មេដឹកនាំនយោបាយកេនយ៉ា៦នាក់ ដែលត្រូវចោទប្រកាន់ពីបទជាប់ពាក់ព័ន្ធជាមួយអំពើហិង្សាដែលកើតឡើងក្រោយពីការបោះឆ្នោតប្រធានាធិបតីដែលមានភាពចម្រូងចម្រាសកាលពីឆ្នាំ២០០៧កន្លងមក ត្រូវបានកោះហៅឱ្យបង្ហាញខ្លួននៅចំពោះមុខតុលាការឧក្រិដ្ឋកម្មអន្តរជាតិ ICC ជាផ្នែកមួយនៃការស៊ើបអង្កេតលើការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ។
រដ្ឋអាជ្ញាតុលាការឧក្រិដ្ឋកម្មអន្តរជាតិ លោក Luis Moreno Ocampo កាលពីខែធ្នូ ឆ្នាំ២០១០ កន្លងមក បានចុះឈ្មោះអ្នកទាំង៦នាក់នោះមាន ៖ លោក Uhuru Ken yatta ឧបនាយករដ្ឋមន្ត្រី លោក Francis Muthaura លេខាធិការគណៈរដ្ឋមន្ត្រី លោក Hussein Ali អតីតនាយប៉ូលិស លោក William Ruto អតីតរដ្ឋមន្ត្រីក្រសួងកសិកម្ម លោក Joshua Arap Sang អ្នកយកព័ត៌មានឱ្យវិទ្យុជនជាតិភាគតិច និងលោក Hengry Kosgey េមដឹកនាំក្រុមប្រឆាំងជាជនសង្ស័យក្នុងការរៀបចំឱ្យមានអំពើហិង្សា ដែលបណ្តាលឱ្យស្លាប់មនុស្សជាង១០០នាក់ និងជាច្រើនម៉ឺននាក់ទៀតរត់ចោលផ្ទះសម្បែង ។
ការបោះឆ្នោតជ្រើសរើសប្រធានាធិបតីដែលមានភាពចម្រូងចម្រាសរបស់ប្រទេសកេនយ៉ា ញ៉ាំងឱ្យមានភាពចលាចលរហូតក្លាយទៅជាអំពើហិង្សាដែលធ្វើឱ្យអ្នកគាំទ្រប្រធានាធិបតីផុតអាណត្តិ លោក Mwi Kibaki ប្រឆាំងអ្នកគាំទ្រគូប្រជែងរបស់លោក គឺលោក Raila Odinga ដែលត្រូវបានតែងតាំងជានាយករដ្ឋមន្ត្រីដោយមានកិច្ចព្រមព្រៀងបែងចែកអំណាចគ្នា ។
តុលាការឧក្រិដ្ឋកម្មអន្តរជាតិបានចេញការកោះហៅអ្នកទាំង៦នាក់កាលពីថ្ងៃទី៨ មីនា កន្លងមកនេះ ៕
ចែករំលែកព័តមាននេះ