អាមេរិក ៖ តាមប្រភពព័ត៌មាន CNN បានឱ្យដឹងថា មន្ត្រីសុខាភិបាលសហរដ្ឋអាមេរិកបាននិយាយថា មនុស្ស៣នាក់បានបាត់បង់ជីវិត និងម្នាក់ទៀតពិការភ្នែក ដោយសារតែការផឹកអាល់កុលលាងដៃ នៅក្នុងរដ្ឋ…
អាមេរិក ៖ តាមប្រភពព័ត៌មាន CNN បានឱ្យដឹងថា មន្ត្រីសុខាភិបាលសហរដ្ឋអាមេរិកបាននិយាយថា មនុស្ស៣នាក់បានបាត់បង់ជីវិត និងម្នាក់ទៀតពិការភ្នែក ដោយសារតែការផឹកអាល់កុលលាងដៃ នៅក្នុងរដ្ឋ New Mexico សហរដ្ឋអាមេរិក។
ក្រសួងសុខាភិបាលនៅរដ្ឋ New Mexico បាននិយាយនៅក្នុងសេចក្តីថ្លែងការណ៍មួយថា មនុស្ស៣នាក់បន្ថែមទៀត កំពុងស្ថិតក្នុងស្ថានភាពធ្ងន់ធ្ងរ។ របាយការណ៍នោះបាននិយាយថា៖ «មនុស្ស៧នាក់ ត្រូវបានគេជឿថា បានផឹកទឹកអាល់កុលសម្រាប់លាងដៃ ដែលមានផ្ទុកសារធាតុមេតាណុល»។
មន្ត្រីសុខាភិបាលបាននិយាយថា ករណីទាំងនេះ ត្រូវបានគេរាយការណ៍ទៅកាន់អង្គភាពត្រួតពិនិត្យសារធាតុពុលនៅរដ្ឋ New Mexico កាលពីខែឧសភា និងមានជាប់ទាក់ទងនឹងការញៀនស្រា។ ពួកគេមិនបានផ្តល់ព័ត៌មានលម្អិតបន្ថែម អំពីជនរងគ្រោះ ឬកន្លែងដែលឧប្បត្តិហេតុបានកើតឡើងឡើយ។
រដ្ឋលេខាធិការក្រសួងសុខាភិបាល លោកស្រី Kathy Kunkel បាននិយាយថា៖ «ប្រសិនបើអ្នកគិតថា អ្នកបានប្រើប្រាស់ ឬផឹកទឹកអាល់កុលលាងដៃ ដែលមានផ្ទុកសារធាតុមេតាណុល សូមស្វែងរកការព្យាបាលភ្លាម។ ថ្នាំប្រឆាំងនឹងការពុលមេតាណុល អាចរកបាន។ តែវាទាមទារពេលវេលាមកឱ្យបានលឿន»។
មនុស្សមួយចំនួន ត្រូវបានគេដឹងថា ផឹកទឹកអាល់កុលលាងដៃ ដោយសារតែញៀនស្រា។ មុនពេលមានការរីករាលដាលនៃជំងឺកូវីដ១៩ ក្នុងគុកគឺមិនឱ្យមានទឹកអាល់កុលលាងដៃទេ ដោយសារតែខ្លាចអ្នកទោសយកទៅផឹក ពេលដាច់ស្រាខ្លាំង ឬយកទៅដុតឱ្យឆេះគុក។ ប៉ុន្តែមជ្ឈមណ្ឌលត្រួតពិនិត្យ និងបង្ការជំងឺបានផ្តល់អនុសាសន៍ថា គួរតែលើកកម្ពស់អនាម័យ ដើម្បីទប់ស្កាត់ជំងឺឆ្លង៕ ដកស្រង់ចេញវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