ខេត្តសៀមរាប ៖ ភោជនីយដ្ឋានចំនួនពីរយីហោ «ខ្មែរអង្គរ» និង«កុលាបអង្គរ» ដែលបើកលក់ប្រចាំថ្ងៃជូនភ្ញៀវទេសចរជាតិ-អន្ដរជាតិនៅបរិវេណមុខប្រាសាទអង្គរវត្ដ ត្រូវបានព្រះអគ្គីឆាបឆេះយ៉ាងសន្ធោសន្ធៅកាលពីយប់ថ្ងៃទី២ មីនា ខណៈដែលម្ចាស់កំពុងលង់លក់ក្នុងដំណេក ។ ក៏ប៉ុន្ដែពុំមានជនណាម្នាក់បានស្លាប់ ឬរងរបួសនៅក្នុងឧប្បត្តិហេតុដ៏សោកសៅនោះទេ គ្រាន់តែសំភារនៅក្នុងភោជនីយដ្ឋានទាំងពីរនោះ រួមមាន តុ កៅអី ទូក្លាស្សេ ទូរទស្សន៍ ព្រមទាំងទ្រព្យសម្បត្ដិមួយចំនួនទៀតត្រូវបានភ្លើងឆេះអស់ស្ទើរទាំងស្រុង ។
កាលពីព្រឹកថ្ងៃទី៣ មីនា សមត្ថកិច្ចមួយក្រុមដឹកនាំដោយលោកវរសេនីយ៍ទោភឹង ចិន្តារិទ្ធិ អធិការនគរបាលក្រុងសៀមរាប បានចុះទៅកាន់កន្លែងកើតហេតុដើម្បីពិនិត្យស្រាវជ្រាវរកមូលហេតុដែលនាំឱ្យកើតមានគ្រោះអគ្គីភ័យនោះ ប៉ុន្ដែមិនទាន់ដឹងច្បាស់ទេ បានត្រឹមតែសន្និដ្ឋានប៉ុណ្ណោះ។
លោកវរសេនីយ៍ទោ ភឹង ចិន្ដារិទ្ធិ អធិការនគរបាលក្រុងសៀមរាប បានថ្លែងថា តាមការសន្និដ្ឋានជំហានដំបូងឃើញថា មូលហេតុដែលបង្កឱ្យមានគ្រោះមហន្ដរាយនេះឡើង ទំនងជាផ្ដើមចេញពីចរន្ដភ្លើងដែលកើតចេញពីអាគុយ ដែលម្ចាស់ភោជនីយដ្ឋានខ្មែរអង្គរទុកសម្រាប់បញ្ឆេះម៉ាស៊ីនភ្លើង ព្រោះអាគុយមានពីរសម្រាប់បញ្ឆេះម៉ាស៊ីន និងមានរបស់របរ ព្រមទាំងប្រេងសាំងនៅពីលើទៀតផង ។ ពេលមានវត្ថុដែលអាចចម្លងចរន្ដទៅប៉ះបង្គោលអាគុយទាំងសងខាង វាបង្កើតបានជាផ្កាភ្លើងរួចឆាបឆេះតែម្តង ។
ចំណែកឯសាក្សីឈ្មោះ កេង កូច ភេទប្រុស អាយុ១៨ឆ្នាំ ជាប្អូនជីដូនមួយរបស់ម្ចាស់ភោជនីយដ្ឋានខ្មែរអង្គរ ដែលបានឃើញហេតុការណ៍ឆេះនោះមុនគេ បានរៀបរាប់ប្រាប់ថា នៅពេលខ្លួនកំពុងដេកលក់យ៉ាងស្កប់ស្កល់នៅក្បែរបន្ទប់ម៉ាស៊ីនភ្លើងនោះ ស្រាប់តែឮសំឡេងអ្វីមួយនិងធុំក្លិនប្រេងសាំងផងដែរ។ ពេលនោះខ្លួនក៏ក្រោកឡើងស្រាប់តែឃើញមានភ្លើងឆេះចេញពីខាងក្រៅចំនួនពីរកន្លែង គឺមួយចេញពីបន្ទប់ម៉ាស៊ីន និងមួយទៀតចេញពីក្រោយបន្ទប់ទឹករួចក៏បន្ដឆាបឆេះយ៉ាងសន្ធោសន្ធៅរាលដាលដល់កន្លែងផ្សេងៗទៀត។
