ខេត្តកំពង់ឆ្នាំង ៖ រហូតដល់ថ្ងៃទី១៥ ខែតុលា ជំនន់ទឹកភ្លៀងនៅខេត្តកំពង់ឆ្នាំងស្រកតិចតួចប៉ុណ្ណោះ ព្រោះតែទទួលរងទឹកភ្លៀងជារៀងរាល់ថ្ងៃ ជួនយប់ ជួនថ្ងៃ គ្រាន់តែមិនធ្លាក់ជាប់ពេញមួយថ្ងៃប៉ុណ្ណោះ។ ជំនន់ទឹកភ្លៀងធ្វើឱ្យស្រូវប្រជាកសិករស្ទើរទូទាំងខេត្តលិចលង់ដែលតាមមន្ត្រីជំនាញកសិកម្មថា មានរយៈពេល៤ថ្ងៃមកហើយ ប៉ុន្តែសង្ឃឹមអាចសង្គ្រោះបាន បើសិនលិចលង់ក្រោមរយៈពេល១០ថ្ងៃ តែបើលើសពី១០ថ្ងៃពិតជារងការខូចខាតពុំខាន។
ចំពោះផ្លូវគមនាគមន៍វិញ អាជ្ញាធរខេត្តដែលទទួលបានការណែនាំពីរដ្ឋមន្ត្រីក្រសួងបានចាត់វិធានការណ៍ទប់ស្កាត់ការធ្វើចរាចររបស់រថយន្តធុនធ្ងន់លើផ្លូវជាតិ ដោយឱ្យអាជ្ញាធរស្រុកឃាត់ និងផ្អាករថយន្តធុនធ្ងន់់តាមស្រុកនីមួយៗរហូតដល់មានសេចក្តីណែនាំជាថ្មីទើបអាចឱ្យធ្វើចរាចរវិញបាន។ ការទប់ស្កាត់នេះការពារផ្លូវជាតិដែលកំពុងលិចលង់ក្រែងបាក់ស្រុតដោយការដឹកធ្ងន់។
លោកអៀរ ប៊ុនធឿន នាយការិយាល័យចរាចរណ៍ជើងគោកខេត្តឱ្យដឹងថា ដោយទទួលបានសេចក្តីណែនាំពីក្រសួងសាធារណការ ចុះថ្ងៃទី១៤ តុលា ស្តីពីការទប់ស្កាត់រថយន្តធុនធ្ងន់ដែលធ្វើចរាចរលើថ្នល់ជាតិលេខ៥ពីភ្នំពេញទៅប៉ោយប៉ែត ដើម្បីការពារការបាក់ស្រុតថ្នល់ជាតិដែលកំពុងរងការគំរាមកំហែងពីជំនន់ទឹកភ្លៀងនោះទើបលោកអភិបាលខេត្តណែនាំដល់លោកស្នងការ លោកមេបញ្ជាការប៉េអឹមឱ្យទប់ស្កាត់រថយន្តធុនធ្ងន់ធ្វើចរាចរតាមថ្នល់ជាតិលេខ៥។ នៅយប់ថ្ងៃទី១៤ តុលា លោកស្នងការខេត្តបានទៅបញ្ជា និងពិនិត្យមើលដោយផ្ទាល់កំណាត់ថ្នល់ជាតិលេខ៥ត្រង់ចំណុចក្រាំងពន្លៃក្នុងស្រុកសាមគ្គីមានជ័យដែលកំពុងលិចប្រមាណជាង១០០ម៉ែត្រ។ ចំណែកលោកឧត្តមសេនីយ៍ត្រីស្នងការខេត្តបានដាក់បទបញ្ជាឱ្យប៉ូលិសគ្រប់ស្រុកទាំង៤ដែលនៅជាប់តាមថ្នល់ជាតិលេខ៥ឃាត់ និងផ្អាករថយន្តធុនធ្ងន់ គឺឃាត់នៅតាមស្រុកនីមួយៗឱ្យនៅនឹងកន្លែងរហូតដល់មានបទបញ្ជាជាថ្មី គឺមានន័យថា រហូតដល់ស្ថានភាពទឹកជំនន់ទឹកភ្លៀងនេះស្រកផុតដូចដើមវិញ។
