រាជធានីភ្នំពេញ ៖ កញ្ញា ទេព បុប្ពា ក្នុងវ័យ២៩ឆ្នាំ ដែលគេស្គាល់ថាជាតារាចំរៀងចូលចិត្ដច្រៀងទាំងបទមនោសញ្ចេតនា និងបទឌីស្កូញ័រញាក់កន្ដ្រាក់អារម្មណ៍ផងនោះបានចូលប្រឡូកក្នុងវិថីសិល្បៈអស់រយៈពេល១០ឆ្នាំមកហើយ។
ទោះជាយ៉ាងណាកេរ្ដិ៍ឈ្មោះរបស់នាងហាក់ពុំសូវលេចធ្លោខ្លាំងក្លាប៉ុន្មានទេ ហើយក្រៅពីច្រៀងជាប្រចាំនៅភោជនីយដ្ឋាននានាក្នុងរាជធានី នាងក៏បានច្រៀងឱ្យផលិតកម្មក្នុងនិងក្រៅប្រទេសជាច្រើនដូចជា ផលិតកម្មម៉ៃសា ម៉េតជាដើម ហើយកាលពីពាក់ កណ្ដាលខែមិថុនានេះនាងបានច្រៀងថតជាស៊ីឌីនិងសំដែងកាយវិការតាមបទចំរៀងរបស់ខ្លួនឱ្យផលិតកម្មថ្មីចំនួន៨បទជាបទសំរាប់បុណ្យភ្ជុំបិណ្ឌនាពេលខាងមុខ ។ ក្រៅពីនេះកញ្ញាបុប្ពា ជាញឹកញាប់តែងតែមានកិត្ដិយសបានឡើងច្រៀងនៅលើឆាកប្រគំតន្ដ្រីចុងសប្ដាហ៍តាមស្ថានីយទូរទស្សន៍ CTN ក្នុងកម្មវិធីមន្ដស្នេហ៍សំនៀង ។ នេះជាលើកដំបូងហើយដែលនាងបង្ហាញខ្លួនតាមកញ្ចក់ទូរទស្សន៍នៅក្នុងឆ្នាំ២០១០នេះ ក្រោយពេលបាត់ខ្លួន៧ខែដោយជាប់រវល់ទៅសំដែងនៅប្រទេសបារាំង។
បន្ទាប់ពីការបាត់មុខមួយរយៈនេះមក ក៏លេចឮពាក្យចចាមអារ៉ាមមិនល្អចំពោះនាងថា មានស្នេហាលួចលាក់ជាមួយបុរសវ័យ ចំណាស់ រហូតមានកូនស្រីអាយុជាង១ខួបឈ្មោះទេព រចនា ដែលព័ត៌មាននេះត្រូវបានផ្សព្វផ្សាយតាមទស្សនាវដ្ដីក្នុងស្រុកតែត្រូវនាងបដិសេធថា ជារឿងមិនពិតទេ ក្មេងនោះគឺជាកូនបងស្រីរបស់នាងមិនមែន កូននាងឡើយ ហើយនាងសុំច្រានចោលនូវពាក្យចចាមអារ៉ាមរឿងអាស្រូវនោះ ។
កញ្ញា ទេព បុប្ពា និយាយថា នាងខ្ញុំសំណូមពរដល់អ្នកយកព័ត៌មានទស្សនាវដ្ដីមួយចំនួនមុននឹងសរសេរគួរតែពិនិត្យឱ្យបានច្បាស់”។ ជាចុងក្រោយកញ្ញាទេព បុប្ពា អះអាងថា នាងពិតជាមិនទាន់ជាប់ពាក់ព័ន្ធស្នេហាជាមួយបុរសណាម្នាក់នោះទេ ៕
ចែករំលែកព័តមាននេះ