រាជធានីភ្នំពេញ ៖ ការជំរុញឲ្យមានរោងចក្រផលិតចំណីសត្វក្នុងស្រុក ដើម្បីផ្គត់ផ្គង់ការចិញ្ចឹមត្រី ជ្រូក មាន់ កង្កែប របស់ប្រជាកសិករ បានកំពុងដំណើរការទៅមុខ ។
នៅថ្ងៃទី៣ ខែសីហានេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបប្រជុំជាមួយរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីរកមធ្យោបាយដោះស្រាយពីបញ្ហាតម្លៃអគ្គិសនី និងដើមទុន ដែលជាឧបសគ្គដល់ ការបង្កើតរោងចក្រចំណីសត្វ នោះ ។
កម្ពុជាកំពុងយកចិត្តទុកដាក់ដល់ការងារចិញ្ចឹមសត្វ ដើម្បីផ្គត់ផ្គង់តម្រូវការក្នុងស្រុក និងឈានដល់ការនាំចេញ ។ ការចិញ្ចឹមសត្វជាផ្នែកសំខាន់ដើម្បីលើកកម្ពស់ជីវភាព សេដ្ឋកិច្ចប្រជាកសិករ នៅក្នុងសម័យកូវីដ១៩នេះផង ។ កាលពីពាក់កណ្តាល ខែកក្កដា កន្លងទៅនេះ ក្នុងឱកាសចុះពិនិត្យការចិញ្ចឹមត្រី នៅខេត្តព្រៃវែង សម្តេចនាយករដ្ឋមន្ត្រី បានជំរុញឲ្យរដ្ឋមន្ត្រីក្រសួងកសិកម្មនិងរដ្ឋមន្ត្រីក្រពាក់ព័ន្ធនានា រួមគ្នាជំរុញបង្កើតរោងចក្រផលិតចំណីសត្វនៅក្នុងស្រុកដើម្បីលើកកម្ពស់ការចិញ្ចឹមសត្វនៅកម្ពុជា ពីចំនួន៤១ពាន់គ្រួសារនាពេលបច្ចុប្បន្ន ឲ្យកើនដល់១០ម៉ឺនគ្រួសារក្នុងពេលអនាគត។ ឧបសគ្គមួយក្នុងចំណោមបញ្ហាជាមួយចំនួន ដែលរាំងស្ទះដល់ការចិញ្ចឹមសត្វក្នុងស្រុកចំណីសត្វនេះ ។
កសិករចិញ្ចឹមសត្វនាពេលបច្ចុប្បន្ននេះ ទិញចំណីសត្វដែលនាំចូលពីប្រទេសជិតខាង ដែលធ្វើឲ្យថ្លៃដើមនៃការចិញ្ចឹមសត្វក្នុងប្រទេសមានតម្លៃខ្ពស់លក់មិនចំណេញ មិនអាចប្រកួតប្រជែងជាមួយសាច់សត្វនាំចូល ។ ក្នុងការលើកកម្ពស់ដល់ការចិញ្ចឹមសត្វនៅក្នុងស្រុក រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បានធ្វើការពិភាក្សាលើបញ្ហាប្រឈមទាំងឡាយរបស់កសិករ ដូចជា ការលើកកម្ពស់ផលិតភាពផលិតកម្មចំណីសត្វក្នុងស្រុកប្រកបដោយគុណភាពឲ្យបានគ្រប់គ្រាន់ និងមានភាពប្រកួតប្រជែង ។
ធានាបរិមាណផ្គត់ផ្គង់សាច់សត្វ និងត្រីឱ្យដល់ទីផ្សារក្នុងស្រុកគ្រប់គ្រាន់ប្រកបដោយគុណភាព និងសុវត្ថិភាព ។ ពង្រីកសក្តានុពលវិនិយោគលើការបង្កើតកសិដ្ឋានចិញ្ចឹមសត្វ រោងចក្រផលិតចំណីសត្វ ការប្រើប្រាស់វត្ថុធាតុដើមក្នុងស្រុក និងបង្កើតការងារនៅមូលដ្ឋានផ្ទាល់ ជាដើម៕
ចែករំលែកព័តមាននេះ