រាជធានីភ្នំពេញ ៖ ហេតុការណ៍មួយបានកើតឡើងបង្កឱ្យមានការភ្ញាក់ផ្អើលជាខ្លាំងបន្ទាប់ពីមានការ បាញ់តដៃគ្នារវាងសមត្ថកិច្ចនៃស្នងការនគរបាលរាជធានីភ្នំពេញ ជាមួយនឹងក្រុមជនសង្ស័យប្លន់ប្រដាប់អាវុធ ជាច្រើនគ្រាប់ ។ ជាលទ្ធិផលជនសង្ស័យជាមុខសញ្ញាចោរប្លន់ម្នាក់ត្រូវបានសមត្ថកិច្ចបាញ់ស្លាប់ និងធ្វើការឃាត់ខ្លួនបាន២នាក់ ។ ហេតុការណ៍ភ្ញាក់ផ្អើនេះកើតឡើងនៅចំណុចផ្ទះជួលគ្មានលេខមួយកន្លែង ស្ថិតក្នុងក្រុមទី ៦ ភូមិទ្រាទី៤ សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង៥ល្ងាច ថ្ងៃទី១ ខែមករា ឆ្នាំ២០១៥។
ប្រភពព័ត៌មានទាក់ទិននឹងប្រតិបត្តិការបង្ក្រាបជនសង្ស័យមួយក្រុមខាងលើនេះជាជំហានដំបូង បានឱ្យដឹងថា នគរបាលការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ សហការជាមួយនគរបាលប៉ុស្តិ៍ស្ទឹងមានជ័យ បានបើកប្រតិបត្តិការចុះឆែកឆេរទីតាំងខាងលើ ដោយសង្ស័យថាទីតាំងផ្ទះជួលខាងលើ មានជនសង្ស័យមួយក្រុម កំពុងពួនសំងំលាក់ខ្លួន ។ ប្រភពដដែលបន្តថា ខណៈដែលសមត្ថកិច្ច ចុះទៅធ្វើការឡោមព័ទ្ធទីតាំងផ្ទះជួលខាងលើ ជនសង្ស័យ២នាក់ ក្នុងចំណោមបក្ខពួកទាំង៤នាក់បានលោតចុះពីលើអាគារផ្ទះជួលចុះមកក្រោមដោយ ក្នុងនោះជនសង្ស័យទាំង២នាក់ដែលបានលោតចុះមក មាន១ម្នាក់ប្រដាប់ដោយអាវុធខ្លីម៉ាកកា៥៤ បានធ្វើបាញ់ស្រោចទៅលើសមត្ថកិច្ចជាច្រើនគ្រាប់ ដើម្បីគំរាមសមត្ថកិច្ច រួមហើយព្យាយាមរត់គេចខ្លួន ។ ភ្លាមៗ នោះជនសង្ស័យដែលមានកាំភ្លើងខាងលើបានប្លន់យកម៉ូតូសង់កូរ៉េពី បុរសម្នាក់ ហើយព្យាយាមជិះគេចខ្លួន រហូតដល់ចំណុចធនាគារកាណាឌីយ៉ា ដោយសារម៉ូតូសង់កូរ៉េមានល្បឿនយឺតពេក រូបគេក៏ផ្តួលម៉ូតូចុះ ហើយស្ទុះទៅប្លន់យកម៉ូតូមួយគ្រឿងទៀតម៉ាកសង់សេ១២៥ ស៊េរីឆ្នាំ២០១៤ ពីបុរសម្នាក់ដែលកំពុងចតស្ងៀមនៅលើដងផ្លូវ អង្គុយចាំប្រពន្ធរបស់ខ្លួនចេញពីធ្វើការរោងចក្រ បានសម្រេចជនសង្ស័យព្យាយាមជិះគេចខ្លួន រហូតដល់ចំណុចវាលស្រែមួយកន្លែង ស្ថិតក្នុងភូមិ សាស្ត្រសង្កាត់ដង្កោរខណ្ឌដង្កោរ ទើបត្រូវសមត្ថកិច្ចខណ្ឌពោធិ៍សែនជ័យ សហការជាមួយសមត្ថកិច្ច ខណ្ឌដង្កោរ ឡោមព័ទ្ធចាប់ខ្លួនជនសង្ស័យ ដែលខណៈនោះជនសង្ស័យបានព្យាយាមបាញ់ជាច្រើន គ្រាប់ទៀតទៅលើសមត្ថកិច្ច ធ្វើឱ្យសមត្ថកិច្ចបង្ខំចិត្ត បាញ់រះទៅលើជនសង្ស័យបណ្តាល គ្រាប់កាំភ្លើងធា្លយចូលពេញដងខ្លួនជនសង្ស័យស្លាប់បាត់បង់ជីវិតនៅនឹងកន្លែងភ្លាមៗ ( ដូចខ្មោចឆ្កែ ) ។ចំណែកជនសង្ស័យម្នាក់ដែលបានលោតចុះមកខាងក្រោម បានរត់គេចខ្លួនបាត់ស្រមោលសូន្យឈឹង ។ នៅសល់ជនសង្ស័យ២នាក់ទៀតដែលត្រូវជាបក្ខពួកនឹងគ្នាកំពុងពួនសំងំលាក់ខ្លួនលើដំបូលផ្ទះក្បែរអាគារផ្ទះជួល ក៏ត្រូវសមត្ថកិច្ចក្របួចបាននៅនឹងកន្លែងផងដែរ ។
ជនសង្ស័យ២នាក់ដែលត្រូវបានសមត្ថកិច្ចឃាត់ខ្លួនខាងលើមានឈ្មោះ ស៊ូត យ៉ា ភេទប្រុស អាយុ២៥ឆ្នាំ មានស្រុកកំណើតនៅខេត្តតាកែវ និងម្នាក់ទៀតមិនត្រូវបានស្គាល់អត្តសញ្ញាណ ។ ចំណែក ជនសង្ស័យដែលត្រូវបានសមត្ថកិច្ចបាញ់ស្លាប់មានឈ្មោះ ហេង ហៅ អាខូរល័ អាយុ២៥ ឆ្នាំ ហើយបច្ចុប្បន្នសពត្រូវបានយកទៅតម្កល់នៅឈាបនដ្ឋាន នៃវត្តមួយកន្លែងក្នុងភូមិសាស្ត្រខណ្ឌដង្កោរ ។
ក្នុងប្រតិបត្តិការចុះបង្ក្រាបក្រុមជនចោរប្លន់ប្រដាប់អាវុធខាងលើនេះ សមត្ថកិច្ចបានដកបាន កាំភ្លើងខ្លីចំនួន២ដើម មួយដើមម៉ាកកា៥៤ ដកហូតពីជនសង្ស័យដែលត្រូវសមត្ថកិច្ចបាញ់សម្លាប់ និង មួយដើមទៀតម៉ាកកា៥៩ ត្រូវបានដកហូតពីជនសង្ស័យម្នាក់ដែលកំពុងពួនសំងំក្នុងអាគារផ្ទះជួល ។ ក្រោយការឃាត់ខ្លួនភា្លមៗ ជនសង្ស័យទាំង២នាក់ រួមជាមួយវត្ថុតាងដែលមានដូចជា(កាំភ្លើងខ្លី ២ដើម និងម៉ូតូ៣គ្រឿងដែលជនសង្ស័យធ្វើសកម្មភាពប្លន់ ) ត្រូវបានសមត្ថកិច្ចបញ្ចូនទៅកាន់ស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវបន្តទៅតាមនីតិវិធីច្បាប់ ។
ប្រជាពលរដ្ឋពិតជាមានសេចក្តីត្រេកអរជាខ្លាំងពន់ពេកចំពោះសមត្ថកិច្ចដែលបានធ្វើការបង្ក្រាប ក្រុមចោរប្លន់ប្រដាប់អាវុធយ៉ាងសកម្មក្នុងរាជធានី មួយសំបុកធំបែបនេះ ។ ហើយចំពោះការបង្ក្រាបខាងលើនេះពួកគាត់ នាំគ្នាគិតថាវាជាកាដូរ របស់ពួកគាត់សម្រាប់ដើមឆ្នាំ២០១៥ ដែលវាជាកាដូរដ៏ថ្មី ស្រឡាងរបស់ សមត្ថកិច្ចនៃស្នងការនគរបាលរាជធានីភ្នំពេញ និងសមត្ថកិច្ចមូលដ្ឋានប្រគល់ជូនពួកគាត់ ។
ចែករំលែកព័តមាននេះ