កងទាហានកាណាដាប្រយុទ្ធប្រឆាំងពួករដ្ឋអ៊ិស្លាមលើដែនដីអីុរ៉ាក់
សេនាធិការដ្ឋានកងទ័ពកាណាដា រាយការណ៍កាលពីថ្ងៃទី១៩ មករា ថា កងទាហានកាណាដា បានចូលរួមវាយប្រហារប្រឆាំងក្រុមរដ្ឋអ៊ិស្លាមនៅលើដែនដីអីុរ៉ាក់ ។
សេនាធិការដ្ឋានកងទ័ពកាណាដា រាយការណ៍កាលពីថ្ងៃទី១៩ មករា ថា កងទាហានកាណាដា បានចូលរួមវាយប្រហារប្រឆាំងក្រុមរដ្ឋអ៊ិស្លាមនៅលើដែនដីអីុរ៉ាក់ ។
កងកម្លាំងពិសេស កាណាដា នោះ បានចូលរួមប្រយុទ្ធជាមួយបណ្តាសមាជិកក្រុមរដ្ឋអ៊ិស្លាម ពេលចុះធ្វើប្រតិបត្តិការនៅលើរណសិរ្សរួមជាមួយកងទ័ពអីុរ៉ាក់ ។ ការចូលរួមវាយប្រហារតាមជើងគោកនោះ ដែលធ្វើរយៈពេលប៉ុន្មានថ្ងៃចុងក្រោយនេះ គឺជាការចូលរួមប្រយុទ្ធលើដីលើកដំបូងរបស់ប្រទេសមួយ ស្ថិតក្នុងក្រុមចម្រុះអន្តរជាតិនាំមុខដោយសហរដ្ឋអាមេរិកប្រឆាំងអង្គការរដ្ឋអ៊ិស្លាម ។
ដូចប្រទេសបារាំងដែរ កាណាដាបានដាក់ពង្រាយកងយន្តហោះប្រដេញ និងកងកម្លាំងពិសេសនៅអីុរ៉ាក់ ដោយបញ្ជាក់ថា កងទាហានទាំងនោះជួយដល់ការបណ្តុះបណ្តាលកងទ័ពអីុរ៉ាក់ និងបណ្តាកងជីវពលឃើត ។
រដ្ឋាភិបាលកាណាដា លើកឡើងពីសិទ្ធិការពារខ្លួន ដើម្បីពន្យល់ពីការប៉ះទង្គិចគ្នានោះ ។ ឧត្តមសេនីយ៍ MICHAEL ROULEAU មេបញ្ជាការកងកម្លាំងប្រតិបត្តិការពិសេសកាណាដា ថ្លែងថា ប្រការដែលយើងបាញ់តតាំងគ្នាជាមួយពួករដ្ឋអ៊ិស្លាមពុំមានន័យថា នោះជាបេសកកម្មប្រយុទ្ធមួយឡើយ ។
ឧត្តមសេនីយ៍ ROULEAU ពន្យល់ថា ឧប្បត្តិហេតុនោះជាលើកដំបូង កើតមានរយៈពេល៧ថ្ងៃចុងក្រោយនេះ ខណៈកងកម្លាំងពិសេសកាណាដា បង្ហើយផែនការទម្លាក់គ្រាប់បែករបស់ក្រុមចម្រុះរួមជាមួយ បណ្តានាយទាហានជាន់ខ្ពស់អីុរ៉ាក់ នៅភាគខាងកើតប្រទេសនោះ ។ ពេលចុះរៀបចំផែនការនៅលើទីលានផ្ទាល់ កងកម្លាំងពិសេសកាណាដា រងការបាញ់ផ្លោងដោយកាំភ្លើងត្បាល់ និងកាំភ្លើងយន្ត ។ ខ្មាន់កាំភ្លើងដៃត្រង់កាណាដា ត្រូវបានអនុញ្ញាតឱ្យបាញ់តបតវិញ ៕
ចែករំលែកព័តមាននេះ