គម្រោងអគ្គិសនីជនបទ និងខ្សែបណ្តាញបញ្ជូនចរន្ត (RETP) កំពុងអនុវត្តក្នុងគោលបំណងនាំយកថាមពលអគ្គិសនីដែលជឿទុកចិត្តបានមានបរិមាណគ្រប់គ្រាន់ និងថាមពលអគ្គិសនីដែលមិនប៉ះពាល់ដល់បរិស្ថានជូនដល់ប្រជាជនកម្ពុជា ។ អត្រាអ្នកមានអគ្គិសនីប្រើប្រាស់នៅកម្ពុជាមានកម្រិតទាបបំផុតនៅក្នុងតំបន់ ហើយតម្លៃវាមានកម្រិតខ្ពស់ណាស់ ។ ថាមពលអគ្គិសនីប្រកបដោយប្រសិទ្ធភាព និងជឿទុកចិត្តបាននឹងជួយលើកកម្ពស់កម្រិតជីវភាពរស់នៅ និងធ្វើឱ្យប្រសើរឡើងកំណើនសេដ្ឋកិច្ចកម្ពុជានៅជនបទ។
គម្រោង RETP នេះ ជួយរដ្ឋាភិបាលក្នុងការតភ្ជាប់ចរន្តទៅដល់តំបន់ជនបទនៃប្រទេសកម្ពុជា ដែលនេះជាផ្អែកមួយនៃយន្តការដំបូងបង្អស់ឆ្ពោះទៅរកការកាត់បន្ថយភាពក្រីក្រ ។ រដ្ឋាភិបាលបានដាក់ចេញគោលដៅស្តីពីការតភ្ជាប់បណ្តាញអគ្គិសនីជនបទថា ភូមិទាំងអស់នឹងមានបណ្តាញអគ្គិសនីនៅឆ្នាំ២០២០ ហើយគ្រួសារប្រមាណជាង៧០ភាគរយ នឹងមានអគ្គិសនីប្រើប្រាស់នៅឆ្នាំ២០៣០ ។ បច្ចុប្បន្នមានតែគ្រួសារប្រមាណជា២៦ភាគរយទេ មានអគ្គិសនីប្រើប្រាស់ ។
ការប្រឈមធំៗបីនៃវិស័យថាមពលនៅប្រទេសកម្ពុជា រួមមាន ១-ការផ្គត់ផ្គង់អគ្គិសនីមានតម្លៃខ្ពស់ដោយសារថាមពលអគ្គិសនី បានមកពីការប្រើប្រាស់ប្រេងឥន្ធនៈដែលមានតម្លៃថ្លៃក្នុងប្រភពផ្គត់ផ្គង់ចម្រុះគ្នា ។ ២-អត្រាអ្នកមានអគ្គិសនីប្រើប្រាស់ក្នុងប្រទេសនេះនៅកម្រិតទាប២៦ភាគរយ ដែលក្នុងនោះ១៣ភាគរយនៅជនបទ ។ ៣-កង្វះការលើកទឹកចិត្ត ឬគោលនយោបាយជាក់លាក់របស់រដ្ឋាភិបាលក្នុងការពង្រីកការតបណ្តាញនៅជនបទ ដើម្បីបង្កើនចំនួនគ្រួសារដែលអាចប្រើប្រាស់អគ្គិសនី ។ លើសពីនេះទៀត សមត្ថភាពនៅមានកម្រិតរបស់អ្នកផ្តល់សេវានៃវិស័យឯកជន (ដែលគេឱ្យឈ្មោះថា សហគ្រាសអគ្គិសនីជនបទ ឬ REEs) និងតួនាទីតិចតួចរបស់អគ្គិសនីកម្ពុជា ក្នុងការពង្រីកបណ្តាញចែកចាយក្រៅក្រុងភ្នំពេញ គឺជាកត្តាសំខាន់ដែលនាំឱ្យមានអត្រាទាបនៃអ្នកមានអគ្គិសនីប្រើប្រាស់នៅកម្ពុជា ។ កត្តាទាំងនេះ និងតម្លៃខ្ពស់នៃការផលិតអគ្គិសនីបានស្តែងចេញជាលទ្ធផលធ្វើឱ្យតម្លៃសេវាអគ្គិសនីខ្ពស់ និងមានប្រើប្រាស់តិចតួចសម្រាប់គ្រួសារនៅជនបទ ។
