សារព័ត៌មាននានារាយការណ៍កាលពីថ្ងៃទី១៩ មករា ថា មនុស្សយ៉ាងតិច១៤នាក់ បានត្រូវស្លាប់ ហើយជាង១០០នាក់របួសនៅភាគខាងកើតអ៊ុយក្រែន រយៈពេល២៤ម៉ោងចុងក្រោយនេះ ខណៈការប្រទូស្តរ៉ាយគ្នារវាងកងទ័ពរដ្ឋាភិបាល និងពួកបះបោរនៅបន្ត ។
អ្នកនាំពាក្យយោធាអ៊ុយក្រែន លោក អានឌ្រី អីុលីសេនកូ គូសបញ្ជាក់ថា ការប៉ះទង្គិចគ្នាថ្មីៗជាមួយពួកឧទ្ទាមបណ្តាលឱ្យទាហានអ៊ុយក្រែនស្លាប់យ៉ាងតិច៣នាក់ និងរបួស៦៦នាក់។ អ្នកនាំពាក្យរូបនេះបន្តថា ចំនួននិងទំហំនៃការវាយប្រហារប្រឆាំងទីតាំងអ៊ុយក្រែន មានការកើនឡើងដោយពួកឧទ្ទាមបាញ់ផ្លោង៩៩លើកលើកងទាហានរដ្ឋាភិបាលរយៈពេល២៤ម៉ោងចុងក្រោយនេះ ។
ចំណែកលោក អេឌូអាដ បាស៊ូរីន មេបញ្ជាការរបស់ពួកបះបោរគូសបញ្ជាក់ថា យុទ្ធជនឧទ្ទាម៨នាក់បានត្រូវស្លាប់ ហើយ៣៣នាក់ទៀត ត្រូវរបួសចាប់តាំងពីថ្ងៃទី១៨ មករា មក ក្នុងការប៉ះទង្គិចគ្នានានាជាមួយកងទាហានអ៊ុយក្រែន ។ ម្យ៉ាងទៀត ជនស៊ីវិលយ៉ាងតិច៣នាក់ក្នុងនោះមានកុមារអាយុ១២ឆ្នាំម្នាក់ផង បានត្រូវស្លាប់ហើយ ១២នាក់ទៀតត្រូវរបួស ដោយសារការបាញ់កាំភ្លើងធំនាពេលយប់ដាក់ទីក្រុង DEBALTSEVO ។
ខណៈដែលចំនួនជនរងគ្រោះមានការកើនឡើងភាគីទាំង២បានចោទដាក់គ្នាទៅវិញទៅមក ថាមិនគោរពកិច្ចព្រមព្រៀងឈប់បាញ់គ្នា ដែលចុះហត្ថលេខានៅទីក្រុងមីនស្ក៍ ដែលមានទិសដៅបញ្ចប់ជម្លោះដែលផ្ទុះឡើងចាប់តាំងពី៩ខែមកហើយ ដោយមនុស្ស៤.៨០០នាក់ស្លាប់រួចហើយ ៕
ចែករំលែកព័តមាននេះ