ការនាំចេញរបស់ម៉ាឡេស៊ីកើនឡើង2,1%ក្នុងខែវិច្ឆិកា ឆ្នាំ2014
គូឡាឡាំពួ ៖ ក្រសួងឧស្សាហកម្ម និងពាណិជ្ជកម្មអន្តរជាតិបានឱ្យដឹងថា ការនាំចេញរបស់ម៉ាឡេស៊ី ក្នុងខែវិច្ឆិកា ឆ្នាំ២០១៤ កើនឡើង២,១% ឬស្មើនឹង១៧,៨៤ពាន់លានដុល្លារ
គូឡាឡាំពួ ៖ ក្រសួងឧស្សាហកម្ម និងពាណិជ្ជកម្មអន្តរជាតិបានឱ្យដឹងថា ការនាំចេញរបស់ម៉ាឡេស៊ី ក្នុងខែវិច្ឆិកា ឆ្នាំ២០១៤ កើនឡើង២,១% ឬស្មើនឹង១៧,៨៤ពាន់លានដុល្លារ ដែលជាកម្រិតខ្ពស់បំផុតសម្រាប់ខែវិច្ឆិកា ។
នៅក្នុងសេចក្តីថ្លែងការណ៍ ក្រសួងបានលើកឡើងថា ការនាំចេញទំនិញឧស្សាហកម្មបានកើនឡើង៤,៦% ឬស្មើនឹង១៣,៨៨ពាន់លានដុល្លារធៀបនឹងខែវិច្ឆិកា ឆ្នាំ២០១៣ ដោយសារតែការនាំចេញខ្ពស់ជាងមុននៃផលិតផលអគ្គិសនី និងអេឡិចត្រូនិកប្រមាណ៤២៥,៥៩លានដុល្លារ ។
ចំណែកផលិតផលសារធាតុគីមី១១៣,២៨លានដុល្លារ ដែកនិងដែកថែប៩៧,២១លានដុល្លារ ។ រីឯការនាំចេញទំនិញកសិកម្មធ្លាក់ចុះ១៣,៤% ឬស្មើនឹង១,៤៤ពាន់លានដុល្លារ នោះក៏ដោយសារតែការធ្លាក់ចុះនៃការនាំចេញដូងប្រេងនិងកៅស៊ូធម្មជាតិមិនទាន់ស្ល ពីព្រោះតម្លៃនិងបរិមាណទាបជាងមុន ។ ការនាំចេញទំនិញជាប្រភេទរ៉ែថយចុះ០,៤% ឬស្មើនឹង២,៤២ពាន់លានដុល្លារ ដោយសារការនាំចេញឧស្ម័នធម្មជាតិបានតិចជាងមុន ឬស្មើនឹង១១៥,៣៨លានដុល្លារ ។
ទោះជាយ៉ាងណា ការនាំចេញប្រេងកាតមិនទាន់ចម្រាញ់កើនឡើង១២,៥% ដោយោសារបរិមាណច្រើនជាងមុន ។ ក្រសួងក៏បានបង្ហើបឱ្យដឹងផងដែរថា ផលលើសផ្នែកពាណិជ្ជកម្មដែលបានចុះបញ្ជី គឺមានចំនួន៣,១១ពាន់លានដុល្លារ ជាកម្រិតខ្ពស់បំផុតចាប់តាំងពីខែវិច្ឆិកា ឆ្នាំ២០១១ មក ។ ការនាំចូលគឺនៅតែស្ថិតក្នុងអត្រា១៤,៧២ពាន់លានដុល្លារ ។ ចំណែកទំហំពាណិជ្ជកម្មសរុបក្នុងខែវិច្ឆិកា មានចំនួន៣២,៥៧ពាន់លានដុល្លារ កើនឡើង១,២% ធៀបនឹងអំឡុងពេលដូចគ្នា កាលពីឆ្នាំ២០១៣។
សរុបមកក្នុងរយៈពេល១១ខែ ដើមឆ្នាំ២០១៤ ម៉ាឡេស៊ីសម្រេចបានផលលើសផ្នែកពាណិជ្ជកម្ម ឬអាចនិយាយបានថា រើបឡើងវិញ២០,១% ឬស្មើនឹង២០,៦៩ពាន់លានដុល្លារ ធៀបនឹងឆ្នាំទៅដែលធ្លាក់ចុះ២៩,៧% ៕
ចែករំលែកព័តមាននេះ