រាជធានីភ្នំពេញ៖ អ្នកលក់ស្បង់ចីវរ និងសម្ភារៈសម្រាប់ធ្វើបុណ្យគ្រប់ប្រភេទបានត្អូញត្អែរថាការលក់ដូររបស់ពួកគាត់បានធ្លាក់ជាចុះជាខ្លាំង គឺបាត់បង់ភ្ញៀវច្រើនហួសពីការគិត ។
អ្នកលក់ថា ពលរដ្ឋធ្លាប់ធ្វើបុណ្យ បានផ្អាកធ្វើបុណ្យនៅឆ្នាំនេះ ដោយសារជំងឺកូវីដ១៩ ធ្វើឲ្យប៉ះពាល់សេដ្ឋកិច្ចពួកគាត់ធ្ងន់ធ្ងរ ។
លោកស្រី សុខ ថាវី អ្នកលក់សម្ភារៈធ្វើបុណ្យគ្រប់ប្រភេទធំមួយកន្លែងនៅក្នុងក្រុងភ្នំពេញ ថាការលក់ដូររបស់គាត់បានធ្លាក់ចុះរង្វង់ ពី៦០% ទៅ៧០% ។ លោកស្រីថាគាត់បានបាត់បង់អតិថជន ទាំងអ្នកទិញយកទៅធ្វើបុណ្យផ្ទាល់ និងអ្នកលក់យកឥវ៉ាន់ទៅលក់បន្ត។ អ្នកស្រីបានបញ្ជាក់ថា «ខ្ញុំសង្កេតឃើញថា អ្នកនៅបន្តធ្វើបុណ្យពេលនេះ គឺពួកគាត់មានជីវភាពធូរធារខ្លាំង ។ ចំណែកអ្នកល្មមៗ ពួកគាត់ថាផ្អាកធ្វើបុណ្យសិន ពួកគាត់រកចំណូលមិនបាននៅពេលកូវីដ១៩នេះ» ។
បើតាមអ្នកលក់សម្ភារៈបុណ្យថា រៀងរាល់ឆ្នាំនៅរដូវនេះ គាត់លក់សម្ភារៈធ្វើបុណ្យដាច់ខ្លាំងពីព្រោះជិតចូលព្រះវស្សា ហើយរយៈពេលខាងមុខមានបុណ្យបន្តបន្ទាប់ ដូចជា បុណ្យភ្ជុំបិណ្ឌជាដើម ។ ពលរដ្ឋដែលមានបំណងធ្វើបុណ្យទានផ្សេងៗ តែងតែទិញសម្ភារៈធ្វើបុណ្យទុក តែឆ្នាំនេះអ្នកធ្វើបុណ្យជាច្រើនបានបាត់មុខ ។
ម្ចាស់កន្លែងលក់សម្ភារៈធ្វើបុណ្យមួយទៀតឈ្មោះ ឯក ចាន់ ថាការលក់ដូររបស់គាត់បានធ្លាក់ចុះជាងពាក់កណ្តាល ។ ឯកចាន់ គឺជាហាងលក់សម្ភារៈបុណ្យនៅក្រុងប៉ោយប៉ែត ខេត្តបន្ទាយមានជ័យ ។ ម្ចាស់ហាងមួយនេះថា អ្នកធ្វើទិញសម្ភារៈធ្វើបុណ្យតាមវត្តអារាម ដែលឆ្នាំបុណ្យពួកគាត់ទិញទានព្រះវស្សា និងទេយ្យទានសម្រាប់៥វត្ត ឬ១០វត្ត នៅឆ្នាំនេះ គេទិញតែសម្រាប់មួយវត្ត ប៉ុណ្ណោះ។
អ្នកស្រីបញ្ជាក់ថា ចំណែកបរិមាណក៍បានថយចុះដែរ។ ពីមុខគេទិញសម្ភារៈប្រគេនព្រះសង្ឃ១០មុខ តែឆ្នាំនេះ បើគេទិញ គេទិញតែសម្ភារៈសំខាន់ៗ មួយមុខ ឬពីមុខប៉ុណ្ណោះ។
ម្ចាស់ហាងលក់សម្ភារៈធ្វើបុណ្យខាងលើបន្ថែមថា នៅប៉ោយប៉ែតសេដ្ឋកិច្ចពលរដ្ឋពឹងលើការឆ្លងដែនរកស៊ី លក់ដូរជាមួយប្រទេសថៃ លុះដល់ព្រំដែនបានបិទ ជីវភាពពលរដ្ឋបានជួបការលំបាក។
អ្នកស្រី សុខ ថាវី បញ្ជាក់ថានៅពេលពលរដ្ឋជាច្រើនមិនបានចេញធ្វើបុណ្យដូចឆ្នាំមុខៗ ការផលិតសម្ភារៈសម្រាប់ធ្វើបុណ្យមួយចំនួនក៍ផ្អាក់ចង្វាក់ផលិតកម្មគេដែរ។ «នៅឆ្នាំនេះសិប្បកម្មផលិតទៀនមួយចំនួនបានផ្អាកដំណើរ។ ចំណែកសកម្មភាពសេដ្ឋកិច្ចតាមទីផ្សារក៍ស្ងាត់។ រាល់ឆ្នាំហាងខ្ញុំពេលនេះរវល់ណាស់ តែពេលនេះគ្មានការបញ្ជាទិញទេ។ ពលរដ្ឋត្អូញគ្រប់គ្នា»។
អ្នកស្រីបន្ថែមថា «កូវីដ១៩ បានធ្វើឲ្យប៉ះពាល់សេដ្ឋកិច្ចជារួមទាំងម្តង» ។
មន្ត្រីអ្នកនាំពាក្យក្រសួងធម្មការនិងសាសនា លោក សេង សុមុនី បានអំពាវនាវឲ្យពលរដ្ឋចូលរួមធ្វើបុណ្យតាមសទ្ធាដូចរាល់ឆ្នាំ។ លោកបានបញ្ជាក់ថាព្រះសង្ឃនិងវត្តអារាមអាស្រ័យលើប្រជាពុទ្ធបរិស័ទ ។
ទោះបីយ៉ាងណាមន្ត្រីស្នើដល់ពលរដ្ឋនៅចេញទៅធ្វើបុណ្យទាន ប្រកាន់ខ្ជាប់វិធានការរបស់ក្រសួងសុខាភិបាល ដោយមិនត្រូវជុំមនុស្សច្រើន ត្រូវរក្សាគម្លាតនិងពាក់ម៉ាស ឧស្សាហ៍លាងដៃនិងសាប៊ូ ឬអាកុលជាដើម៕
ចែករំលែកព័តមាននេះ