ការប្រើប្រាស់ទោចក្រយានយន្ត(ម៉ូតូ) ជាមធ្យោបាយធ្វើដំណើរនិងដឹកជញ្ជូន គឺជាជម្រើសរបស់មនុស្សម្នាទាំងទ្បាយ ពិសេសអ្នកដែលមានបំណងសន្សំសំចៃប្រេងឥន្ធនៈតែម្តង ។ ម្យ៉ាងនៅកម្ពុជាយើងអ្នកមានលទ្ធភាពប្រើរថយន្តក៏មានកម្រិតនៅទ្បើយដែរ ។
ជាមួយគ្នានឹងបរិមាណនៃអ្នកជិះម៉ូតូដ៏ច្រើនលើសលុបនោះ ហានិភ័យក៏មិនតិចដែរ ដូច្នេះការយល់ដឹងពីមូលដ្ឋានក្នុងការប្រើប្រាស់សូរសព្ទដ៏ត្រឹមត្រូវប្រកបដោយសុវត្ថិភាព គឺជារឿងសំខាន់បំផុត របស់អ្នកកាន់ចង្កូតម៉ូតូគ្រប់រូប ។ ខាងក្រោមនេះ គឺជារបៀបប្រើប្រាស់ស៊ីផ្លេម៉ូតូឱ្យបានត្រឹមត្រូវ៖
១-ដាក់មេដៃរបស់អ្នកនៅក្បែរប៊ូតុងស៊ីផ្លេជានិច្ច ។ ធ្វើដូច្នេះគឺដើម្បីឱ្យច្បាស់ថា អ្នកនឹងអាចប្រើវាឆ្លើយតបតាមស្ថានការណ៍បានទាន់ពេលនឹងងាយស្រួល ។
២-ចុចស៊ីផ្លេដាក់អ្នកប្រើប្រាស់ផ្លូវដទៃទាំងអ្នកជិះកង់និងម៉ូតូ ដើម្បីឱ្យសញ្ញាពីបំណងបំលាស់ទីរបស់អ្នកដល់ពួកគេបានដឹងជាមុន ។ ប៉ុន្តែសូមចងចាំថា ត្រូវប្រើវាឱ្យស្របតាមច្បាប់ចរាចរណ៍ផ្លូវគោក របស់ព្រះរាជាណាចក្រកម្ពុជានៃយើង ។
៣-ចុចស៊ីផ្លេបន្លឺសំទ្បេងឱ្យខ្លាំងបន្តិច ខណៈពេលស្ថានភាពផ្លូវជួបបញ្ហាខ្លះ ឬអាចក្នុងស្ថានភាពផ្លូវនៃការធ្វើដំណើរឆ្ងាយ(ក្រៅពីប្រជុំជន) ។
*ចំណាំ ៖ យោងតាមច្បាប់ចរាចរណ៍ផ្លូវគោកនៃព្រះរាជាណាចក្រកម្ពុជាមាត្រា២៨ ចែងថា៖
រាល់ការប្រើប្រាស់សូរសព្ទ «ស៊ីផ្លេ» នៃយានជំនិះត្រូវអនុវត្តដូចតទៅ៖
១-ការប្រើប្រាស់សញ្ញាសូរសព្ទ «ស៊ីផ្លេ» ត្រូវអនុញ្ញាតឱ្យប្រើប្រាស់តែនៅពេលថ្ងៃប៉ុណ្ណោះ ដើម្បីឱ្យដំណឹងដល់អ្នកប្រើប្រាស់ផ្លូវដទៃទៀត ចៀសវាងនូវគ្រោះថ្នាក់ ដែលអាចកើតមានទ្បើងជាយថាហេតុ និងដើម្បីសុំជែងនៅក្រៅពីប្រជុំជន ។
២-នៅពេលយប់សញ្ញាសូរសព្ទស៊ីផ្លេ ត្រូវជំនួសដោយសញ្ញាភ្លើងហ្វាកូតឆ្លាស់គ្នា សម្រាប់ឱ្យដំណឹងដល់អ្នកប្រើប្រាស់ផ្លូវដទៃទៀត ដើម្បីចៀសវាងនូវគ្រោះថ្នាក់ និងពេលសុំជែងជាដើម ។
៣-សញ្ញាសូរសព្ទពិសេសអាចប្រើបានគ្រប់ពេលវេលាក្នុងពេលកំពុងបំពេញភារកិច្ចចំពោះយានពន្លត់អគ្គិភ័យ យានសង្គ្រោះរបស់មន្ទីរពេទ្យ យាននគរបាល យោធា កងរាជអាវុធហត្ថ ក្បួនគណៈប្រតិភូ និងក្បួនថ្នាក់ដឹកនាំជាន់ខ្ពស់ ឬក្បួនយានដែលមាននគរបាលចរាចរណ៍ផ្លូវគោកនាំមុខ ។
៤-សញ្ញាសូរសព្ទត្រូវប្រើរយៈពេលខ្លី គឺមិនយូរជាងការចាំបាច់ទ្បើយ លើកលែងតែមានការប្រកាសអាសន្ន ។
៥-សញ្ញាសូរសព្ទស៊ីផ្លេខ្យល់ត្រូវហាមប្រើនៅក្នុងទីក្រុង ទីប្រជុំជន ឬនៅជិតមន្ទីរពេទ្យ ៕
ចែករំលែកព័តមាននេះ