូងខេត្តស្វាយរៀងដោយមានការអញ្ជើញចូលរួមពីសំណាក់លោក តូច ប៉ូលីវ៉ា អភិបាលរងខេត្តស្វាយរៀងទទួលបន្ទុកគ្រប់គ្រងគ្រឿងញៀនខេត្ត លោកអភិបាលរងខេត្តកំពង់ចាម ខេត្តត្បូងឃ្មុំ ខេត្តព្រៃវែង លោកព្រះរាជអាជ្ញាទាំងបួនខេត្ត តំណាងអាជ្ញាធរជាតិប្រយុទ្ធប្រឆាំងគ្រឿងញៀនលោកស្នងការរង លោកមេបញ្ជាការរងកងរាជអាវុធហត្ថខេត្តទាំងបួនមន្ត្រីជំនាញជាច្រើនកុះករ ។
ការពិនិត្យនេះដែរដើម្បីឲ្យគណៈកម្មការបានជឿជាក់ថាពិតជាគ្រឿងញៀន ត្រៀមយកទៅដុតបំផ្លាញចោល ។ ខេត្តកំពង់ចាម មាន៥៣រឿង ចាប់បានគ្រឿងញៀន ៧២៨,១៩ក្រាម ខេត្តត្បូងឃ្មុំ ២០០សំណុំរឿង គ្រឿងញៀន៩៧៥,៧០ក្រាម ។ ខេត្តព្រៃវែង ២០៥សំណុំរឿង គ្រឿងញៀន១៩១១,២៥ក្រាម ។ ខេត្តស្វាយរៀង មាន៦៤សំណុំរឿង ចាប់គ្រឿងញៀនបាន៣៥គីឡូក្រាម៤៩៧ក្រាម ។
សរុបទាំង៤ខេត្តមាន៥២២សំណុំរឿង គ្រឿងញៀនសរុប៣៦គីឡូក្រាម៨៣៤,២៩ក្រាម ។ សារធាតុគីមី២២៦៨,៨៩ក្រាមនិងកញ្ឆា ចំនួន៨,៩៦ក្រាម ។ ត្រូវបានគណៈកម្មការពិនិត្យនិងវេចខ្ចប់គ្រឿងញៀនយកទៅរក្សាទុកកន្លែងមានសុវត្ថិភាពត្រៀមដុតបំផ្លាញចោលនៅថ្ងៃនេះ ៕
ចែករំលែកព័តមាននេះ