ពួកអ្នកមុជទឹកក្រុមពិសេសរបស់កងម៉ារីនឥណ្ឌូណេស៊ី បានខិតខំពុះពារទល់នឹងចរន្តទឹកកាច និងរលកកាលពីថ្ងៃទី៨ មករា ក្នុងសមុទ្រកោះជ្វា ដើម្បីមុជឱ្យដល់បំណែកយន្តហោះ AIR ASIA
ពួកអ្នកមុជទឹកក្រុមពិសេសរបស់កងម៉ារីនឥណ្ឌូណេស៊ី បានខិតខំពុះពារទល់នឹងចរន្តទឹកកាច និងរលកកាលពីថ្ងៃទី៨ មករា ក្នុងសមុទ្រកោះជ្វា ដើម្បីមុជឱ្យដល់បំណែកយន្តហោះ AIR ASIA ដែលធ្លាក់ក្នុងសមុទ្រកាលពីថ្ងៃទី២៨ ធ្នូ ក្នុងក្តីសង្ឃឹមរកឃើញប្រអប់ខ្មៅរបស់យន្តហោះ ។
ក្នុងថ្ងៃទី១២ នៃការរុករកក្រោយការធ្លាក់យន្តហោះនេះ ដែលមានមនុស្សជិត១៦២នាក់ ប្រតិបត្តិការទ្រង់ទ្រាយធំរបស់ឥណ្ឌូណេស៊ីជាមួយជំនួយរបស់ប្រទេសឯទៀតៗត្រូវរារាំងជាថ្មី ដោយលក្ខខណ្ឌឧតុនិយម ។ ទោះបីជាយ៉ាងណា ពួកអ្នកមុជទឹកពុះពារចុះទៅដល់បំណែកកន្ទុយយន្តហោះ ក៏ប៉ុន្តែការមើលឃើញបានត្រឹមប្រវែង១ម៉ែត្រប៉ុណ្ណោះ ។ ដូច្នេះពួកគេគ្រាន់តែទាញយកបំណែកផ្សេងៗប៉ុណ្ណោះ ។ ពេលសមុទ្រស្ងប់ស្ងាត់បន្តិច ពួកគេនឹងមុជចុះទៀត ដើម្បីកំណត់ថា តើប្រអប់ខ្មៅស្ថិតនៅកន្ទុយយន្តហោះ ឬត្រូវរបូតចេញពីកន្ទុយនោះ ។
ពួកអ្នកជំនាញការបានត្រៀមរួចហើយប្រើដងស្ទូចដើម្បីស្ទូចស្រង់បណ្តាបំណែកយន្តហោះដែលនៅបាតសមុទ្រជម្រៅប្រមាណជា៣០ម៉ែត្រ ។ អាទិភាពដទៃៗទៀតគឺតាមរកជនរងគ្រោះ ។ ពុំមានសាកសពមនុស្សថ្មីណាម្នាក់ត្រូវបានស្រង់ទៀតឡើយ រហូតដល់ថ្ងៃទី៨ មករា ដោយសាកសពសរុបដែលរកឃើញមាន៤០នាក់ ៕
ចែករំលែកព័តមាននេះ