រាជធានីភ្នំពេញ ៖ បុរសកំហូចម្នាក់ដែលជាអ្នករត់ម៉ូតូឌុប បានប្រព្រឹត្តអំពើអសីលធម៌គួរឱ្យថ្កោលទោស ដោយដើរស្ទាបគូទនារីៗដែលជាកម្មការិនីរោងចក្រកាត់ដេរជាច្រើននាក់ជាបន្តបន្ទាប់ ក្នុងខណៈពេលពួកនាងកំពុងងូតទឹកនៅបន្ទប់ទឹកក្នុងផ្ទះជួលមួយកន្លែង ។ ប៉ុន្តែក្នុងចំណោមកម្មការិនីខាងលើនោះ អ្នកខ្លះខ្មាសគេមិនហា៊នចេញមុខប្តឹងបុរសកំហូចនេះទេ ម្នាក់ៗចេះតែលាក់នៅក្នុងចិត្តរហូត និងខ្លះទៀតសុខចិត្តរើអីវ៉ាន់ចាកចេញពីផ្ទះជួលមួយនោះ ទៅស្នាក់នៅកន្លែងផ្សេងទៀត ព្រោះខ្លាចមានបញ្ហាបែបនេះកើតទ្បើងទៀត ។
ដោយទ្បែក នៅពេលនេះមាននារីចំនួន៣នាក់ ដែលរងគ្រោះព្រោះម្រាមដៃជនអគតិស្ទាបអង្អែលគូទនោះ មានភាពក្លាហានចេញមុខប្តឹងប៉ូលិសប៉ុស្តិ៍ចោមចៅឱ្យឃាត់ខ្លួនបុរសនោះចាត់ការតាមផ្លូវច្បាប់និងបង្កឱ្យមានការភ្ញាក់ផ្អើលទាំងយប់ ។ ហេតុការណ៍នេះ បានកើតទ្បើងកាលពីម៉ោង៩និង១៥នាទីយប់ ថ្ងៃទី២៨ ធ្នូ នៅក្នុងផ្ទះជួលមួយកន្លែង ស្ថិតនៅក្នុងភូមិព្រៃខាងជើង សង្កាត់ចោមចៅ ខណ្ឌពោធិ៍សែនជ័យ ។ ជនជាប់ចោទឈ្មោះ អិុន កសាង អាយុ៤០ឆ្នាំ ជាអ្នករត់ម៉ូតូឌុប ស្នាក់នៅក្នុងផ្ទះជួលខាងលើជាមួយប្រពន្ធនិងកូន ។
ដោយទ្បែក នារីៗ៣នាក់ដែលបានចេញមុខប្តឹងជនកំហូចរូបនេះមាន ១-ឈ្មោះ រី រង អាយុ១៨ឆ្នាំ ជាកម្មការិនីរោងចក្រ ដោយនាងបានអះអាងថា បុរសនោះបានស្ទាបគូទនាងកាលពី៣ថ្ងៃមុន ២-ឈ្មោះ ពាន ផល្លា អាយុ៣០ឆ្នាំ អះអាងថា នាងត្រូវជននោះស្ទាបគូទ កាលពីវេលាម៉ោង៦ល្ងាចថ្ងៃទី២៨ ធ្នូ និង៣-ឈ្មោះ ហែម ស្រីវ៉ន អាយុ២០ឆ្នាំ អះអាងថា ជននេះស្ទាបគូទនៅវេលាម៉ោង៦ល្ងាចថ្ងៃដដែលនោះ ខណៈពេលកំពុងងូតទឹក ។ មិនតែប៉ុណ្ណោះ នៅមាននារីជាច្រើននាក់ទៀត ដែលសុទ្ធតែបានអះអាងដូចៗគ្នា ប៉ុន្តែពួកនាងមិនមានភាពក្លាហានចេញមុខប្តឹងជននោះទ្បើយ ព្រោះខ្លាចខ្មាសគេ និងខ្លាចជននោះជាប់គុកមិនបានយូរពេលចេញមកវិញមានគំនុំជាមួយពួកនាង ។
បន្ទាប់ពីទទួលបានបណ្តឹងនោះភ្លាម នគរបាលប៉ុស្តិ៍ចោមចៅ បានចុះឃាត់ខ្លួនបុរសឈ្មោះ អិុន កសាង តែពេលសាកសួរជននោះ បដិសេធថា ខ្លួនមិនបានប្រព្រឹត្តទ្បើយ មិនតែប៉ុណ្ណោះ ថែមទាំងបានទាមទារឱ្យនារីៗទាំងនោះរកភស្តុតាងទៀតផង ។ ប៉ុន្តែទោះបីជាបែបណា ពេលនេះនគរបាលប៉ុស្តិ៍ចោមចៅ បានកសាងសំណុំរឿងបញ្ជូនជននេះទៅសាលាដំបូងហើយ ដែលពិតជាឥតប្រយោជន៍មែន ក្នុងការប្រព្រឹត្តអំពើឆ្កួតៗបែបនេះ ។ ក្នុងជីវភាពជាអ្នករត់ម៉ូតូឌុប ហើយជួលផ្ទះគេស្នាក់នៅ គឺមានកាតព្វកិច្ចប្រកបរបរចិញ្ចឹមជីវិតជាចម្បងមិនមែនដើរស្ទាបគូទស្រីៗទេ ដែលនេះជាអំពើអសីលធម៌មួយពុំគប្បីនឹងប្រព្រឹត្តទ្បើយ ៕
ចែករំលែកព័តមាននេះ