រាជធានីភ្នំពេញ ៖ ក្មេងប្រុសអភ័ព្វឈ្មោះគួយ វាសនា មានជំងឺឈាមសស៊ីឈាមក្រហមដែលកំពុងសំរាកព្យាបាលនៅមន្ទីរពេទ្យគន្ធបុប្ផាក្រោមការយកចិត្តទុកដាក់ពីវេជ្ជបណ្ឌិតនោះបានទទួលអំណោយតាមរយៈកោះសន្តិភាពជូនដល់ស្ត្រីជាម្តាយ កាលពីរសៀលថ្ងៃទី២៣ ធ្នូ ២០១០ នៅក្រៅរបងមន្ទីរពេទ្យ។ បន្ទាប់ពីសារព័ត៌មានកោះសន្តិភាពចុះផ្សាយស្តីពីស្ត្រីមេម៉ាយបេះត្រកួនលក់ មានកូនប្រុសអាយុ៦ឆ្នាំកើតជំងឺឈាមសស៊ីឈាមក្រហមគួរឱ្យសង្វេគរួចមកបានទទួលថវិកាឧបត្ថម្ភក្នុងក្តីអាណិតអាសូរពីលោកតែ សុខឡុង និងភរិយាចំនួន២០ម៉ឺនរៀល។ លោកមាស សារ៉េត អនុប្រធានកណ្តាលសាធារណៈស្នងការដ្ឋាននគរបាលខេត្តកណ្តាលចំនួន២ម៉ឺនរៀល និងថវិកាចំនួន១០០ដុល្លារជាអំណោយសប្បុរសជនខ្មែររស់នៅរដ្ឋហាវ៉ៃ សហរដ្ឋអាមេរិកតាមរយៈ លោកវរសេនីយ៍សំ សឿន ។ ថវិកាទាំងនេះត្រូវបានតំណាងកោះសន្តិភាពប្រគល់ជូនដល់ដៃអ្នកស្រី គួយ សារ៉ា អាយុ៣២ឆ្នាំ ជាម្តាយនៅក្រៅរបងមន្ទីរពេទ្យគន្ធបុប្ផាកាលពីរសៀលថ្ងៃទី២៣ ធ្នូ ២០១០។
នៅពេលបានទទួលថវិកាសប្បុរសជនក្នុងប្រទេស និងក្រៅប្រទេសអ្នកស្រីគួយ សារ៉ា បានលើកដៃសំពះថ្លែងអំណរគុណ និងជូនពរសប្បុរសជនទាំងអស់ជួបប្រទះតែសេចក្តីសុខ។ អ្នកស្រីនិយាយថា រយៈពេលជិតមួយខែមកហើយដែលកូនប្រុសរបស់គាត់បានចូលសំរាកព្យាបាលនៅ មន្ទីរពេទ្យគន្ធបុប្ផា ដោយសារជំងឺឈាមសស៊ីឈាមក្រហម ក្រោមការយកចិត្តទុកដាក់ពីក្រុមវេជ្ជបណ្ឌិតនៅទីនោះ ដោយពុំតំរូវឱ្យបង់ថ្លៃទេ ទាំងការបញ្ចូលឈាម ថ្នាំពេទ្យ ព្រមទាំងផ្តល់ថវិកាប្រចាំថ្ងៃសំរាប់ការហូបចុក។ អ្នកស្រីបានថ្លែងអំណរគុណសប្បុរសជនក្នុង និងក្រៅប្រទេសដែលបានបរិច្ចាគធនធានផ្ទាល់ខ្លួនតាមរយៈសារព័ត៌មានកោះសន្តិភាព ជូនដល់អ្នកស្រីដែលនេះជាទឹកចិត្តសប្បុរសមិនអាចកាត់ថ្លៃបានឡើយ។ ពេលនេះអ្នកស្រីដូចជាសត្វធ្លាក់ទឹក ហើយមានតែម្រាមដៃដប់លើកប្រណម្យជូនពរដល់សប្បុរសជនទាំងអស់ជួបតែសេចក្តីសុខគ្រប់ពេលវេលា៕
ចែករំលែកព័តមាននេះ