ធនាគារពិភពលោក ភ្នាក់ងារជំនួយអន្តរជាតិប្រទេសអូស្ត្រាលី ធនាគារអភិវឌ្ឍន៍អាសីុ និងដៃគូអភិវឌ្ឍន៍ដទៃទៀត បានចូលរួមយ៉ាងសកម្មក្នុងវិធីសាស្ត្រសហប្រតិបត្តិការមួយឆ្ពោះទៅរកការនាំយកថាមពលឱ្យបានគ្រប់គ្រាន់ដល់គ្រួសារនៅជនបទ ដើម្បីជំរុញល្បឿនកំណើនសេដ្ឋកិច្ច ។ ការគាំទ្ររបស់ធនាគារពិភពលោក លើអគ្គិសនីជនបទនៅកម្ពុជា គឺផ្តោតទៅលើការលើកកម្ពស់វិស័យថាមពល ប្រកបដោយប្រសិទ្ធភាព និងអាចជឿទុកចិត្តបាន ការកាត់បន្ថយតម្លៃប្រើប្រាស់អគ្គិសនី ការលើកសម្ពស់កម្រិតជីវភាពរស់នៅ និងការលើកកម្ពស់កំណើនសេដ្ឋកិច្ច ។ ការងារទាំងនេះគឺកំពុងតែសម្រេចបានតាមរយៈការពង្រីកបណ្តាញអគ្គិសនីជនបទ និងការផ្គត់ផ្គង់ថាមពលផ្សេងៗទៀត និងការពង្រីកស្ថាប័នអគ្គិសនី ដោយបង្កើនក្របខណ្ឌនិយ័តកម្ម (ក្របខណ្ឌច្បាប់) និងបរិយាកាសដែលអាចបង្កឱ្យមានការធ្វើពាណិជ្ជកម្មវិស័យថាមពល ។ ធនាគារពិភពលោកក៏កំពុងតែគាំទ្ររដ្ឋាភិបាលផងដែរ ក្នុងការដោះស្រាយឧបសគ្គនានាដែលរារាំងដល់ការអភិវឌ្ឍថាមពលកកើតឡើងវិញ ។ ទាំងនេះរួមបញ្ចូលទាំងការប្រឈមទាក់ទងនឹងការខ្វះខាតក្របខណ្ឌគោលនយោបាយ ហិរញ្ញវត្ថុ ព័ត៌មាន និងសមត្ថភាពស្ថាប័ន ។
លទ្ធផលសម្រេចបានដែលធនាគារពិភពលោកគាំទ្រ គឺ ៖
-ខ្សែបណ្តាញតង់ស្យុងខ្ពស់១១៥គីឡូវ៉ុល មានប្រវែង២៣គីឡូម៉ែត្រ បានសាងសង់នៅក្នុង និងជុំវិញក្រុងភ្នំពេញ ដើម្បីផ្គត់ផ្គង់តម្រូវការបន្ថែម និងលើកកម្ពស់គុណភាព និងភាពទុកចិត្តបានចំពោះការផ្គត់ផ្គង់ថាមពលអគ្គិសនី ។
-ស្ថានីយចែកចាយអគ្គិសនីបន្តចំនួន៣ត្រូវបានកែលំអឱ្យប្រសើរឡើង និងដាក់ឱ្យប្រើប្រាស់តាំងពីខែសីហា ឆ្នាំ២០០៩ ។
-ខ្សែបណ្តាញតង់ស្យុងមធ្យមប្រវែង៥៦០គីឡូម៉ែត្រ និងខ្សែបណ្តាញតង់ស្យុងទាបប្រវែង២៧៨គីឡូម៉ែត្រ ត្រូវបានសាងសង់ដើម្បីពង្រីកការផ្គង់ផ្គង់ទៅដល់តំបន់ជនបទ ។
-ក្នុងចំនួន៥០.០០០គ្រួសារគោលដៅក្រោមគម្រោងខ្សែបណ្តាញផ្គង់ផ្គង់មានគ្រួសារថ្មីប្រហែល៣០.៤០០គ្រួសារ បានត្រូវភ្ជាប់បណ្តាញរួចហើយ ។