ទាំងសាក្សីទាំងជនរងគ្រោះបានអះអាងដោយដាក់ការសង្ស័យថា គ្រោះអគ្គីភ័យនេះកើតឡើងដោយមានមនុស្សលួចដុត ព្រោះម៉ាស៊ីនភ្លើងនោះពួកគេឈប់បញ្ឆេះវាតាំងពីវេលាម៉ោង៨មកម៉្លេះ ហើយភ្លើងបានឆាបឆេះនៅម៉ោង១០និង៤៥នាទីរឿងអី្វវាឆ្លងចរន្ដនោះ។ លោកភឹង ចិន្តារិទ្ធិ បានថ្លែងបន្ដថា នៅយប់កើតហេតុនោះកំលាំងរបស់យើងបានអន្ដរាគមន៍សំបើមណាស់ដោយបានហៅរថយន្តពន្លត់អគ្គីភ័យមកជួយបាញ់ទឹកពន្លត់អស់៤រថយន្តទើបភ្លើងរលត់ បើមិនដូច្នោះទេ ច្បាស់ជារាលដាលដល់ហាងផ្សេងៗដែលសង់នៅជាប់នោះមិនខាន។
សមត្ថកិច្ចបានបន្ដថា ភ្លើងបានផ្ដើមឆេះចេញពីបន្ទប់ម៉ាស៊ីនរបស់ភោជនីយដ្ឋាន«ខ្មែរអង្គរ»ដែលមានម្ចាស់ឈ្មោះអៀម ចិន្តា ភេទស្រី អាយុ៤៩ឆ្នាំ រួចបានឆេះរាលដាលដល់ភោជនីយដ្ឋាន«កុលាបអង្គរ» របស់ឈ្មោះទី កុលាប ភេទស្រី អាយុ៣២ឆ្នាំ រស់នៅភូមិត្រពាំងសេះ សង្កាត់គោកចក ក្រុងសៀមរាប ដែលសង់ជាប់គ្នានោះ។
ភោជនីយដ្ឋានដែលត្រូវភ្លើងឆេះទាំងពីរជាប្រភេទសំណង់ធ្វើពីីគ្រោងដែក ប្រក់ស័ង្កសី និងមានពិតាន ហើយសំណង់នីមួយៗមានទំហំបណ្ដោយ២៦ម៉ែត្រ ទទឹង១០ម៉ែត្រ ដោយភោជនីយដ្ឋាន «ខ្មែរអង្គរ» បានរងការខូចខាតអស់ស្ទើរទាំងស្រុងនៅផ្នែកខាងក្រោយ ចំណែកភោជនីយដ្ឋាន «កុលាបអង្គរ» បានរងការខូចខាតតែបន្ដិចបន្តួចប៉ុណ្ណោះ ។
នាង អឿន ស្រីពេជ្រ អាយុ២៦ឆ្នាំ ដែលជាកូនស្រីម្ចាស់ភោជនីយដ្ឋានខ្មែរអង្គរ បានរៀបរាប់ប្រាប់សមត្ថកិច្ចទាំងយំទួញសោកថា ទ្រព្យសម្បត្ដិដែលបាត់បង់នៅក្នុងហេតុការណ៍ដ៏អាក្រក់នេះបើសរុបទៅអស់ប្រមាណជា ១៥.៤០០ដុល្លារ ក្នុងនោះមានខ្សែ.កពេជ្រ តុ ទូ និងរបស់របរប្រើប្រាស់ក្នុងហាងដែលត្រូវភ្លើងលេបត្របាក់អស់ស្ទើរគ្មានសល់ ។
ចំណែកស្ដ្រីឈ្មោះទី កុលាប បានប្រាប់ថា ភោជនីយដ្ឋាន«កុលាបអង្គរ»របស់គាត់មិនសូវជាខូចខាតប៉ុន្មានទេ ព្រោះសំភារនៅក្នុងហាងត្រូវបានគេជួយរំដោះចេញក្រៅទាន់ពេលបានមួយចំនួន គឺគ្រាន់តែបាត់បង់តុ កៅអី ទូឈើ ព្រមទាំងទូក្លាស្សេ និងទូរទស្សន៍ប៉ុណ្ណោះ បើ សរុបជាប្រាក់អស់ប្រហែល២ពាន់ដុល្លារដែរ។ ស្ដ្រីរូបនោះបានបន្ដថា ចំពោះរូបគាត់មិនមាន ជំហរណាមួយប្ដឹងទាមទារសំណងចំពោះការខូចខាតនោះទេ ទុកឱ្យម្ចាស់ហាងគេជាអ្នកសម្រេចដោយខ្លួនគេចុះ ព្រោះគាត់គ្រាន់តែជាអ្នកជួលហាងនេះបន្ដប៉ុណ្ណោះ។
សមត្ថកិច្ចបាននិយាយថា ម្ចាស់ហាងបង្កហេតុត្រូវតែទទួលខុសត្រូវចំពោះការខូចខាតបើសិនជាពុំមានការយោគយល់ពីម្ចាស់ហាងមួយទៀតដែលរងគ្រោះ ។ ប៉ុន្ដែគេជឿថាហេតុការណ៍នេះពុំមានអ្នកណាចង់ឱ្យកើតឡើងទេ ដូច្នេះគួរតែមានការយោគយល់ ៕
ចែករំលែកព័តមាននេះ