រាជធានីភ្នំពេញ ៖ កូនភ្លោះបីដែលប្រសូតកាលពីដើមឆ្នាំ២០០៦ នៅមន្ទីរពេទ្យគាំពារមាតា និងទារកហៅពេទ្យជប៉ុន និងបានទទួលការឧបត្ថម្ភពីសម្តេចតេជោ បច្ចុប្បន្នពួកគេមានសុខ ភាពល្អ ហើយត្រូវម្តាយធំបង្កើតនាំមកមន្ទីរពេទ្យគន្ធបុបា្ផទី៤ កាលពីព្រឹកថ្ងៃទី៥ វិច្ឆិកា ២០១០ ដើម្បីពិនិត្យសុខភាព។ លោកស្រីអ៊ួន យ៉េង អាយុ៦២ឆ្នាំ ត្រូវជាម្តាយធំបង្កើតកូនភ្លោះទាំង៣នាក់នោះបានរៀបរាប់ឱ្យដឹងថា កូនភ្លោះដែលកើតនៅក្នុងមន្ទីរពេទ្យគាំពារមាតា និងទារកហៅពេទ្យជប៉ុនម្តាយឈ្មោះអ៊ួន យ៉េកហ៊ាង អាយុ៤២ឆ្នាំ ឪពុកឈ្មោះមាឃ ចំរើន អាយុ៤៥ឆ្នាំ មុខរបរធ្វើស្រែរស់នៅភូមិត្នោត ឃុំត្នោត ស្រុកកញ្ជៀច ខេត្តព្រៃវែង។ គាត់និយាយថា កាលពីថ្ងៃទី៣ មីនា ឆ្នាំ២០០៦ ប្អូនស្រីរបស់គាត់បានប្រសូតកូនភ្លោះ៣នាក់ក្នុងនោះមានម្នាក់ជាកូនស្រីច្បង។
កូនភ្លោះ ទាំង៣នាក់នោះ គឺកូនទី១-ឈ្មោះកែវ ស្រីល័ក្ខ ភេទស្រី កូន ទី២-ឈ្មោះកែវ សំបូរ ភេទប្រុស និងកូនទី៣- ឈ្មោះកែវ សម្បត្តិ ភេទប្រុស ដែលមកដល់ពេលនេះពួកគេមានអាយុ៤ឆ្នាំហើយ។ ក្រោយពីប្រសូតបានកូនភ្លោះបី ហើយត្រូវបានសារព័ត៌មានកោះសន្តិភាពចុះផ្សាយ និងត្រូវបានសម្តេចអគ្គមហាសេនាបតីតេជោ ហ៊ុន សែន តាមរយៈលោកសេង ទៀង ដែលជាជំនួយការផ្ទាល់របស់សម្តេចបានជួយឧបត្ថម្ភដល់ឪពុកម្តាយកូនភ្លោះទាំង៣ឱ្យមានលទ្ធភាពចិញ្ចឹមពួកគេមានសុខភាពល្អជារៀងរហូតមក។
អ្នកស្រីអ៊ួន យ៉េង បានបន្តថា ក្រោយពីសំរាកព្យាបាលក្នុងមន្ទីរពេទ្យគាំពារមាតា និង ទារកហៅពេទ្យជប៉ុនបានរយៈពេលមួយ សបា្តហ៍ ប្អូនស្រីរបស់គាត់ដែលត្រូវជាម្តាយរបស់កូនភ្លោះ៣នាក់នោះបានវិលត្រឡប់ទៅផ្ទះវិញ ហើយខិតខំថែរក្សាបីបាច់ចិញ្ចឹមកូនភ្លោះទាំង៣យ៉ាងយកចិត្តទុកដាក់បំផុត ពីព្រោះពួកគេត្រូវបានសម្តេចតេជោចាត់ទុកជាកូនរបស់សម្តេច ទោះបីជាមានជីវភាពមិនធូរធាក៏ដោយ និងយោងតាមប្រសាសន៍ផ្តាំផ្ញើពីលោកសេង ទៀងផងដែរ។ ប្រហែលជាមួយឆ្នាំក្រោយ ដោយមើលឃើញការលំបាករបស់ប្អូន ទើបរូបគាត់ និងប្អូនស្រីម្នាក់ទៀតបានយកកូនភ្លោះ៣នោះមកជួយបីបាច់ថែរក្សានៅឯភូមិម្រាមទៀក ឃុំជីរោទី២ ស្រុកត្បូងឃ្មុំ ខេត្តកំពង់ចាម។
បច្ចុប្បន្នកូនភ្លោះទាំង៣នាក់នោះមានអាយុ៤ឆ្នាំហើយ ហើយសុខភាពពួកគេក៏ល្អប្រសើរ និងត្រូវបានយកមកឱ្យគ្រូពេទ្យពិនិត្យសុខភាពនៅមន្ទីរពេទ្យគន្ធបុបា្ផទី៤ នៅរាជធានីភ្នំពេញ កាលពីព្រឹកថ្ងៃទី៥ វិច្ឆិកា ឆ្នាំ២០១០។
តាមរយៈសារព័ត៌មានកោះសន្តិភាព ម្តាយធំបង្កើតរបស់កូនភ្លោះទាំង៣នាក់ខាងលើបានលើកម្រាមដៃដប់សំពះថ្លែងអំណរគុណដល់សម្តេចអគ្គមហាសេនាបតីតេជោ ហ៊ុន សែន និងលោកជំទាវ ដែលបានជួយឧបត្ថម្កដល់កូន ភ្លោះ៣ដែលត្រូវជាក្មួយរបស់គាត់ ទើបបច្ចុប្បន្នកូនភ្លោះទាំងនោះមាន ជីវិតរស់នៅមើលឃើញព្រះអាទិត្យរហូតដល់សព្វថ្ងៃ។
ជាមួយគ្នានេះដែរ ក្រុមគ្រួសារសាច់ញាតិ ក៏មិនភ្លេចគុណ បំណាច់របស់អាជ្ញាធរភូមិ-ឃុំ-ស្រុកដែលបាន យកចិត្តទុកដាក់ជួយឧបត្ថម្ភដល់កូនភ្លោះទាំង៣នោះឡើយ ហើយជាពិសេសទៅទៀតនោះ ក៏សូមថ្លែងអំណរគុណដល់គ្រូពេទ្យទាំងអស់នៅមន្ទីរពេទ្យគាំពារមាតា និងទារកផងដែរ។ ពួកគេនិយាយថា មិនភ្លេចគុណសម្តេចតេជោ និងលោកជំទាវអស់មួយជីវិត ព្រោះពួកគេក្រណាស់ បានរស់ដោយសារជំនួបពីសម្តេចតេជោពីជំហានដំបូងប៉ុណ្ណោះ៕
ចែករំលែកព័តមាននេះ