រាជធានីភ្នំពេញ ៖ ប្រជាពលរដ្ឋប្រាកដជាចាំច្បាស់អំពី «យុទ្ធនាការសង្គ្រោះចិញ្ចើមផ្លូវ» របស់អាជ្ញាធរក្រុងភ្នំពេញ ក្នុងការរៀបចំសណ្តាប់ធ្នាប់ផ្លូវសាធារណៈ ដើម្បីឲ្យពលរដ្ឋមានសុវត្ថិភាពក្នុងការធ្វើដំណើរទាំងការធ្វើដំណើរដោយថ្មើរជើង និងការបញ្ជាយានយន្ត ។
កន្លងទៅអាជ្ញាធរបានប្រើសេចក្តីប្រកាស ឬការអំពាវនាវ ដើម្បីធ្វើការងារនោះ ពេលបានផលពេលខ្លះមិនសូវបានលទ្ធផលល្អនោះឡើយ ។ រហូតមកដល់នេះ យុទ្ធនាការសង្គ្រោះចិញ្ចើមផ្លូវដូចជា មិនសូវជាបានលទ្ធផលល្អនោះឡើយ ប៉ុន្តែពេលខាងមុខនេះ អាជ្ញាធរនឹងមានដាវអាជ្ញាសឹក ដើម្បីធ្វើការងារនេះ នោះ គឺជាច្បាប់សណ្តាប់ធ្នាប់សាធារណៈ ។
ក្រសួងមហាផ្ទៃកំពុងពិនិត្យសេចក្តីព្រាងច្បាប់ស្តីពីសណ្តាប់ធ្នាប់សាធារណៈ ។ មន្ត្រីក្រសួងមហាផ្ទៃបានឲ្យដឹងថា ការតាក់តែងច្បាប់នេះឡើង ក្នុងគោលបំណង «គ្រប់គ្រងសណ្តាប់ធ្នាប់សាធារណៈឱ្យមានរបៀបរៀបរយសោភ័ណភាពអនាម័យបរិស្ថាន ភាពស្ងប់ស្ងាត់ សុវត្ថិភាពសង្គម និងការរក្សាប្រពៃណីជាតិ និងសេចក្តីថ្លៃថ្នូររបស់ប្រជាពលរដ្ឋ » ។
ប្រភពដដែលបានបញ្ជាក់បន្ថែមថា លើសពីនោះទៀត ច្បាប់នេះមានវិសាលភាពអនុវត្តចំពោះរាល់សកម្មភាពដែល ពាក់ព័ន្ធនឹងសណ្តាប់ធ្នាប់សាធារណៈនៅក្នុងព្រះរាជាណាចក្រកម្ពុជា ។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ប្រាប់កោះសន្តិភាពថា សេចក្តីព្រាងច្បាប់នោះនឹងធ្វើឲ្យសង្គមជាតិមានសណ្តាប់ធ្នាប់ ជាពិសេសកែប្រែទម្លាប់មិនល្អមួយចំនួន នៅក្នុងសង្គមដូចជា ការធ្វើរោងការ រោងបុណ្យលើផ្លូវសាធារណៈ ឬការយកទ្រូងផ្លូវទៅប្រកបអាជីវកម្មផ្សេងៗ ដែលប៉ះពាល់ដល់សុវត្ថិភាព សោភ័ណភាពសាធារណៈនោះ ។
លោកនាយឧត្តមសេនីយ៍ ខៀវ សុភ័ក បានបញ្ជាក់ថា «ច្បាប់អាចចាប់បង្ខំឲ្យពលរដ្ឋគោរព ពីព្រោះនៅក្នុងច្បាប់មានទាំងការដាក់ទោសទណ្ឌមានទាំងការផាកពិន័យ និងមានអប់រំ ។ ច្បាប់នេះនឹងរៀបរយសណ្តាប់សង្គមយើងឲ្យមានរបៀបរបបសណ្តាប់ធ្នាប់ និងការពារបរិស្ថាន ។
យើងសង្កេតឃើញគ្រប់គ្នាហើយ ពេលបច្ចុប្បន្ននេះ លើដងផ្លូវអាចធ្វើអ្វីៗគ្រប់យ៉ាងតាមទម្លាប់របស់ពលរដ្ឋរហូតដល់មានការបូជាសពលើផ្លូវក៏មាន ។ ច្បាប់សណ្តាប់ធ្នាប់សាធារណៈ ហើយនឹងរៀបចំអ្វីដែលមិនល្អឲ្យទៅល្អ» ។
លោកខៀវ សុ សុភ័ក បានបដិសេធដល់ការលើកឡើងមួយចំនួនដែលថា សេចក្តីព្រាងច្បាប់ស្តីពីសណ្តាប់ធ្នាប់សាធារណៈ អាចរឹតបណ្តឹងសិទ្ធិសេរីភាពពលរដ្ឋ ។ លោកបញ្ជាក់ថា ច្បាប់នេះ គឺចូលរួមពង្រឹងសុវត្ថិភាពពលរដ្ឋ ។
សេចក្តីព្រាងច្បាប់នេះមាន៨ជំពូក និង៤៧មាត្រា ។ លោកនាយឧត្តមសេនីយ៍ អ៊ុក គឹមលេខ រដ្ឋលេខាធិការក្រសួងមហាផ្ទៃ ទទួលបន្ទុកការងារផែនសណ្តាប់ធ្នាប់សាធារណៈ ក្នុងពេលចូលរួមពេលពិនិត្យសិក្សាសេចក្តីព្រាងច្បាប់នេះ កាលពីពេលថ្មីៗបានលើកឡើងថា សេចក្តីព្រាងច្បាប់ស្តីពីសណ្តាប់ធ្នាប់សាធារណៈនេះមានសារៈសំខាន់ និងទូលំទូលាយណាស់ ព្រោះទាក់ទងទៅនឹងជីវភាពប្រចាំថ្ងៃ នឹងសណ្តាប់ធ្នាប់សង្គម ៕
ចែករំលែកព័តមាននេះ