លោកង៉ាន ណានី ប្រធានមន្ទីរកសិកម្មខេត្តបាននិយាយថា ដំណាំស្រូវវស្សារបស់ប្រជាកសិករមួយភាគធំបានលិចលង់ដោយសារទឹកជំនន់ទឹកភ្លៀងរយៈពេល៤ថ្ងៃមកហើយគិតត្រឹមថ្ងៃទី១៥ តុលា។ សំរាប់ដំណាំស្រូវ បើសិនលិចលើសពី១០ថ្ងៃឡើងលើគឺពិតជាមានការខូចខាតខ្លះពុំខាន តែបើសិនក្រោម១០ថ្ងៃស្រូវអាចលើសដើមក៏មានដែរ។ លោកមានការព្រួយបារម្ភខ្លះដែរពីផលប៉ះពាល់លើដំណាំស្រូវ ព្រោះខាងឧតុនិយមបានជូនដំណឹងពីបញ្ហាអាកាសធាតុបែបនេះដល់ថ្ងៃទី១៨ តុលា ឯណោះ។
សំរាប់របាយការណ៍របស់លោកប្រាក់ សោភ័ណ្ឌ ប្រធានស្នាក់ការសាខាកាកបាទក្រហមកម្ពុជាខេត្តកំពង់ឆ្នាំងឱ្យដឹងថា គ្រោះធម្មជាតិតាំងពីថ្ងៃទី១១ តុលា មកបង្កឱ្យផ្ទះប្រជាពលរដ្ឋ៦២ខ្នងដួលរលំ ព្រមទាំងរបើកដំបូល និង
ជញ្ជាំង។ នៅស្រុកកំពង់លែងដួលរលំផ្ទះទាំងស្រុង២០ខ្នង របើកដំបូល និងប៉ើងជញ្ជាំង២០ខ្នង។ នៅក្រុងកំពង់ឆ្នាំងដួលរលំទាំងស្រុង២ខ្នង និងរបើកដំបូល និងប៉ើងជញ្ជាំង៧ខ្នង និងនៅស្រុកជលគិរីរលំទាំងស្រុង១ខ្នង របើកដំបូល ប៉ើងជញ្ញាំង១២ខ្នង និងស្លាប់មនុស្សម្នាក់ដោយខ្យល់វាយពន្លិចទូក។
លោកម៉ុម ហុន អធិការស្រុកជលគិរីបញ្ជាក់ថា ជនរងគ្រោះដោយសារខ្យល់បោកបណ្តាលឱ្យលិចទូកនោះឈ្មោះឡោ ពៅ ភេទប្រុស អាយុ៣៩ឆ្នាំ មានទីលំនៅក្នុងភូមិភ្លង ឃុំពាមឆ្កោក។ ហេតុការណ៍លិចទូកនោះ នៅយប់ថ្ងៃទី១១ តុលា ខណៈបុរសរងគ្រោះអុំទូកត្រឡប់ពីដាក់មងទៅផ្ទះវិញជាមួយកូនប្រុសអាយុ១០ឆ្នាំ តែសំណាងល្អ កូនប្រុសត្រូវឪពុកហែលជួយទាញឱ្យទៅតោងបង្គោលតូចមួយ។ ខណៈនោះបុរសជាឪពុកមិនហ៊ានតោងទេ ព្រោះខ្លាចបាក់បង្គោលបណ្តាលឱ្យស្លាប់ទាំងអស់គ្នា។ ដូច្នេះហើយបុរសជាឪពុកប្រឹងហែលរហូតអស់ដៃ អស់ជើងលង់ស្លាប់ក្បែរកូនដែលតោងបង្គោលនោះ។ លោកអធិការស្រុកបញ្ជាក់ថា ក្រោយស្ងប់ខ្យល់ស្ត្រីជាប្រពន្ធចេញទូកមួយជាមួយអ្នកជិតខាងទៅរកប្តី និងកូន នៅកន្លែងដាក់មងចំងាយប្រហែល៣០០ម៉ែត្រខាងក្រោយផ្ទះ។ ពេលទៅដល់ចុចពិលរកមើលឃើញ កូនប្រុសអាយុ១០ឆ្នាំកំពុងតោងបង្គោល និងស្រែកហៅឱ្យគេជួយ។ ក្មេងប្រុសនោះដៃម្ខាងតោងបង្គោល និងដៃម្ខាងចាប់ទាញកអាវសពឪពុកកុំឱ្យរសាត់៕
ចែករំលែកព័តមាននេះ