កាលកូននៅក្មេងៗ យើងនៅរួមគ្នាជាគ្រួសារ មានសំឡេងសើចសប្បាយ មានសំឡេងរត់ប្រឡែងគ្នា បរិភោគអាហាររួមគ្នា និងធ្វើអ្វីៗជាមួយគ្នាពិតជាប្រសើរណាស់ ។ ឪពុកម្តាយ សូម្បីធ្វើការហត់នឿយអស់កម្លាំងយ៉ាងណាក៏ដោយ លុះមកដល់ផ្ទះហើយគ្រាន់តែឃើញមុខកូនៗ រត់មកទទួលដោយទឹកមុខញញឹមប៉ុណ្ណឹង ម៉ែឪក៏បាត់អស់នូវការហត់នឿយភ្លាមមួយរំពេច ។ មាតាបិតាឃើញកូនញ៉ាំបាន គេងបានលក់ស្រួលក៏សប្បាយចិត្ត ទាំងអស់នេះឯងដែលគេថា គ្រួសារមានភាពកក់ក្តៅនោះ ។
ពេលនេះកូនក៏បានធំៗអស់ហើយ កូនអើយធ្វើជាបងជាប្អូននឹងគ្នា កូនត្រូវចេះស្រឡាញ់គ្នា ។ សាច់ឈាមជាមួយគ្នា យ៉ាងណាៗក៏កាត់មិនបាន ពាក្យចាស់ពោលថា កាត់ទឹកមិនដាច់ កាត់សាច់មិនបាន ដូច្នេះចូរកូនកុំស្អប់ខ្ពើម កុំកំណាញ់ កុំច្រណែន ឬខឹងក្រោធគំនុំគុំកួនអ្វីដល់គ្នាឡើយ កូនត្រូវជួយគ្នា និងមើលថែគ្នាវិញទើបបានល្អ ។
បានមកធ្វើជាបងប្អូននឹងគ្នាហើយ ស្រាប់តែមកឈ្លោះទាស់ទែងគ្នា វាជារឿងដែលគួរឲ្យខ្មាសអៀនណាស់ កូនអើយ មនុស្សល្អគេមិនឈ្លោះទាស់ទែងគ្នាដូច្នេះឡើយ ។
កូនអើយស្វាមីភរិយាអាចរកថ្មីបាន តែបងឬប្អូនរកមិនបានទៀតឡើយ មានប៉ុនណាក៏ប៉ុណ្ណឹង កាលកាត់បង កាត់ប្អូន ក៏ដូចគ្នានឹងការកាត់សាច់ កាត់ឈាមរបស់ម៉ែឪដែរកុំទាស់ទែងគ្នាណាកូន ។ (ពាក្យពេចន៍ម៉ែឪ) សាន សារិន
ចែករំលែកព័តមាននេះ