-គ្រួសារចំនួនប្រហែល៤២.៤០០០ក្នុងចំណោមគ្រួសារគោលដៅចំនួន៥០.០០០ក្រោមការពង្រីកខ្សែបណ្តាញផ្គត់ផ្គង់ក្រៅប្រព័ន្ធនៃមូលនិធិអគ្គិសនីជនបទត្រូវបានតភ្ជាប់រួចរាល់ហើយ។
-សហគ្រាសអគ្គិសនីជនបទចំនួនប្រមាណ២៦៨ បានទទួលអាជ្ញាប័នដើម្បីប្រតិបត្តិការ និងពង្រីកខ្សែបណ្តាញផ្គង់ផ្គង់ក្រៅប្រព័ន្ធនៅទូទាំងប្រទេស ។
-គ្រប់ជំនួយបច្ចេកទេសទាំងអស់ (សម្រាប់ពង្រឹងក្របខណ្ឌនិយ័តកម្មនៃវិស័យនេះ) ដល់អាជ្ញាធរអគ្គិសនីជាតិកម្ពុជា ត្រូវបានផ្តល់រួចរាល់ហើយ ខណៈដែលជំនួយដល់អគ្គិសនីកម្ពុជា និងមូលនិធិអគ្គិសនីជនបទកំពុងតែអនុវត្តបន្ត។
សម្រាប់គម្រោងអគ្គិសនីជនបទ និងខ្សែបណ្តាញបញ្ជូនចរន្ត (RETP) ធនាគារពិភពលោក បានផ្តល់ថវិកាជំនួយឥតសំណងចំនួន៤០លានដុល្លារអាមេរិក ។ បន្ថែមលើគម្រោង RETP នេះ ធនាគារពិភពលោកបានគាំទ្រគម្រោងពាណិជ្ជកម្មថាមពលក្នុងមហាអនុតំបន់ទន្លេមេគង្គ (GMSRPTP) ដែលមានទឹកប្រាក់១៨,៥លានដុល្លារអាមេរិក ។ គម្រោងនេះនឹងទាញយកអគ្គិសនីពីប្រទេសឡាវមកខេត្តស្ទឹងត្រែង ហើយនឹងផ្គត់ផ្គង់ដល់មជ្ឈមណ្ឌលកណ្តាលនៅភ្នំពេញ នៅពេលដែលខ្សែបញ្ជូនចរន្តសម្រាប់គាំទ្រនេះត្រូវបានសាងសង់រួច ។
គម្រោងអគ្គិសនីជនបទ និងខ្សែបណ្តាញបញ្ជូនចរន្ត (RETP) មានការចូលរួមពីធនាគារពិភពលោក ធនាគារអភិវឌ្ឍន៍អាស៊ី ភ្នាក់ងារជំនួយអន្តរជាតិប្រទេសអូស្ត្រាលី និងដៃគូអភិវឌ្ឍន៍ដទៃទៀត ។ ជោគជ័យពេលអនាគតជាមួយនឹងគម្រោងអគ្គិសនីជនបទ និងបណ្តាញបញ្ជូនចរន្ត (RETP) នេះ នឹងអាស្រ័យទៅលើលទ្ធភាពរបស់រដ្ឋាភិបាលក្នុងការដាក់បញ្ចូលកិច្ចខិតខំប្រឹងប្រែងរបស់ខ្លួនឆ្ពោះទៅលើអគ្គិសនីជនបទតាមរយៈការផ្តល់មធ្យោបាយដោយអគ្គិសនីកម្ពុជា និងមូលនិធិអគ្គិសនីជនបទលើការពង្រីកទាំងខ្សែបណ្តាញផ្គត់ផ្គង់ និងខ្សែបណ្តាញផ្គត់ផ្គង់ក្រៅប្រព័ន្ធ ។ ដើម្បីសម្រេចបានគោលដៅទាំងនេះ ទាំងបរិយាកាសដែលអាចប្រតិបត្តិការទៅបាន និងកម្រិតនៃការមានអគ្គិសនីគ្រប់គ្រាន់ គឺជាការចាំបាច់សម្រាប់ឱ្យមានការចូលរួមពីវិស័យឯកជនក្នុងការអភិវឌ្ឍអគ្គិសនីជនបទនៅកម្ពុជា ៕
ចែករំលែកព័តមាននេះ