ខេត្តមណ្ឌលគិរី ៖ នៅទីបំផុត គម្រោងដំបូងត្រូវបានអាជ្ញាធរបើកការដ្ឋានសាងសង់ផ្លូវចូលទីតាំងព្រលានយន្តហោះថ្មីនៅខេត្តមណ្ឌលគិរី ដែលស្ថិតក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី នាព្រឹកថ្ងៃ ទី ៣១ ខែកក្កដា ឆ្នាំ ២០២០។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរីបានថ្លែងថា ការបើកការដ្ឋានសាងសង់ផ្លូវមួយខ្សែនេះ គឺជាជំហានដំបូងដែលស្ថិតនៅក្នុងគម្រោងធំ និងដើម្បីបង្កភាពងាយស្រួលដល់អ្នកជំនាញបច្ចេកទេស ដើម្បីចូលទៅសិក្សាលម្អិត ដែលគ្រោងនឹងបញ្ចប់នៅក្នុងពេលខាងមុខនេះ។
រហូតមកដល់ពេលនេះ គម្រោងសាងសង់ព្រលានយន្តហោះក្នុងខេត្តមណ្ឌលគីរី គឺស្ថិតនៅក្នុងដំណាក់កាលសិក្សានៅឡើយ ដោយនៅមិនទាន់អាចកំណត់ពីពេលវេលាចាប់ផ្តើមអនុវត្តជាក់លាក់នៅឡើយនោះទេ ខណៈដែលទំហំនៃថវិការវិនិយោគត្រូវបានអ្នកជំនាញធ្វើការប៉ាន់ស្មានស្ថិតនៅក្នុងរង្វង់៦០លានដុល្លារ។ អាជ្ញាធរថ្នាក់ខេត្តបានធ្វើការកំណត់ព្រំដីព្រលានយន្តហោះថ្មី ដែលមានផ្ទៃក្រឡាប្រមាណ ៦០០ ហិកតាស្ថិតនៅឆ្ងាយពីក្រុងសែនមនោរម្យជាង ២០គីឡូម៉ែត្រ ខណៈព្រលានយន្តហោះចាស់នឹងអភិវឌ្ឍធ្វើជាសួនសាធារណៈ ។
អភិបាលខេត្តបានលើកឡើងទៀតថា កន្លងទៅខេត្តធ្លាប់មានព្រលានយន្តហោះ ចាស់រួចមកហើយ តាំងពីសម័យរំដោះ ឆ្នាំ១៩៧៩ ។ ប៉ុន្តែដោយសារតែប្រភេទ ព្រលានយន្តហោះនៅក្នុងដំណាក់កាលនោះវាលែងស័ក្តិសម នឹង ស្ថានភាពនាពេលបច្ចុប្បន្នព្រោះ តែមានប្រជាពលរដ្ឋ រស់នៅជុំវិញច្រើនហើយ ផ្ទៃដីក៏តូច ។ ព្រលានយន្តហោះចាស់ គឺនៅសល់ដីប្រមាណ១៩ ហិកតា ប៉ុណ្ណោះ។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោកស៊ិន ចាន់សេរីវុត្ថា ធ្លាប់បានមានប្រសាសន៍កាលពីពេលថ្មីៗនេះថា រហូតមកដល់ពេលនេះគម្រោងនៃការសាងសង់ព្រលានយន្តហោះ ស្ថិតនៅខេត្តមណ្ឌលគីរី នៅមិនទាន់កំណត់ថាអាចចាប់ផ្តើមដំនើរការនៅពេលណាឱ្យប្រាកដនោះទេ ដោយពេលនេះគឺស្ថិតនៅក្នុងដំណាក់កាលសិក្សានៅឡើយ។
លោកបានបញ្ជាក់ថា ការសិក្សាពីគម្រោងសាងសង់ អាចចំណាយពេលប្រហែល១ឆ្នាំ ហើយបន្ទាប់មកយើងSubmit ឱ្យរដ្ឋាភិបាល ដើម្បីពិនិត្យនិងសម្រេចថា តើការអភិវឌ្ឍអាកាសយានដ្ឋាន ព្រលានយន្តហោះខេត្តមណ្ឌលគីរីនេះ គួរធ្វើរដ្ឋឬគួធ្វើដោយរដ្ឋជាមួយឯកជន ឬធ្វើដោយឯកជនផ្ទាល់ ដែលជាជម្រើសផ្សេងទៀតបន្ទាប់ពីការសិក្សា។
លោកបានបន្តទៀតថា ការសិក្សារបស់យើងនេះ ក៏ផ្តោតទៅលើផលប៉ះពាល់ និងវិភាគពីកត្តាសេដ្ឋកិច្ចផងដែរ ថាតើការសាងសង់អាកាសយានដ្ឋាននេះ មានផលជាវិជ្ជមានផ្នែកសេដ្ឋកិច្ចយ៉ាងម៉េច និងអវិជ្ជមានយ៉ាងម៉េច ចឹងទាល់តែការសិក្សាទៅលើចំណុចទាំង៣នេះចប់ បានគេសម្រេចចិត្តបាន៕
ចែករំលែកព័តមាននេះ